Singx Nzung 119

Ziouv Nyei Leiz-Latc Se Longx Haic

Aa^lepv * Se Hipv^lu waac nyei nzaangc-maac nyei daauh norm nzaangc nyei mbuox. Naaiv diuh nzung longc Hipv^lu waac nyei yietc norm jiex yietc norm nzaangc-maac zoux yietc douc yietc douc nyei nzaangc-gorn. Douc-douc nyei yiemc yaac longc wuov douc nyei nzaangc-maac.

• ¹ Da'faanh ninh mbuo zoux nyei jauv maiv maaih dorngx nqemh,
• se gan Ziouv nyei leiz-latc yangh wuov deix, maaih orn-lorqc.
• ² Gan longx ninh gorngv nyei waac,
• se longc nzengc hnyouv lorz ninh wuov deix, maaih orn-lorqc.
• ³ Naaiv nyungc mienh maiv zoux dorngc haaix nyungc,
• ninh mbuo kungx yangh Ziouv nyei jauv hnangv.
• ⁴ Meih zorqv meih hatc nyei waac
• paaiv bun yie mbuo jienh ei jienv zoux.
• ⁵ Tov bun yie nyei jauv wuonv,
• haih gan longx meih nyei leiz-nyeic.
• ⁶ Yie nyei m'zing mangc jienv meih nyei yietc zungv lingc,
• yie ziouc maiv zuqc nyaiv.
• ⁷ Yie hoqc liuz meih baengh fim nyei leiz,
• yie ziouc longc cing-nzengc hnyouv ceng meih.
• ⁸ Yie oix gan meih nyei leiz-nyeic.
• Tov yietc liuz maiv dungx guangc ziangh yie.

Oix Zuqc Muangx
Ziouv Nyei Leiz-Latc

Mbetc

• ⁹ Houh saeng mienh oix zuqc hnangv haaix nor goux duqv ninh ganh nyei jauv cing-nzengc?
• Se oix zuqc ei jienv meih nyei waac zoux.
• ¹⁰ Yie longc nzengc hnyouv lorz meih.
• Tov bun yie maiv dungx leih nqoi meih nyei lingc.
• ¹¹ Yie zorqv meih nyei waac zaangh jienv yie nyei hnyouv,
• weic bun yie maiv baamz zuiz dorngc meih.
• ¹² O Ziouv aac, yie ceng meih.
• Tov njaaux meih nyei leiz-nyeic yie.
• ¹³ Yie oix longc yie nyei nzuih meix zunh yaangh
• meih nyei nzuih gorngv nyei yietc zungv leiz.
• ¹⁴ Yie a'hneiv meih gorngv nyei waac
• ndongc a'hneiv yietc zungv zinh zoih.
• ¹⁵ Yie oix fei-fangv meih hatc nyei waac
• yaac mangc dingc meih nyei jauv-louc.
• ¹⁶ Yie a'hneiv meih nyei leiz-nyeic,
• yie maiv haih la'kuqv meih nyei waac.

Gan Ziouv Nyei Leiz Duqv Orn-Lorqc

Nqi^men

• ¹⁷ Tov zoux longx bun meih nyei bou,
• weic bun yie duqv ziangh jienv yaac gan meih nyei waac.
• ¹⁸ Tov bun yie nyei m'zing mangc duqv cuotv
• yiem meih nyei leiz-latc mbuoqc horngh nyei sic.
• ¹⁹ Yie yiem lungh ndiev zoux dingh zepv dangh baav nyei mienh,
• tov maiv dungx zorqv meih nyei lingc bingx yie.
• ²⁰ Yie gengh! jorm hnyouv zanc-zanc jangx meih nyei leiz,
• taux mba'nziu zungv oix mbaaix nyei.
• ²¹ Meih hemx ceng ganh hlo, se zuqc zioux nyei mienh,
• dongh yangh pien, leih meih nyei lingc wuov deix.
• ²² Tov zorqv guangc yie zuqc nyaiv zuqc mienh mangc piex nyei sic,
• weic zuqc yie gan longx meih nyei waac.
• ²³ Maiv gunv zoux hlo nyei mienh zueiz jienv caangh laangh hoic yie,
• meih nyei bou fei-fangv meih nyei leiz-nyeic.
• ²⁴ Meih njaaux nyei yietc zungv waac bun yie a'hneiv,
• yaac zoux yie caangh laangh nyei mienh.

