ธง-เม่ง หว่า 8 (Proverbs 8)

ธง-เม่ง หว่า 8

ธง-เม่ง เซ หลง ไห่

¹ ธง- เม่ง เห่ว เจี๊ยน ไม้ เฒ์ย?

เม่ง แปะ เญย เจ๊า เห่ว เฉีย โฮล เญย
ไม้ เฒ์ย? *

² นิ่น เยียม เจ๊า-เฮลน ฮลัง เญย ต๋อง,

โซ้ว เจี๊ยน จ๊าบ-ม์า เจ๊า.

³ นิ่น เยียม เปียะ ฒี่ง เญย
หลาด แก้ง กะเฮลน,

เยียม เปียะ แก้ง เญย ต๋อง เห่ว บุย เญย ก๊อง,

⁴ ``หฒวัง เมี่ยน อ้า! เยีย เห่ว เม่ย บัว.

เยีย หูง เจี๊ยน เหยียด ฒู้ง ป้าม เมี่ยน เห่ว.

⁵ ไม้ ฮิ้ว หาย หญู่ง เญย เมี่ยน อ้า!

เม่ย บัว อ๋อย หฒุ โหะ ไกว.

เมี่ยน หฮงง เมี่ยน อ้า!
เม่ย บัว เญย เฮญี้ยว อ๋อย หฒุ เม่ง แปะ.

⁶ หมวัง ม่าะ! เยีย อ๋อย ก๊อง หลง ไห่ เญย หว่า.

หาย หญู่ง หอบ เญย อ๋อย เยียม เยีย เญย ฑุ่ย ธ้วด,

⁷ เหว่ย หฒุ เยีย เญย ฑุ่ย อ๋อย ก๊อง
เฒียน เล์ย,

เยีย เญย ฑุ่ย เหมย กั้ม เฑี้ย ไห่ เอ๊าะ
เญย เจ๊า.

⁸ เยีย เญย ฑุ่ย ก๊อง เญย เหยียด ฒู้ง หว่า หอบ เญย,

ไม้ ม่าย เหยียด เต๋ย เงา ไฟ ฌ้วด.

⁹ เหว่ย ไฮ่ เปียะ เฮญี้ยว เญย เมี่ยน, น้าย เต๋ย เหยียด ฒู้ง หว่า เซ หฒะ เญย.

เหว่ย ตุ๊ ว่วน ฒาง เญย เมี่ยน, น้าย เต๋ย หว่า เซ หอบ เญย.

¹⁰ กิ๊น หล่ง เยีย หฌาว เญย หว่า ไม้ เฒ์ย ญ่าน,

กิ๊น ว่วน ฒาง ไม้ เฒ์ย เฒียน เจียม,

¹¹ เหว่ย หฒุ ธง-เม่ง เซ เก้า หลง เจี๋ย หละเปย๊ย-จ๋าย,

ต้ง เม่ย อ๋อย เญย เหยียด ฒู้ง กะน้าย ไม้ ไฮ่ เป๊ย ตุ๊ ธง-เม่ง.

¹² ``เยีย เซ ธง-เม่ง. เยีย ปุน เมี่ยน
ไฮ่ ฮนั้ม ตุ๊ ทง, *

ม่าย ว่วน ฒาง หย่า ไกว.

¹³ ท่าย เฒี้ยว เญย เจ๊า เซ ฑอง เอ๊าะ เญย สี่.

เยีย ฑอง เธง-โฮล, โหฒว เหมา เญย สี่,

โหฒว เอ๊าะ เญย เจ๊า เหธา ก๊อง-แปะ ดั๊ว เมี่ยน เญย หว่า.

¹⁴ เยีย ไฮ่ เถง ต๊า หฒะเอ๋ย, ม่าย ธง-เม่ง หลง.

เยีย ไฮ่ เม่ง แปะ หย่า ม่าย ชะ.

¹⁵ ฮู่ง เตี๋ย ปั่ง เยีย กุ๊น.

โหฒว โฮล เญย เมี่ยน ปั่ง เยีย เหลียบ แป้ง ฟิม เญย เล์ย.

¹⁶ โม์ว เต้า เปย๊ย เฒ้ย เหธา โหฒว โฮล เญย เมี่ยน

ปั่ง เยีย กุ๊น ลู่ง เดี๊ย. *

¹⁷ ฮนั้ม เยีย วั้ว เต๋ย, เยีย หย่า ฮนั้ม นิ่น บัว,

เจี้ยน ล์อ เยีย วั้ว เต๋ย หย่า ล์อ ตุ๊ ปวัด.

