Singx Nzung 96

Zoux Hlo Jiex Nyei Hungh Diex

(Beiv mangc 1 Zunh Doic Douh 16:23-33 )

• ¹ Oix zuqc baaux diuh siang-nzung bun Ziouv.
• Lungh ndiev oix zuqc baaux nzung bun Ziouv.
• ² Baaux nzung bun Ziouv, baaux ceng ninh nyei mengh,
• hnoi-hnoi zunh yaangh ninh nyei njoux en.
• ³ Yiem maanc guoqv zunh yaangh ninh nyei njang-laangc.
• Yiem maanc fingx mbu'ndongx gorngv ninh zoux mbuoqc horngh nyei sic.
• ⁴ Weic zuqc Ziouv se hlo haic, horpc zuqc camv-camv nyei ceng,
• oix zuqc taaih ninh gauh camv maanc zienh.
• ⁵ Weic zuqc zuangx fingx nyei yietc zungv zienh benx miuc-fangx hnangv,
• mv baac Ziouv zeix lungh.
• ⁶ Maaih njang-laangc caux haangh daauh yiem ninh nyei nza'hmien,
• yiem ninh nyei singx dinc bun cing ninh maaih qaqv yaac nzueic haic.
• ⁷ O maanc fingx mienh aah! Oix zuqc ceng Ziouv.
• Oix zuqc ceng Ziouv nyei njang-laangc caux qaqv. * Singx Nzung 29:1-2
• ⁸ Oix zuqc ceng Ziouv puix ninh njang-laangc nyei mbuox,
• dorh fongc horc nyei ga'naaiv daaih bieqc ninh nyei singx dinc nyei laatc gu'nyuoz.
• ⁹ Zaangc Ziouv nyei ziangh hoc oix zuqc zuqv cing-nzengc nyei lui-houx.
• Lungh ndiev mienh aah! Oix zuqc sin zinx jienv yiem Ziouv nyei nza'hmien.
• ¹⁰ Yiem maanc guoqv mbu'ndongx oix zuqc gorngv, “Ziouv zoux hungh.”
• Baamh gen liepc duqv wuonv, maiv maaih haaix nyungc haih ndanc duqv dongz.
• Ninh yaac oix baengh fim nyei siemv maanc fingx.
• ¹¹ Lungh aah! Oix zuqc njien-youh. Ndau aah! Oix zuqc orn-lorqc.
• Koiv caux yiem koiv nyei yietc zungv ga'naaiv oix zuqc zoz-zoz nyei mbui.
• ¹² Lingh deic caux yiem lingh deic gu'nyuoz nyei yietc zungv ga'naaiv, oix zuqc njien-youh a'hneiv.
• Wuov zanc lomc zaangc nyei yietc zungv ndiangx ziouc njien-youh nyei baaux nzung,
• ¹³ yiem Ziouv nyei nza'hmien,
• weic zuqc ninh oix daaih siemv lungh ndiev.
• Ninh oix baengh fim nyei siemv baamh gen,
• yaac longc ninh nyei zien leiz siemv maanc fingx.