ธง-เม่ง หว่า 19 (Proverbs 19)

ธง-เม่ง หว่า 19

¹ โหฒว ตุ๊ หฒีง เญย เมี่ยน จ่ม เมี่ยน

ฒู้ง เก้า หลง เมี่ยน หฮงง เมี่ยน * ก๊อง-แปะ.

² เมี่ยน ไม้ ม่าย ว่วน ฒาง เซ ไม้ เป๋น.

เฮญี้ยว เป๊ะ เญย เมี่ยน หย่า ไฮ่ โหฒว
ต่อง สี่. *

³ เมี่ยน หลาย กั้น หฮงง หฒุ ป่าย,

นิ่น เญย เฮญี้ยว เฉีย เจี์ย ไห่ เฒี้ยว.

⁴ ม่าย ฒิ่น ม่าย ญ่าน ฯฒฯ ม่าย ก๋อ-โย์ว ธั้ม,

มป่า ไม้ ม่าย ฒิ่น ญ่าน เญย เมี่ยน หฒุ ก๋อ-โย์ว กวั่ง.

⁵ โหฒว จ๊า ฒอง-เหฒง เญย เมี่ยน ซิ้ม ไม้ ดุ๊ด หฒุ ตี่ง ฒุ์ย.

ก๊อง-แปะ เญย เมี่ยน เซ้ด เมว์ย หย่า เปย๋า ไม้ ดุ๊ด.

⁶ เฮญี้ยว จั๊ง เญย เมี่ยน ม่าย เมี่ยน ธั้ม
โท้ นิ่น เถง.

ฝูง ฒี่ง เหญ่ย เญย เมี่ยน ตุ๊ เต้าๆ โหฒว นิ่น เญย ต่อย.

⁷ เมี่ยน จ่ม เมี่ยน เญย เหยียด ฒู้ง มั์ว-ต่อย โหยว นิ่น,

นิ่น เญย โล์-แกง เก้า ฟัด ซิ้ม.

นิ่น กัน เจี๊ยน นิ่น บัว หล่ง หว่า โท้

มป่า นิ่น บัว มี่ง หมี่ อ๊ะ.

⁸ ตุ๊ ธง-เม่ง เญย เมี่ยน ฮนั้ม กั้น,

โก๋ว เจี๊ยน ว่วน ฒาง เญย เมี่ยน อ๋อย ตุ๊ หลง.

⁹ โหฒว จ๊า ฒอง-เหฒง เญย เมี่ยน ซิ้ม ไม้ ดุ๊ด หฒุ ตี่ง ฒุ์ย,

ก๊อง-แปะ เญย เมี่ยน หย่า อ๋อย
หฒุ เหมียด.

¹⁰ เมี่ยน หฮงง เมี่ยน ฮนั้ง ปุ๊ด-ฒ่อย เมี่ยน เยียม เซ ไม้ ผุย,

โหฒว โน่ว เญย เมี่ยน กุ๊น โหฒว เฒี้ยว เญย เมี่ยน เก้า ฟัด ไม้ ผุย.

¹¹ ฮนั้ม ตุ๊ ทง เญย เมี่ยน ไม้ เฉีย เจี์ย เซี้ยบ,

กวั่ง ฆอย หฒุ เมี่ยน โหฒว ต่อง เญย เจ๊า เซ ปุน กั้น ตุ๊ เมี่ยน ท่าย.

¹² ฮู่ง เตี๋ย เฉีย เจี์ย เซ ฮนั้ง เซี่ยน ฌุ่น นอ,

มป่า นิ่น เญย เอน ฮนั้ง บยู่ง-ซุ้ย ผิน เมี้ย.

¹³ หฮงง เญย ฝุเจว๊ย ไฮ่ ปุน ต้ม เมี่ยน หฒุ ป่าย.

เอ๊า เหง แฑง จ๋า เซ ฮนั้ง บยู่ง ไม้ ตี้ง เลี่ยว เญย เดี๊ยบ เจี๊ยน เยียม.

¹⁴ เปย๊า เหธา ฒิ่น ฒ่อย เยียม เตีย หฑิบ ต้าย,

มป่า ไกว เญย เอ๊า เซ เฒี้ยว เหธย ปุน.

¹⁵ โหฒว เหลว่ย เญย เจ๊า ปุน เมี่ยน มฌ่อม
ตุ๊ โด.

ขูง อ๋อย เฮ่น เญย เมี่ยน อ๋อย หฒุ หง่อ.

