โย้บ 19 (Job 19)

โย้บ 19

โย้บ เตา

โย้บ เฆ่ม นิ่น เญย ต่อย โหฒว เหมา

¹ โย้บ ฯฒฯ เตา,

² ``เม่ย บัว อ๋อย โหฒว ปุน เยีย เญย เฮญี้ยว โค้ว,

หย่า หล่ง หว่า หม่อ เยีย ด่ง หาย เล่า?

³ เม่ย บัว ก๊อง โตะ เยีย
ไม้ เฒ้ย เหฒียบ หฑุ่น อ๊ะ.

เม่ย บัว ต่อง เยีย,
เม่ย บัว ไม้ ไญ้ ไฟ?

⁴ สี ก๊อง เยีย หฒะเก้ง โหฒว ต่อง,

เยีย โหฒว ต่อง เญย ขูง ด๊อด หฒุ เยีย กั้น ฮนั้ง.

⁵ สี ก๊อง เม่ย บัว เธง เม่ย บัว กั้น เก้า โฮล เยีย,

หย่า ฝุน เยีย ปวั้ง เญย โค้ว หน่าน ปุน ธีง เยีย โหฒว ต่อง,

⁶ วั้ว หญู่ง เม่ย บัว อ๋อย หฒุ ฮิ้ว ตุ๊ เซ ทิน-ฮู่ง ฮนั้ง น้าย โหฒว ปุน เยีย,

หย่า หล่ง นิ่น เญย มู์ง เหฑ่น เจี๊ยน เยีย.

โย้บ ก๊อง ทิน-ฮู่ง ห่อย นิ่น
ฮนั้ง นิ่น เป๋น วิน-วั้ง นอ

⁷ ``เยีย เห่ว เจี๊ยน ก๊อง, `หฒุ โหฒว โตะ อ๊า โล่ะ!' หย่า ไม้ ม่าย หาย เต้า เตา.

เยีย เห่ว เจี๊ยน โท้ เถง, มป่า ไม้ ตุ๊ แป้ง ฟิม เญย เจ๊า.

⁸ ทิน-ฮู่ง ตั๊ง เจี๊ยน เยีย เญย เจ๊า เยีย ฯฒฯ เจี๋ย ไม้ ตุ๊.

นิ่น หย่า ปุน เยีย เญย เจ๊า หฮมวัง มี่ง.

⁹ นิ่น เฒาะ ฆอย เยีย เญย ฌัง-หล่าง,

หย่า เฒาะ ฆอย เยีย ด๋ง เญย นี้ง.

¹⁰ นิ่น เว่ย เจี๊ยน เยีย เปยย ปูง เบ๊าะ เยีย,

เยีย ฯฒฯ ป่าย เหฑ่ง หมี่ อ๊ะ.

เยีย ม่าย ลั่ม ฮนั้ม เญย,

นิ่น แปง ธ้วด ฮนั้ง แปง ติ้ว เดี๋ยง นอ.

¹¹ นิ่น เฉีย เจี์ย, โน์ว ไห่ เยีย,

หย่า ฝุน เยีย เป๋น นิ่น เญย วิน-วั้ง.

¹² นิ่น เญย จุน-แปง กวั้น ล่ม ฑ่อย ต้าย.

นิ่น บัว หลิ่ว เล์ย เจ๊า เบ๊าะ เยีย,

หย่า เหลียบ เธี้ยง เว่ย ก๋อม เยีย.

โย้บ โท้ โล์-แกง ต่อย ค้อ-เลี่ยน

¹³ ทิน-ฮู่ง ปุน เยีย เญย ก๋อ-โย์ว กวั่ง เยีย,

ต้ง เยีย หฒัวะ เญย เมี่ยน ไม้ แล์ง เยีย อ๊ะ.

¹⁴ เยีย เญย เธียน-เธะ เล่ย ฆอย เยีย,

เยีย เญย โล์-แกง ต่อย หละคุ เยีย หมี่ อ๊ะ.

¹⁵ เยียม เยีย เญย เปย๊า เญย แคะ เมี่ยน เหธา มเซียะ โปว ฝุน เยีย โหฒว กะเหญี่ย เญย เมี่ยน.

