โย้บ 27 (Job 27)

โย้บ 27

โย้บ แหง่ง เจี๊ยน ก๊อง นิ่น ไม้ ต่อง

¹ โย้บ แอ๋ง เป๊าะ เจี๊ยน ก๊อง นิ่น เญย เจ๊า-โหล่ว. นิ่น ก๊อง,

² ``เยีย เฒี้ยง เจี๊ยน เหยียด ลิ์ว เฒี่ยง เญย ทิน-ฮู่ง,

ต้ง ไม้ ปุน เยีย ตุ๊ แป้ง ฟิม เญย เล์ย,

เซ เฒี้ยง เจี๊ยน เน่น เจี๋ย เญย ทิน-ฮู่ง,

ต้ง ปุน เยีย เฮญี้ยว มุน วั้ว เต้า, โฮ้ว หว่า,

³ ตะฟ่าน เยีย หธ่อ ม่าย เฉีย เท้า,

หย่า ม่าย ทิน-ฮู่ง เญย เฉีย เยียม เยีย เญย บะฒอง,

⁴ เยีย เญย ฑุ่ย เหมย ฒู้ง ไม้ ก๊อง จ๊า เญย หว่า,

เยีย เญย เบียด เหยียด ลิ์ว ไม้ ก๊อง-แปะ.

⁵ เยีย ด่ง หาย ฒู้ง ไม้ ก๊อง เม่ย บัว หอบ,

เถา เยีย ไต่ เยีย หธ่อ แหง่ง เจี๊ยน ก๊อง เยีย ไม้ โหฒว ต่อง.

⁶ เยีย แหง่ง เจี๊ยน ก๊อง เยีย โหฒว ตุ๊ หอบ,
ไม้ ปู๋ง กวั่ง.

ตะฟ่าน เยีย เยียม เสย หฒั่ง เญย ฮนอย-เหญียะ, เยีย เญย เฮญี้ยว ไม้ เฆ่ม เยีย กั้น.

โย้บ โท้ ทิน-ฮู่ง ตี่ง
เหธา โย้บ ต๋อย-เตก วั้ว เต๋ย เมี่ยน เญย ฒุ์ย

⁷ ``โท้ ปุน เยีย เญย วิน-วั้ง ฮนั้ง เอ๊าะ เมี่ยน นอ,

หย่า ปุน เหธา เยีย ต๋อย-เตก วั้ว เต๋ย ฮนั้ง ไม้ แป้ง ฟิม เญย เมี่ยน.

⁸ ไม้ ท่าย ทิน-ฮู่ง เญย เมี่ยน หฒุ ทิน-ฮู่ง ไพ กวั่ง,

เซ เฒาะ นิ่น เญย แหม่ง เญย เฒี่ยง โห่,

นิ่น ม่าย หาย หญู่ง ม่าย ลั่ม ฮนั้ม?

⁹ นิ่น หฒุ เหฒะ หน่าน เญย เฒี่ยง โห่,

ทิน-ฮู่ง อ๋อย หมวัง นิ่น โท้ เญย หว่า ไฟ?

¹⁰ นิ่น ฯฒฯ อะเฮน้ย เน่น เจี๋ย วั้ว เต้า ไฟ?

นิ่น อ๋อย หฒั่นๆ เห่ว ทิน-ฮู่ง ไฟ?

โย้บ ไฮ์ อ๋อย หฌาว
เหธา นิ่น ต๋อย-เตก วั้ว เต๋ย

¹¹ ``เยีย อ๋อย หฌาว เม่ย บัว ฮิ้ว ตุ๊ ทิน-ฮู่ง เญย ชะ ด่ง หาย โฮล, *

เน่น เจี๋ย วั้ว เต้า เญย หฒะเอ๋ย
เยีย หย่า ไม้ ปี๋ง.

¹² น้าย เม่ย บัว เหยียด ฒู้ง ปวัด เจี๋ย.

วั้ว หญู่ง เม่ย บัว เหว่ย หาย ติ่ว ก๊อง ธ้วด ไม้ ลั่ม หล่ง เญย หว่า?

ทิน-ฮู่ง ฮนั้ง หาย นอ
ตี่ง เอ๊าะ เมี่ยน เญย ฒุ์ย

¹³ ``น้าย เซ ทิน-ฮู่ง ปุน เอ๊าะ เมี่ยน ตุ๊ เญย ป่วน,

เซ เน่น เจี๋ย วั้ว เต้า ปุน เหฒย เมี่ยน วั้ว เต๋ย หฑิบ เญย ป่วน. *

¹⁴ ไม้ กุ๊น นิ่น เญย ฝุเจว๊ย หฮยาง ธั้ม, เซ เหว่ย ปุน หฒุ หฑุ ด๊าว ไต๋.

นิ่น เญย ฟุน-ฟะ หย่า เหยียด ลิ์ว ไม้ ตุ๊ หญั่น เป๊ว.

¹⁵ นิ่น เหฒ่ง เหฌี่ย เญย เมี่ยน ฒู้ง หฒุ ววน-แป่ง ไต่,

นิ่น บัว เญย เอ๊า-กว๊า หย่า ไม้ เญี้ยม.

¹⁶ ไม้ กุ๊น เอ๊าะ เมี่ยน หฒ่อน ญ่าน ดุย เจี๊ยน ฮนั้ง เนีย-บูง,

ม่าย ลุย-โหว ธั้ม ฒู้ง ฒุ ไม้ ฮี่ง, *

¹⁷ ไม้ กุ๊น นิ่น ดุย เจี๊ยน, มป่า คู้ เมี่ยน ตุ๊ ฒุ,

ไม้ โหฒว ต่อง เญย เมี่ยน ตุ๊ ปุน ฆอย นิ่น เญย ญ่าน.

¹⁸ เอ๊าะ เมี่ยน โหฒว เปย๊า ฮนั้ง แกง-หญ่อ บย์อง, *

ฮนั้ง เซี้ยว แกง เมี่ยน โหฒว เญย ลิ่ว.

¹⁹ นิ่น เปว๋ย เหฌี่ย เญย เฒี่ยง โห่ นิ่น ปุ๊ด ฒ่อย เญย, มป่า เจี๋ย มี่ง ไม้ ตุ๊ ฮนั้ง หน่าย, *

นิ่น หนูง ฆอย มฒีง, ไม้ ปวัด เหฑ่ง นิ่น เญย ฒิ่น ฒ่อย หมี่ อ๊ะ.

²⁰ นิ่น หฒุ กั้ม เหฑีย ไห่ เญย สี่ ฮนั้ง ววม เหยียม นอ.

ลู่ง ม์วน หฒั่น หฑยาว-หฒุ่น ฮล้อ นิ่น มี่ง หมี่ อ๊ะ.

²¹ ตง ปูง เญย หฑยาว ฮล้อ นิ่น มี่ง, นิ่น ฯฒฯ มี่ง หมี่ อ๊ะ.

หฑยาว กว๊าด นิ่น มี่ง เล่ย ฆอย นิ่น เญย ต๋อง.

²² หฑยาว * เฒาะ นิ่น ฒอย มี่ง หย่า ไม้ ค้อ-เลี่ยน.

นิ่น เหฌี่ย ชะ เปย๋า หฑยาว * เญย ชะ.

²³ เมี่ยน * ไบ๋ ปั์ว ฮ้าๆ เญย จั๊ด,

หฒุ่น นิ่น ธ้วด นิ่น เญย โล์-ต๋อง.