โย้บ 28 (Job 28)

โย้บ 28

ทิน-ฮู่ง ฮิ้ว ตุ๊ ธง-เม่ง เยียม หาย ต้าย

เว้ด เจียม ญ่าน เญย ต๋อง

¹ ``เฒียน อ๊ะ, ม่าย เว้ด ญ่าน เญย เธี้ยง,

หย่า ม่าย ต๋อง สิน เจียม.

² เฮลียะ เยียม เดา-เดี๊ย เว้ด ธ้วด ต้าย,

ต้ง หย่า เยียม หละเปย๊ย สิน ต้าย.

³ เมี่ยน ปุน หฮมวัง เญย ต๋อง ทิ้ว เป๋น ฌัง.

นิ่น บัว ฒิ่ม ล์อ เยียม โก เจี๋ย เญย ต๋อง,

เยียม มับ หฮมวัง เญย ต๋อง เว้ด ธ้วด หละเปย๊ย.

⁴ นิ่น บัว เยียม เล่ย เมี่ยน เญย ต๋อง โก เญย, เว้ด เดา-เดี๊ย เญย ค้วด,

เจี๋ย เจ๊า เญย เมี่ยน ฒู้ง ไม้ จั๋ง นิ่น บัว.

นิ่น บัว เล่ย ตุ๊ เมี่ยน โก,

เยียม ค้วด กะญั์ว นั้น เจี๊ยน ฮลาง เดี๋ยว มี่ง เดี๋ยว ต้าย.

⁵ เดา-เป้ย แอ๊ะ, ธ้วด ล่าง หฒิ,

มป่า เดา-เดี๊ย หลุ่น เหฑ่ง ฮนั้ง หฒุ โต์ว ปั๊ว นอ.

⁶ เดา-เดี๊ย เญย หละเปย๊ย ม่าย หละเปย๊ย-จ๋าย บั๊ว เญย, *

หละเปย๊ย กะญั์ว หย่า ม่าย เจียม-บ๊วน.

เหนาะ เหธา เฮยี่ย ฒ่อย ไม้ ฮิ้ว
วั้ว เต๋ย ค้วด เยียม หาย

⁷ ``วั้ว ติ้ว เจ๊า ไม้ ม่าย หาย นอม ต้ม จ๊าง ฮิ้ว,

ต้ม จ๊าง-ง่ง เญย มฒีง หย่า ไม้ ปวัด เจี๋ย.

⁸ เธี้ยว เญย เฮยี่ย ฒ่อย ไม้ ธ้าย เจี๋ย,

เซี่ยน หย่า ไม้ ยั่ง เจี๋ย วั้ว.

เมี่ยน ฮนั้ง หาย นอ เว้ด ค้วด ล์อ หละเปย๊ย-จ๋าย

⁹ ``เมี่ยน ซูง ปั์ว เบ๊าะ แหง่ง ไห่ เญย หละเปย๊ย,

เว้ด บง เหฌี่ย เถา กอน.

¹⁰ นิ่น เยียม หละเปย๊ย-แบ๋ง กะญั์ว เว้ด เจ๊า,

นิ่น เญย มฒีง ตุ๊ ปวัด หญู่งๆ จ๋าย เญย กะน้าย.

¹¹ นิ่น แฒะ เจี๊ยน ววม-ญ่วน, ไม้ ปุน ววม สาม ธ้วด,

ปุน ปี๋ง เจี๊ยน เญย กะน้าย ธ้วด ต้าย เยียม ฌัง.

ไม้ ม่าย หาย เต้า ฮิ้ว ตุ๊
ธง-เม่ง เญย กอน เยียม หาย

¹² ``มป่า ธง-เม่ง แอ๊ะ, อ๋อย หฒุ มี่ง หาย เดา ล์อ?

ว่วน ฒาง เญย ต๋อง เยียม หาย?

¹³ เมี่ยน ไม้ ฮิ้ว ตุ๊ ธง-เม่ง เญย จ๋า-ฒิ่น, *

เยียม ย่าง เกน ล์อ ไม้ ปวัด.

¹⁴ เดา-เดี๊ย เญย ววม ก๊อง, `ธง-เม่ง ไม้ เยียม เยีย กะญั์ว.'