Liepc Eix Gan Ziouv Nyei Leiz-Latc

Ndaa^letv

• ²⁵ Yie nyei maengc se hnangv zuqc njiec taux nie-mbung.
• Tov ziux meih nyei waac tengx yie nyei maengc aengx fingv jiez daaih.
• ²⁶ Yie gorngv yie zoux nyei jauv,
  meih yaac dau yie.
• Tov zorqv meih nyei leiz-nyeic njaaux yie.
• ²⁷ Tov meih tengx yie mengh baeqc meih hatc nyei waac,
• yie ziouc fei-fangv meih zoux nyei mbuoqc horngh sic.
• ²⁸ Yie nyei hnyouv nzauh duqv kouv hnangv yuqc nzengc nor,
• tov ziux meih nyei waac tengx yie henv jiez daaih.
• ²⁹ Tov meih bun yie leih nqoi jaav nyei jauv
• yaac nqoi eix njaaux meih nyei leiz-latc yie.
• ³⁰ Yie ginv ziepc zuoqv nyei jauv yangh.
• Yie zorqv meih nyei leiz an jienv yie nyei nza'hmien.
• ³¹ O Ziouv aac, yie kaux wuonv meih njaaux nyei waac,
• tov maiv dungx bun yie zuqc nyaiv.
• ³² Yie oix tiux gan jienv meih nyei lingc nyei jauv,
• weic zuqc meih bun yie bieqc hnyouv camv jienv faaux.

Daux Gaux Tov Tengx Bieqc Hnyouv

He

• ³³ O Ziouv aac, tov njaaux yie gan meih nyei leiz-nyeic,
• yie ziouc gan meih taux daauh taux mueiz.
• ³⁴ Tov bun yie mengh baeqc weic bun yie haih gan meih nyei leiz-latc,
• yaac longc nzengc hnyouv ei jienv zoux.
• ³⁵ Tov dorh yie gan meih nyei lingc nyei jauv,
• weic zuqc naaiv diuh jauv yie a'hneiv haic.
• ³⁶ Tov bun yie maaih hnyouv oix longc meih njaaux nyei waac,
• maiv zeiz kungx douh leic zinh.
• ³⁷ Tov maiv dungx bun yie huin mangc maiv lamh longc nyei sic.
• Tov bun yie yiem meih nyei jauv duqv ziangh maengc.
• ³⁸ Tov meih ei jienv meih laengz nyei waac zoux weic yie, meih nyei bou,
• se weic taaih meih wuov deix laengz nyei waac.
• ³⁹ Tov tengx yie leih nqoi gamh nziex zuqc nyaiv nyei sic,
• weic zuqc meih nyei leiz se longx haic.
• ⁴⁰ Yie ngorc meih hatc nyei waac.
• Weic zuqc meih baengh fim nyei, tov bun yie duqv ziangh jienv.

