ธง-เม่ง หว่า 21 (Proverbs 21)

ธง-เม่ง หว่า 21

¹ ฮู่ง เตี๋ย เญย เฮญี้ยว เซ ฮนั้ง ติ้ว โด๊ะ เยียม เฒี้ยว เญย ปั์ว,

เซว่ย เฒี้ยว เญย เอ๋ย ปุน นิ่น ฮวิน มี่ง หาย ปูง.

² เมี่ยน โหฒว เญย สี่ หฒิว กั้น เญย มฒีง หมั่ง นิ่น โหฒว ตุ๊ หอบ,

มป่า เฒี้ยว ฒ่า * เมี่ยน เญย เฮญี้ยว.

³ เฒี้ยว อะเฮน้ย เมี่ยน โหฒว ตุ๊ หอบ, แป้ง ฟิม เญย,

เก้า ธั้ม ต้อ กะน้าย ฝ่ง ห่อ เหฒี่ย.

⁴ เอ๊าะ เมี่ยน มฒีง-จ๋า ฮลัง, เฮญี้ยว หย่า เหมา,

น้าย เซ เป๋น ฒุ์ย อ๊ะ. *

⁵ เมี่ยน เจี้ยน เมี่ยน เญย หฒะเอ๋ย ด่ง หาย ฒู้ง ปุน นิ่น บัว ตุ๊ คู่ เยียม,

มป่า โหฒว สี่ เป๊ะ เญย เมี่ยน ขูง หฒุ จ่ม ฮนั้ง.

⁶ ฑุ่ย ก๊อง-แปะ ดั๊ว ตุ๊ ต้าย เญย ฒิ่น ฒ่อย,

เซ ฮนั้ง ป่วน มี่ง เญย โหม่ว หย่า โหฒว โขว ฮลบ กั้น ไต่.

⁷ เอ๊าะ เมี่ยน โหฒว โตะ เญย สี่ อ๋อย กว๊าด นิ่น บัว กั้น มี่ง,

หลาย นิ่น บัว ไม้ คั้ง โหฒว แป้ง ฟิม เญย เจ๊า.

⁸ ต่อง ฒุ์ย เญย เมี่ยน เญย เจ๊า เซ เงา ฌ้วด,

มป่า ธีง-เหฑ่ง เมี่ยน โหฒว เญย สี่ เซ หอบ เญย.

⁹ เยียม เปย๊า-ง่อ กู้ หงว่าย เญย เก๊าะ *

หธ่อ เก้า หลง เหธา หฒั่นๆ แฑง จ๋า เญย มเซียะ ตอน จวั่ง เปย๊า เยียม.

¹⁰ เอ๊าะ เมี่ยน เญย เฮญี้ยว ขูง อ๋อย เอ๊าะ สี่ ฮนั้ง,

หฒิว นิ่น เญย มฒีง หมั่ง ตุ๊ เจี๋ย เหมว่ย,
ไม้ ค้อ-เลี่ยน จวั่ง ล์าง เมี่ยน.

¹¹ ฮว้วด เมี่ยน เญย เมี่ยน หฒุ ตี่ง ฒุ์ย,

ไม้ ฮิ้ว หาย หญู่ง เญย เมี่ยน ตุ๊ ธง-เม่ง.

ธง-เม่ง เมี่ยน ตุ๊ เมี่ยน หฌาว,

นิ่น จา ตุ๊ ว่วน ฒาง.

¹² กง-ฟิม เญย ทิน-ฮู่ง * สัม หมั่ง เอ๊าะ เมี่ยน เญย เปย๊า,

เอ๊าะ เมี่ยน หฒุ ฒอย เหฌี่ย ปุน นิ่น หฒุ เหมียด.

¹³ หาย เต้า ฒด เจี๊ยน มน่อม ไม้ หมวัง เมี่ยน จ่ม เมี่ยน เห่ว เจี๊ยน โท้ เญย เฉีย,

นิ่น กั้น เห่ว เจี๊ยน โท้ เญย เฒี่ยง โห่ หย่า ไม้ ม่าย หาย เต้า เตา.

¹⁴ ปี๋ง เจี๊ยน ฝูง ฒี่ง เหญ่ย ไฮ่ ต๊น เจี๊ยน เฉีย เจี์ย เญย เจ๊า,

เป่ย เดี๊ย ฑุ์ย ญ่าน หฮมวัง * ไฮ่ เถง เธี้ยว เญย กะเฉีย ฟิว.