¹⁶ กัน เล์ย-หลัด เญย เมี่ยน โก๋ว นิ่น เญย แหม่ง,

มป่า แหง่ง ทิน-ฮู่ง เญย โต์ วั้ว เต้า อ๋อย หฒุ ไต่.

¹⁷ หาย เต้า ค้อ-เลี่ยน เมี่ยน จ่ม เมี่ยน เซ ฮนั้ง ก๊า กะน้าย ปุน เฒี้ยว.

เหว่ย นิ่น โหฒว หลง เญย เจ๊า เฒี้ยว อ๋อย วิ่น ปุน นิ่น.

¹⁸ ต้ง ม่าย ลั่ม ฮนั้ม เญย เฒี่ยง โห่ อ๋อย หฒุ เบ๊าะ หฌาว เม่ย เญย ฝุเจว๊ย.

ไม้ ตู๋ง ตี่ง เซว่ย นิ่น หฒุ เหมียด.

¹⁹ กะเฉีย เป๊ะ เญย เมี่ยน อ๋อย หฒุ ตี่ง ฒุ์ย,

สี ก๊อง เม่ย เหฌียว นิ่น เม่ย ฒู้ง อ๋อย หฒุ แอ๋ง เหฌียว.

²⁰ อ๋อย หฒุ หมวัง เมี่ยน ขวิน, หมวัง เมี่ยน หฌาว,

เหว่ย ปุน เม่ย ฆะฮ้า ฮี้ง ไฮ่ ม่าย ธง-เม่ง.

²¹ เมี่ยน เญย เฮญี้ยว ต๊า หฒะเอ๋ย ธั้ม,

มป่า เฒี้ยว เญย หฒะเอ๋ย อ๋อย ตุ๊ เหลียบ เจี์ย.

²² เมี่ยน เก้า อ๋อย เจี๋ย เญย เซ ม่าย เฮญี้ยว เหฒียบ ฒัวะ เญย ฮนั้ม.

เมี่ยน จ่ม เมี่ยน หธ่อ เก้า หลง ก๊อง-แปะ เญย เมี่ยน.

²³ ท่าย เฒี้ยว ฯฒฯ ปุน เมี่ยน ตุ๊ แหม่ง เฒี่ยง,

ตุ๊ ต้าย เญย เมี่ยน ปวั๊ง เฮญี้ยว เญย ฮิด ขวน,

หย่า ไม้ หฒุ หาย หญู่ง ห่อย.

²⁴ เมี่ยน เหลว่ย เมี่ยน เญย ปั์ว ลม เปียะ
หฑ่อม,

ฒู้ง ไม้ คั้ง โป้ว ฝาว กั้น เญย ฑุ่ย.

²⁵ อ๋อย หฒุ เบ๊าะ ฮว้วด เญย เมี่ยน,

ไม้ ฮิ้ว หาย หญู่ง เญย เมี่ยน ฯฒฯ ไฮ่ โหะ ตุ๊ ไกว.

อ๋อย หฒุ ขวิน ไฮ่ เม่ง แปะ เญย เมี่ยน,

นิ่น ฯฒฯ ไฮ่ ม่าย ว่วน ฒาง.

²⁶ โหฒว โตะ นิ่น เญย เตีย หย่า หฒุ่น นิ่น เญย มา กวั่ง เญย เมี่ยน,

เซ หฒุ ไญ้, หฒุ เมี่ยน หมั่ง เผีย เญย ตอน.

²⁷ เยีย เญย ตอน อ่า, สี ก๊อง เม่ย กวั่ง, ไม้ หมวัง หฌาว เญย เจ๊า,

เม่ย ฯฒฯ เล่ย ฆอย ม่าย ว่วน ฒาง เญย หว่า.

²⁸ ไม้ ลั่ม หล่ง เญย ฒอง-เหฒง เมี่ยน จั๊ด แป้ง ฟิม เญย เจ๊า,

เอ๊าะ เมี่ยน เญย ฑุ่ย ขูง นะ โหฒว ต่อง เญย ฒุ์ย.

²⁹ ม่าย ตี่ง ฒุ์ย เญย เจ๊า หลิ่ว เล์ย เหฒียง เหว่ย ฮว้วด เญย เมี่ยน,

หย่า หลิ่ว เล์ย เหฒียง เบ๊าะ เมี่ยน หฮงง เมี่ยน เญย ติ ต์าน.