Kaux Ziouv Nyei Leiz-Latc

Waau

• ⁴¹ O Ziouv aac, tov bun cing meih ziepc zuoqv nyei hnamv yie,
• tov ziux meih laengz nyei waac njoux yie.
• ⁴² Yie ziouc maaih waac dau huotv yie wuov deix mienh,
• weic zuqc yie kaux meih nyei waac.
• ⁴³ Tov meih maiv dungx zorqv zien leiz nyei waac cuotv nzengc yie nyei nzuih, * Fai “Tov bun yie zanc-zanc haih gorngv zien leiz nyei waac”.
• weic zuqc meih nyei leiz bun yie maaih lamh hnamv dorngx.
• ⁴⁴ Yie oix zanc-zanc ei jienv meih nyei leiz-latc
• taux yietc liuz yietc seix.
• ⁴⁵ Yie ziouc yangh bungx nqoi nyei jauv,
• weic zuqc yie ei jienv * Hipv^lu waac gorngv lorz. meih hatc nyei waac.
• ⁴⁶ Yie oix yiem hungh diex nyei nza'hmien gorngv meih hatc nyei waac,
• yie zungv maiv zuqc nyaiv,
• ⁴⁷ weic zuqc yie a'hneiv meih nyei lingc,
• se dongh yie hnamv nyei.
• ⁴⁸ Yie taaih meih nyei lingc,
• se dongh yie hnamv nyei,
• yie yaac fei-fangv meih nyei leiz-nyeic.

Leiz-Latc Se Kaux Duqv Wuonv Nyei

Zaa^yin

• ⁴⁹ Jangx jienv meih caux meih nyei bou laengz nyei waac,
• weic zuqc meih nyei waac bun yie maaih lamh hnamv dorngx.
• ⁵⁰ Meih laengz nyei waac bun yie maaih maengc ziangh,
• yie zuqc naanc zingh nyei ziangh hoc ziouc orn yie nyei hnyouv.
• ⁵¹ Zoux maux nyei mienh maiv dingh liouh nyei huotv yie,
• mv baac yie maiv leih nqoi meih nyei leiz-latc.
• ⁵² O Ziouv aac, yie jangx duqv meih loz-hnoi bun daaih nyei leiz,
• ziouc orn yie nyei hnyouv.
• ⁵³ Yie buatc mienh waaic mienh guangc meih nyei leiz-latc,
• yie qiex jiez haic hnangv oix njopc douz nor.
• ⁵⁴ Yie yiem lungh ndiev dingh zepv nyei dorngx,
• meih nyei leiz-nyeic benx yie nyei nzung.
• ⁵⁵ O Ziouv aac, yie lungh muonz zanc jangx meih nyei mengh,
• yaac ei jienv meih nyei leiz-latc.
• ⁵⁶ Yie ei jienv meih hatc nyei waac zoux.
• Naaiv se yie nyei orn-lorqc.

Jorm Hnyouv Muangx
Ziouv Nyei Leiz-Latc

Hetc

• ⁵⁷ Ziouv benx yie nyei buonc,
• yie laengz ei jienv meih nyei waac.
• ⁵⁸ Yie longc nzengc hnyouv tov meih
• ziux meih laengz nyei waac korv-lienh yie.
• ⁵⁹ Yie hnamv taux yie yangh nyei diuc-diuc jauv,
• yie ziouc huin nzuonx daaih lorz meih njaaux nyei yietc zungv waac.
• ⁶⁰ Yie siepv-siepv nyei gan meih nyei lingc,
• zungv maiv ngaih.
• ⁶¹ Maiv gunv orqv mienh zaeng hlaang ndoh yie,
• yie zungv maiv la'kuqv meih nyei leiz-latc.
• ⁶² Ndaamv muonz yie jiez sin daaih ceng meih,
• weic meih baengh fim nyei leiz.
• ⁶³ Da'faanh taaih meih, ei jienv meih hatc nyei waac zoux wuov deix,
• yie caux ninh mbuo zoux doic.
• ⁶⁴ O Ziouv aac, meih ziepc zuoqv nyei hnamv lungh ndiev mienh,
• tov njaaux meih nyei leiz-nyeic yie.