หฒิว นิ่น บัว เญย มฒีง หมั่ง, เยีย ฒู้ง เป๋น กั้น ฝีง เมี่ยน.

¹⁶ เยีย เห่ว เยีย เญย โปว มป่า นิ่น ไม้ เตา,

เยีย อ๋อย หฒุ หล่ง ฑุ่ย โจ้ว นิ่น บัว.

¹⁷ เยีย เญย เอ๊า โหยว เยีย เญย ฑุ่ย เญย เฉีย.

เยีย กั้น เญย เธียน ก๋อ เธียน โย์ว * กั้ม เฑี้ย เยีย.

¹⁸ เลี่ยม ไฝ เญย ฝุเจว๊ย หมั่ง เผีย เยีย.

เยีย เจี์ย ซิน นิ่น บัว ก๊อง เยีย.

¹⁹ เยีย หฒัวะ เจี๋ย เญย เหยียด ฒู้ง โล์-แกง ต่อย โหยว เยีย,

ต้ง เยีย ฮนั้ม เญย เมี่ยน หย่า เบี๊ยน เฮมียน ปุน เยีย.

²⁰ เยีย เญย ด๊บ แน้ด เจี๊ยน บู๊ง,

เยีย เปย๋า ธ้วด สีง แหม่ง ด่ง เหยียด นอม เฮม้ย-เน้า. *

²¹ ``โล์-แกง อ้า! ค้อ-เลี่ยน เยีย ม่าะ! โท้ ค้อ-เลี่ยน เยีย,

เหว่ย หฒุ ทิน-ฮู่ง เญย ปั์ว เบ๊าะ เยีย.

²² เม่ย บัว เหว่ย หาย ติ่ว อ๋อย ห่อย เยีย ฮนั้ง ทิน-ฮู่ง ห่อย?

เม่ย บัว หธ่อ โหฒว โตะ ปุน เยีย ไม้ แก้ง เก๋า?

โย้บ ม่าย ลั่ม ฮนั้ม ม่าย เต้า ไฮ่ หฒัวะ นิ่น

²³ ``เฝย ตุ๊ เยีย ก๊อง เญย หว่า ตุ๊ เฟี้ย เจี๊ยน,

เฝย ตุ๊ ฝาว เจี๊ยน เยียม โซว-ตาน.

²⁴ เฝย ตุ๊ หล่ง เฮลียะ-จา-สี่ หฒุ หละเปย๊ย,

แอ๋ง หล่ง จู์ง โต๋ หฒุ ลิ์ว เญย ต๋อง, ปุน เหยียด ลิ์ว เยียม.

²⁵ เหว่ย หฒุ เยีย ฮิ้ว ตุ๊ หฒัวะ เยีย วั้ว เต้า เฒี่ยง เจี๊ยน,

เซ้ด เมว์ย นิ่น อ๋อย ต้าย โซ้ว เจี๊ยน เดา-เป้ย. * ไฟ เนีย-บูง.

²⁶ ฒั้ว เยีย ด๊บ ฮู้ เหฑ่ง,

เยียม เยีย เญย อ๊อ ซิน * เยีย ฒู้ง ตุ๊ ปวัด ทิน-ฮู่ง. *

²⁷ เยีย กั้น ตุ๊ ปวัด นิ่น,

เยีย กั้น เญย มฒีง ตุ๊ หมั่ง นิ่น, หย่า ไม้ เฒ์ย กั้น เต้า.

เยีย เญย เฮญี้ยว เมา โค้ว ไห่.

²⁸ ``สี ก๊อง เม่ย บัว ก๊อง,
`เยีย บัว ฮนั้ง หาย นอ ไฮ่ ห่อย นิ่น?'

หย่า ก๊อง, `ธัวะ สี่ เญย กอน-แป๋ง เยียม นิ่น กั้น,'

²⁹ เม่ย บัว อ๋อย หฒุ กั้ม เหฑีย หฑุ ด๊าว,

เหว่ย หฒุ ทิน-ฮู่ง เฉีย เจี์ย, นิ่น หล่ง หฑุ ด๊าว ตี่ง ฒุ์ย.

เม่ย บัว ฯฒฯ ฮิ้ว ตุ๊ ม่าย เต้า เซี้ยม ฒุ์ย.''