ค้อย หย่า ก๊อง, `ธง-เม่ง ไม้ เหธา เยีย เยียม.'

ธง-เม่ง เก้า จ๋าย เจี๋ย
เหยียด ฒู้ง จ๋าย เญย กะน้าย

¹⁵ ``หล่ง เจียม ม์าย หย่า ไม้ ตุ๊,

หย่า ไม้ ไฮ่ เฑียง ญ่าน หฒี่ นิ่น เญย จ๋า-ฒิ่น.

¹⁶ โอ^ฟี เญย เจียม เหธา จ๋าย ไห่ เญย หละเปย๊ย-เจี๊ยะ แปะ

ไฟ บั๊ว เญย หละเปย๊ย-จ๋าย * หย่า ม์าย ไม้ ดุ๊ด,

¹⁷ เจียม เหธา จ๋าย เญย กี๋ง หย่า เป๊ย ไม้ เถา.

หย่า ไม้ ไฮ่ หล่ง เฒียน เจียม เญย จา-สี่ ม์าย ดุ๊ด.

¹⁸ เลี่ยม ไม้ หฒุ ก๊อง เถา เยียม ค้อย จ๋าย เญย หละเปย๊ย ไฟ ฑัง เจี๋ย เญย กี๋ง,

ธง-เม่ง เญย จ๋า-ฒิ่น เซ เก้า จ๋าย เจี๋ย จ๋าย เญย หละเปย๊ย-โฒว. *

¹⁹ เอ^ที^โอ^เปีย ยั่ง อู๊ง เญย หละเปย๊ย-จ๋าย หย่า ไม้ ไฮ่ เป๊ย ไม้ เถา,

เฒียน เจียม เญย จ๋า-ฒิ่น หย่า เป๊ย ไม้ หฒ่าย อ๊ะ.

²⁰ วั้ว หญู่ง ธง-เม่ง เยียม หาย ต้าย?

ว่วน ฒาง เญย ต๋อง เยียม หาย?

²¹ ธง-เม่ง เซ ปี๋ง เจี๊ยน เหยียด ฒู้ง ม่าย แหม่ง เญย กะน้าย เญย มฒีง,

หย่า เกม เจี๊ยน เยียม ด๊าม-ลู่ง เญย เหนาะ.

²² หฒุ เหมียด เญย ต๋อง เหธา เยี่ยม เกน ก๊อง, *

`เยีย บัว เญย มน่อม ไฮ์ เต๋ย หว่า-หฑยาว ก๊อง เถา ธง-เม่ง.'

ขูง ทิน-ฮู่ง ฮิ้ว ตุ๊ ธง-เม่ง เญย เจ๊า

²³ ``ทิน-ฮู่ง เม่ง แปะ ล์อ ธง-เม่ง วั้ว ติ้ว เจ๊า,

หย่า ฮิ้ว ตุ๊ ธง-เม่ง เยียม เญย ต๋อง.

²⁴ เหว่ย หฒุ นิ่น หมั่ง เถา จ่ม เดา-เป้ย,

หย่า ปวัด เยียม ลู่ง เดี๊ย เญย หญู่งๆ.

²⁵ ทิน-ฮู่ง ปุน หฑยาว ม่าย เฮนี้ย-ต้าว วั้ว หฒั่น,

หย่า หล่ง กะน้าย ฮลาว ววม,

²⁶ นิ่น พ้าย เหฒียง บยู่ง เญย โสว โหม่ว,

หย่า ตี่ง บะหลี่ง โต์ว เญย เจ๊า,

²⁷ วั้ว หฒั่น นิ่น ปวัด ธง-เม่ง หย่า ก๊อง เซ หลง เญย.

นิ่น เหลียบ เจี์ย หย่า ฒ่า หมั่ง.

²⁸ ทิน-ฮู่ง ก๊อง บั๋ว เมี่ยน,

`อ๋อย หฒุ ท่าย เฒี้ยว, น้าย เซ ธง-เม่ง.

หย่า อ๋อย หฒุ กวั่ง เอ๊าะ สี่, น้าย เซ ว่วน ฒาง.''' *