ธง-เม่ง หว่า 22 (Proverbs 22)

ธง-เม่ง หว่า 22

¹ กิ๊น เม่ง เต้า หลง เซ เก้า หลง กิ๊น ฒิ่น ฒ่อย ธั้ม

ตุ๊ เมี่ยน ท่าย เซ เก้า หลง เจียม ญ่าน.

² เมี่ยน ม่าย เมี่ยน เหธา เมี่ยน จ่ม เมี่ยน ม่าย เหยียด ติ่ว ฟี่ ฮนั้ง,

เซ เฒี้ยว เหฒย นิ่น บัว เหยียด ฒู้ง ต้าย.

³ เมี่ยน ไกว เมี่ยน ปวัด ไฮ่ ม่าย สี่ ธ้วด ฯฒฯ ซิ้ม ฆอย,

มป่า ไม้ ฮิ้ว หาย หญู่ง เญย เมี่ยน หูง เจี๊ยน มี่ง ฯฒฯ หฒุ โค้ว อ๊ะ.

⁴ เหญี่ยม กั้น โหฒว ไฝ หย่า ท่าย เฒี้ยว

ปุน เมี่ยน ตุ๊ ฒิ่น ฒ่อย, ตุ๊ เมี่ยน ท่าย หย่า ตุ๊ แหม่ง เฒี่ยง.

⁵ ปู๊ ล่ง ปู๊ ตั๊ง เมี่ยน เญย เจ๊า ม่าย ฌิ้ม
เหธา โขว,

หาย เต้า โก๋ว ตุ๊ กั้น ฒู้ง เล่ย ฆอย น้าย เต๋ย กะน้าย โก.

⁶ หฌาว ฝุเจว๊ย กัน นิ่น หอบ หฒุ ยั่ง เญย เจ๊า,

โก๋ ต้าย นิ่น ฯฒฯ ไม้ เล่ย ฆอย.

⁷ ปุ๊ด-ฒ่อย เมี่ยน กุ๊น เมี่ยน จ่ม เมี่ยน,

ก๊า แฒะ เญย เมี่ยน เป๋น แฒะ-เฒี้ยว เญย โน่ว.

⁸ เมี่ยน หฒวัง เอ๊าะ เญย เจ๊า * ฯฒฯ เซียว เหฒะ หน่าน,

ทิน-ฮู่ง โน์ว เมี่ยน เญย ปย๊า หย่า อ๋อย ปุน นิ่น หฒุ เหมียด. *

⁹ หาย เต้า หมั่ง ไม้ เจี๋ย เหมว่ย, โหฒว เฮญี้ยว จั๊ง, ฯฒฯ ตุ๊ ฟุ,

เหว่ย หฒุ นิ่น เฒาะ ป่วน กั้น เญย หญั่น ฮบ ปุน เมี่ยน จ่ม เมี่ยน.

¹⁰ อ๋อย หฒุ หฒุ่น ธ้วด ฮว้วด เมี่ยน เญย
เมี่ยน, แฑง จ๋า เญย เจ๊า ฯฒฯ ป่า
หมี่ อ๊ะ.

แฑง จ๋า, ก๊อง โตะ เญย เจ๊า หย่า เซ้ก
เหฑ่ง.

¹¹ หาย เต้า อะเฮน้ย ม่าย ธีง-เหฑ่ง เฮญี้ยว, นิ่น เญย หว่า หย่า ม่าย เอน-ฒี่ง,

วั้ว เต้า ฯฒฯ ตุ๊ ฮู่ง เตี๋ย โหฒว นิ่น เญย ต่อย.

¹² เฒี้ยว เญย มฒีง โก๋ว เจี๊ยน ว่วน ฒาง,

มป่า นิ่น เบี๊ยน ไม้ เหฒียบ ฒัวะ เญย เมี่ยน เญย หว่า.

¹³ เมี่ยน เหลว่ย เมี่ยน ก๊อง, ``กะเหญี่ย แหมง ม่าย เต้า เซี่ยน.

เหฑีย เยียม วั้ว จาย-ห่อง เยีย ไฮ่ หฒุ นิ่น หงาด ไต่.''

¹⁴ เหฮยียน โหฆ เญย มเซียะ ตอน * เญย ฑุ่ย ฮนั้ง โด ไห่ เญย ค้วด,

เฒี้ยว เฉีย เจี์ย เญย เมี่ยน ฒู้ง หฒุ ด๊อด เปียะ กะญั์ว.