Ziouv Nyei Leiz-Latc Maaih Jaax-Zinh

Tetc

• ⁶⁵ O Ziouv aac, meih ziux meih nyei waac
• zoux longx bun meih nyei bou.
• ⁶⁶ Tov ceix bun yie maaih cong-mengh caux wuonh zaang,
• weic zuqc yie sienx meih nyei lingc.
• ⁶⁷ Yie maiv gaengh zuqc kouv wuov zanc, yie baamz zuiz zoux dorngc,
• mv baac ih zanc yie ei jienv meih nyei waac.
• ⁶⁸ Meih se longx, meih zoux nyei yaac zoux longx,
• tov njaaux meih nyei leiz-nyeic yie.
• ⁶⁹ Zoux maux nyei mienh gorngv-baeqc hoic yie,
• mv baac yie longc nzengc hnyouv gan meih hatc nyei waac.
• ⁷⁰ Ninh mbuo nyei hnyouv hngongx, * Hipv^lu waac gorngv hoz hnangv hmei nor.
• mv baac yie a'hneiv meih nyei leiz-latc.
• ⁷¹ Yie zuqc kouv se longx nyei,
• weic bun yie hoqc linc meih nyei leiz-nyeic.
• ⁷² Meih nyei nzuih gorngv cuotv nyei leiz-latc
• weic yie gauh maaih lamh longc jiex cin-cin waanc-waanc jiem nyaanh.

Ziouv Nyei Leiz-Latc
Se Baengh Fim Nyei

Yotv

• ⁷³ Meih nyei buoz zeix yie daaih aengx liepc yie,
• tov bun yie bieqc hnyouv weic bun yie duqv hoqc linc meih nyei lingc.
• ⁷⁴ Taaih meih wuov deix mienh buatc yie ziouc a'hneiv haic,
• weic zuqc yie kaux meih nyei waac maaih lamh hnamv dorngx.
• ⁷⁵ O Ziouv aac, yie hiuv duqv meih siemv nyei waac se baengh fim nyei,
• yaac hiuv duqv yie zuqc siouc kouv se meih ziepc zuoqv nyei zoux.
• ⁷⁶ Tov ziux meih laengz bun meih nyei bou nyei waac
• longc meih ziepc zuoqv hnamv mienh nyei hnyouv orn yie nyei hnyouv.
• ⁷⁷ Tov meih korv-lienh yie, bun yie duqv ziangh jienv,
• weic zuqc meih nyei leiz-latc bun yie a'hneiv.
• ⁷⁸ Tov bun ceng-hlo nyei mienh zuqc nyaiv,
• weic zuqc ninh mbuo maiv longc leiz nyei hoic yie.
• Mv baac yie ganh aeqv, yie fei-fangv meih hatc nyei waac.
• ⁷⁹ Tov bun taaih meih wuov deix huin nzuonx daaih lorz yie,
• weic bun ninh mbuo hiuv duqv meih nyei waac.
• ⁸⁰ Tov bun yie nyei hnyouv ei jienv meih nyei leiz-nyeic yaac maiv maaih dorngx nqemh,
• weic bun yie maiv zuqc nyaiv.

Daux Gaux Tov Ziouv Njoux

Kapv

• ⁸¹ Yie nyei hnyouv za'gengh zuov jienv oix duqv meih nyei njoux en,
• yie kaux meih nyei waac maaih lamh hnamv dorngx.
• ⁸² Yie zuov gau meih ei meih laengz nyei waac zoux, m'zing zungv mbuov mi'aqv.
• Yie naaic gaax, “Meih haaix zanc cingx orn yie nyei hnyouv?”
• ⁸³ Yie se hnangv norm dapv a'ngunc diuv nyei ndopv-mbuoqc
  kangx jienv douz-sioux gu'nguaaic,
• mv baac yie maiv la'kuqv meih nyei leiz-nyeic.
• ⁸⁴ Meih nyei bou oix zuqc diev ndongc haaix lauh? * Hipv^lu waac gorngv “Meih nyei bou nyei hnoi-nyieqc maaih ndongc haaix lauh?”
• Meih taux haaix zanc cingx siemv hoic yie wuov deix mienh nyei zuiz?
• ⁸⁵ Zoux maux, maiv ei meih nyei leiz-latc nyei mienh,
• wetv kuotv oix hoic yie ndortv.
• ⁸⁶ Meih nyei yietc zungv lingc kaux duqv wuonv nyei.
• Ninh mbuo gorngv-baeqc hoic yie, tov tengx yie.
• ⁸⁷ Ninh mbuo kaav deix mietc yie, bun yie maiv maaih maengc yiem lungh ndiev,
• mv baac yie maiv guangc meih hatc nyei waac.
• ⁸⁸ Meih ziepc zuoqv nyei hnamv mienh ziouc tov siex cuotv yie nyei maengc
• weic bun yie haih ei jienv meih nyei nzuih gorngv nyei waac.