¹⁵ หาย หฒั่น โหฒว แป้ง ฟิม เญย เจ๊า, คู้ เมี่ยน ม่าย ออน-เหลาะ,

มป่า เอ๊าะ เมี่ยน หฒุ เหมียด.

¹⁶ หาย เต้า เล่ย ฆอย เปียะ เฮญี้ยว เญย เจ๊า,

ฯฒฯ เหธา ไต่ มี่ง เญย เมี่ยน กั๊บ ฒุ้น เยียม.

¹⁷ หาย เต้า ขูง ฮนั้ม เฌียน-โย่ว เญย เจ๊า,
ฒู้ง อ๋อย หฒุ จ่ม.

หาย เต้า อ๋อย ไห่ อะหงุ่น ติ๊ว เหธา กะลั้น โย่ว ไม้ ไฮ่ ปุ๊ด ฒ่อย.

¹⁸ เอ๊าะ เมี่ยน หฒุ โค้ว ตี๊ * คู้ เมี่ยน,

ไม้ เหฒียบ ฒัวะ เญย เมี่ยน หย่า หฒุ โค้ว ตี๊ เฮญี้ยว หฒีง เญย เมี่ยน.

¹⁹ เยียม เต่ย-ปูง-ฮวาง ฒู้ง เก้า หลง

เหธา แฑง จ๋า หละงบ เญย มเซียะ ตอน เยียม.

²⁰ ธง-เม่ง เมี่ยน เญย เปย๊า ม่าย จ๋าย เญย กะน้าย เหธา กะลั้น โย่ว,

มป่า เมี่ยน หฮงง เมี่ยน นะ เหฑ่ง นิ่น ม่าย เญย เหยียด ฒู้ง.

²¹ ฒิ่ม ล์อ โหฒว หอบ โหฒว หลง เญย เจ๊า เญย เมี่ยน

ตุ๊ แหม่ง เฒี่ยง หย่า ตุ๊ เมี่ยน ท่าย.

²² ธง-เม่ง เมี่ยน ญอง ฝาว เมี่ยน เฮ้น เมี่ยน เญย ฒี่ง หลาด,

หย่า ป่าย หว่าย เมี่ยน เขา ว้วน เญย ต๋อง.

²³ หาย เต้า โก๋ว กั้น เญย ฑุ่ย เหธา เบียด,

เปว ตุ๊ กั้น ไม้ หฒุ สี่.

²⁴ โหฒว เหมา, เธง-โฮล เญย เมี่ยน ตุ๊ บั๋ว เห่ว, ``กะน้าย-ฮว้วด.''

นิ่น ขูง โหฒว เหมา, เธง-โฮล ฮนั้ง.

²⁵ เมี่ยน เหลว่ย เมี่ยน เญย เฮญี้ยว อ๋อย เญย เซ ฮนั้ง ไต๋ นิ่น กั้น,

เหว่ย หฒุ นิ่น เญย ปั์ว ไม้ คั้ง โหฒว กง.

²⁶ นิ่น เฒี่ยง ฮนอย เม้า อ๋อย ตุ๊ กะน้าย,

มป่า คู้ เมี่ยน ปุน หย่า ไม้ ค้อ-ฟิ.

²⁷ เอ๊าะ เมี่ยน เหฒี่ย เญย กะน้าย เซ กั้ม เฑี้ย เญย,

นิ่น หล่ง เอ๊าะ เญย หฒะเอ๋ย ต้อ ต้าย ฒู้ง เก้า ฟัด โค้ว.

²⁸ โหฒว จ๊า ฒอง-เหฒง เญย เมี่ยน อ๋อย หฒุ เหมียด,

มป่า หมวัง เฒียน ฒอง-เหฒง เญย หว่า วั้ว เต้า, นิ่น เญย หว่า เหยียด ลิ์ว เยียม.

²⁹ เอ๊าะ เมี่ยน โหฒว เฮมียน โฮ์, ไม้ ฮิ้ว ตุ๊ ไญ้,

มป่า เฮญี้ยว หฒีง เญย เมี่ยน หลงๆ เญย ฮนั้ม เถา กั้น เญย เจ๊า.

³⁰ ไม้ ม่าย หาย หญู่ง ธง-เม่ง ไฟ ว่วน ฒาง ไฟ ธ่าง ล่าง เญย หว่า

ไฮ่ ฮี่ง เจี๋ย เฒี้ยว.

³¹ ม์า หลิ่ว เล์ย เหฒียง เหว่ย เบ๊าะ จ๋า เญย ฮนอย,

มป่า เซ เฒี้ยว ปุน ตุ๊ ฮี่ง.