¹⁵ หฮงง เญย เจ๊า มต้าย เยียม ฝุเจว๊ย เญย เฮญี้ยว,

มป่า หล่ง ปย๊า เบ๊าะ หฌาว ไฮ่ หฒุ่น ธ้วด เล่ย นิ่น โก.

¹⁶ หาย เต้า เหฒย เมี่ยน จ่ม เมี่ยน เหว่ย โต้ว กั้น ปุ๊ด ฒ่อย,

ไฟ ฝูง ฒี่ง เหญ่ย ปุน ปุ๊ด-ฒ่อย เมี่ยน,

เซ้ด เมว์ย นิ่น กั้น จ่ม หมี่ อ๊ะ. *

ฟ่า เหฒียบ กิ่น ธง-เม่ง หว่า

¹⁷ เม่ย อ๋อย หฒุ แปง มน่อม หมวัง ธง-เม่ง เมี่ยน เญย หว่า.

เยีย หฌาว เญย หว่า อ๋อย หฒุ หล่ง เฮญี้ยว หมวัง.

¹⁸ สี ก๊อง เม่ย ฒ่าง เจี๊ยน น้าย เต๋ย หว่า เยียม เฮญี้ยว,

หย่า หลิ่ว เล์ย เหฒียง หฒั่นๆ ไฮ่ ก๊อง,

ฯฒฯ เถง เม่ย หอบ เฮญี้ยว อ๊ะ.

¹⁹ เยีย อี้ ฮนอย หฌาว เญย เซ ต้ง เม่ย, เม่ย ฯฒฯ ไฮ่ ฮิ้ว ตุ๊ น้าย เต๋ย หว่า

เหว่ย ปุน เม่ย เขา เฒี้ยว.

²⁰ เยีย เหว่ย เม่ย เฟี้ย ฟ่า เหฒียบ กิ่น ขวิน เญย หว่า

เหธา ว่วน ฒาง เญย หว่า ไม้ เฒ์ย?

²¹ เยีย อ๋อย ปุน เม่ย ฮิ้ว ตุ๊ หาย หญู่ง หอบ, หาย หญู่ง เฒียน,

เหว่ย ปุน เม่ย ไฮ่ หล่ง เฒียน หว่า เตา พ้าย เม่ย มี่ง เญย เมี่ยน.

²² ไม้ ตู๋ง ธ้าง เมี่ยน จ่ม เมี่ยน เญย กะน้าย เหว่ย หฒุ นิ่น จ่ม,

หย่า ไม้ ตู๋ง เยียม ฒี่ง แก้ง เหฒย โต้ หน่าน เมี่ยน,

²³ เหว่ย หฒุ เฒี้ยว อ๋อย เถง นิ่น บัว แหธง สี่.

หาย เต้า ห่อย นิ่น บัว, เฒี้ยว อ๋อย ห่อย วั้ว เต้า เญย แหม่ง.

²⁴ ไม้ ตู๋ง เหธา ฮู่ง เห่ เฉีย เจี์ย เซี้ยบ เญย เมี่ยน ต๊า โล์-แกง,

หย่า ไม้ ตู๋ง เหธา กะเฉีย เป๊ะ เญย เมี่ยน มี่ง.

²⁵ เหฑีย เม่ย ไฮ่ หฒวด นิ่น เญย หญู่ง โหฒว,

หย่า หฒุ โขว ฮลบ หฒุ กั้น.

²⁶ ไม้ ตู๋ง ฮนั้ง เมี่ยน แล์ง ฑุ่ย เปว เมี่ยน เญย แฒะ,

หย่า ไม้ ตู๋ง แล์ง โหฒว ดาม-ต้าว.

²⁷ สี ก๊อง เม่ย ไม้ ม่าย หาย หญู่ง จ๊าว ซูง,

เลี่ยม เม่ย เปว๋ย เจี๊ยน เญย โหธว นิ่น บัว ฯฒฯ เฒาะ มี่ง.

²⁸ เม่ย เญย อง-ถาย เหลียบ เญย เต่ย-จ๋าย,

เม่ย ไม้ ตู๋ง ซุ้ย.

²⁹ เม่ย ปวัด ม่าย ปั้น เหฒ่ย โหฒว กง หลง เญย เมี่ยน,

นิ่น ตุ๊ โซ้ว เจี๊ยน ฮู่ง เตี๋ย เญย หฑะเฮมียน,

ไม้ เฒ์ย โซ้ว ไม้ ม่าย เม่ง เต้า เญย เมี่ยน เญย หฑะเฮมียน.