Singx Nzung 62 (Psalms 62)

Singx Nzung 62

Singx Nzung 62

Kungx Tin-Hungh Ganh Haih Zoux
Mbuo Ndaauh Kaux Nyei Dorngx

Jiu bun dorh nzung nyei mienh.
Ziux Ye^ndu^tun. * Beiv mangc 1 Zunh Doic Douh 16:41 .
Ndaawitv zoc nyei singx nzung.

¹ Yie nyei hnyouv sekv nzieqc nyei
zuov Tin-Hungh ganh nduqc dauh hnangv.

Yie nyei njoux en yiem ninh daaih.

² Kungx ninh ganh zoux yie nyei La'bieiv

yaac zoux yie nyei Njoux En.

Ninh se yie wuonv nyei dorngx,

yie maiv zuqc ndanc dongz.

³ Meih mbuo zuangx mienh oix mborqv

oix baaic waaic yietc laanh mienh ndongc haaix lauh?

Ninh hnangv zingh laatc laih mingh,

yaac hnangv laatc nor tong huv nzengc.

⁴ Ninh mbuo daav za'eix oix tuix ninh nyei baaih njiec.

Ninh mbuo a'hneiv gorngv-baeqc.

Ninh mbuo nyei nzuih gorngv buang nyei waac

mv baac hnyouv gu'nyuoz kungx zioux hnangv. Selaa

⁵ Yie nyei hnyouv sekv nzieqc nyei zuov Tin-Hungh ganh nduqc dauh hnangv,

weic zuqc se ninh bun yie maaih lamh hnamv dorngx.

⁶ Kungx ninh ganh zoux yie nyei la'bieiv yaac zoux yie nyei njoux en.

Ninh se yie wuonv nyei dorngx, yie maiv zuqc ndanc dongz.

⁷ Tin-Hungh se yie nyei njoux en caux yie nyei njang-laangc.

Tin-Hungh yaac zoux yie henv haic nyei la'bieiv, zoux ndaauh kaux nyei dorngx.

⁸ O meih mbuo zuangx baeqc fingx aah! Oix zuqc zanc-zanc kaux Tin-Hungh.

Zorqv ganh nyei hnyouv yietc zungv mbuox Ninh.

Ninh zoux yie mbuo ndaauh kaux nyei dorngx. Selaa

⁹ Haac horngh mienh beiv tauv yietc nzunc qiex.

Zaangc horngh mienh yaac kungx jaav nyei hnangv.

Longc tin-baengh dangv nziang ninh mbuo

yaac maiv maaih hniev-daauh.

I nyungc gapv daaih gauh heng tauv yietc nzunc nyei qiex.

¹⁰ Maiv dungx bangc niouv mienh nyei sic weic duqv nyaanh,

yaac maiv dungx hnamv kaux caangv daaih nyei ga'naaiv.

Se gorngv butv zoih camv jienv faaux

yaac maiv dungx bungx hnyouv.

¹¹ Tin-Hungh gorngv nzunc,

yie duqv haiz i nzunc,

se domh qaqv benx Tin-Hungh nyei.

¹² O Ziouv aah! Se dongh meih ziepc zuoqv nyei hnamv mienh.

Weic zuqc meih ziux gorqv-mienh zoux nyei

winh zingh nyeic bun mienh. *