¹⁸ ฒิ่น ฒ่อย เหธา ฌัง-หล่าง เยียม เยีย,

หย่า ม่าย เยียม ตุ๊ ว้วน เญย ฟุ-โหละ เหธา กง-ฟิม. *

¹⁹ เม่ย เยียม เยีย ตุ๊ ต้าย เญย * เซ เก้า หลง เจี๋ย เจียม,

ฒู้ง เก้า หลง เจี๋ย เฒียน ไห่ เญย เจียม,

เยีย ธ้วด เญย หย่า เก้า หลง เจี๋ย เฒียน ญ่าน.

²⁰ เยีย ยั่ง โหฒว หอบ เญย เจ๊า,

กัน แป้ง ฟิม เญย เจ๊า-โหล่ว.

²¹ เยีย ปุน ฮนั้ม เยีย วั้ว เต๋ย หฑิบ ฒิ่น ฒ่อย

ปุน นิ่น เซียว จ๋าย เญย กะน้าย เญย ต๋อง ปวั๊ง เหฑ่ง.

ธง-เม่ง เญย กอน-ญ่วน

²² `` เฒี้ยว เจี์ย กอน โหฒว นิ่น เญย กง วั้ว หฒั่น, นิ่น เหฒย เยีย ด่าง เจี๋ย,

เซ นิ่น โล์-ฮนอย โหฒว ต้าย เญย ต้าว หญู่ง กง. * หล่าว ย่าง 3:14

²³ เยียม โล์-ฮนอย ต้ง ธอ วั้ว,

ไม้ แก้ง ม่าย ป้าม เกน วั้ว หฒั่น

นิ่น เหลียบ เยีย เจี์ย ต้าย.

²⁴ ไม้ แก้ง ม่าย ค้อย,

ไม้ แก้ง ม่าย ววม ธั้ม เญย ววม-ฒี้ง

เยีย ธ้วด เสย ต้าย อ๊ะ.

²⁵ ต้ม บง ไม้ แก้ง ตุ๊ เยียม ตี่ง,

ฟิ้ว-บง หย่า ไม้ แก้ง ม่าย, เยีย ฒู้ง
ธ้วด เสย.

²⁶ เยีย ธ้วด เสย ด่าง ทิน-ฮู่ง เหฒย เดา เหธา ลี่ง เต่ย.

ลู่ง เดี๊ย ติ๊ เตียน เญย เนีย-บูง หย่า ไม้ แก้ง ม่าย.

²⁷ นิ่น เหลียบ ลู่ง

หย่า เกว๊ด ฮวีง ก๋อม ค้อย-หมิ่น เญย ลู่ง กอน วั้ว หฒั่น, เยีย เยียม หน่าย.

²⁸ นิ่น ปุน ลู่ง กู้ หงว่าย เยียม ตุ๊ ว้วน,

หย่า เหลียบ เดา-เดี๊ย เญย ววม-ฒี้ง
วั้ว หฒั่น,

²⁹ นิ่น ตี่ง ค้อย เญย กั๊บ-จ๋าย

เหว่ย ปุน ววม ไม้ เจี๋ย ด่าง นิ่น หัด เญย หว่า,

นิ่น หย่า เหลียบ ตี่ง เดา เญย กอน-โด๊ะ,

³⁰ วั้ว หฒั่น เยีย เยียม นิ่น เญย กะเฮลน ฮนั้ง เต้า หฒั่ง เมี่ยน.

นิ่น ฮนอยๆ เหว่ย เยีย อะเฮน้ย,

เยีย หย่า หฒั่นๆ เยียม นิ่น เญย หฑะเฮมียน เฌียน-โย่ว ไห่.

³¹ เยีย อะเฮน้ย นิ่น เญย ป้าม เกน, *

หย่า อะเฮน้ย ไห่ ป้าม เมี่ยน.

³² ``เยีย เญย ตอน อ่า, อี้ หฒั่น หมวัง เยีย ม่าะ!

เอย เจี๊ยน เยีย เญย เจ๊า โหฒว วั้ว เต๋ย ม่าย ออน-เหลาะ.

³³ อ๋อย หฒุ หมวัง เยีย หฌาว เญย หว่า ฯฒฯ ตุ๊ ธง-เม่ง,

ไม้ ตู๋ง ปู๋ง หลอ.

³⁴ หมวัง เยีย เญย หว่า วั้ว เต้า ม่าย ออน-เหลาะ,

นิ่น ฮนอยๆ เยียม เยีย เญย แก้ง ด่าง หมั่ง,

เยียม เยีย เญย แก้ง กะเฮลน ฒั้ว.

³⁵ หาย เต้า ล์อ ปวัด เยีย ฯฒฯ ตุ๊ แหม่ง เฒี่ยง.

เฒี้ยว หย่า หอบ เฮญี้ยว นิ่น.

³⁶ มป่า หาย เต้า ล์อ ไม้ ปวัด เยีย, ฯฒฯ ห่อย หฒุ กั้น.

ฑอง เยีย วั้ว เต๋ย เหยียด ฒู้ง อะเฮน้ย หฒุ ไต่ เญย เจ๊า.''