Sienx Ziouv Nyei Leiz-Latc

Laa^metv

• ⁸⁹ O Ziouv aac, meih nyei waac yiem lungh gu'nguaaic
• liepc wuonv taux yietc liuz.
• ⁹⁰ Doic jiex doic meih se ziepc zuoqv nyei.
• Meih liepc baamh gen daaih, baamh gen ziouc yiem jienv taux ih zanc.
• ⁹¹ Ziux meih hatc nyei waac yietc zungv yiem jienv taux ih hnoi
• weic zuqc maanc muotc se benx meih nyei bou.
• ⁹² Se gorngv meih nyei leiz-latc maiv zeiz bun yie a'hneiv,
• yie yiem kouv naanc gu'nyuoz zungv zuqc mietc mi'aqv.
• ⁹³ Yie yietc liuz maiv la'kuqv meih hatc nyei waac,
• weic zuqc meih longc meih hatc nyei waac bun yie duqv ziangh jienv.
• ⁹⁴ Yie benx meih nyei mienh, tov njoux yie,
• weic zuqc yie ei jienv * Hipv^lu waac gorngv lorz. meih hatc nyei waac.
• ⁹⁵ Orqv mienh zuov jienv oix daix yie,
• mv baac yie oix samx mangc meih nyei leiz-latc.
• ⁹⁶ Yie buatc maanc sic maaih ninh nyei soux mouc,
• mv baac meih nyei lingc za'gengh! jangv haic.

Hnamv Ziouv Nyei Leiz-Latc

Mem

• ⁹⁷ O yie za'gengh hnamv meih nyei leiz-latc,
• yie ziangh hnoi maiv dingh liouh nyei fei-fangv.
• ⁹⁸ Meih nyei lingc zanc-zanc yiem yie nyei hnyouv,
• ziouc bun yie maaih cong-mengh gauh camv yie nyei win-wangv.
• ⁹⁹ Yie gauh hnamv duqv tong yie nyei yietc zungv fin-saeng,
• weic zuqc yie fei-fangv meih njaaux nyei waac.
• ¹⁰⁰ Beiv mienh gox mienh yie gauh mengh baeqc
• weic zuqc yie ei jienv meih hatc nyei waac.
• ¹⁰¹ Yie hatc jienv maiv bun yie nyei zaux yangh yietc zungv orqv nyei jauv,
• weic bun yie ei jienv meih nyei waac zoux.
• ¹⁰² Yie maiv leih nqoi meih nyei leiz
• weic zuqc meih ganh njaaux jiex yie.
• ¹⁰³ Yie seix liuz meih nyei waac, za'gengh gaam haic,
• yiem yie nyei nzuih zungv gauh gaam mueiz-dorngh.
• ¹⁰⁴ Yie kaux meih hatc nyei waac tengx yie bieqc hnyouv,
• weic naaiv yie nzorng haic yietc zungv jaav nyei jauv.

Ziouv Nyei Leiz-Latc
Se Hnangv Norm Dang

Nun

• ¹⁰⁵ Meih nyei waac se hnangv dang ziux yie nyei zaux-mbiec,
• yaac zoux yie jauv zaangc nyei njang.
• ¹⁰⁶ Yie houv jienv liepc ngaengc waac
• yaac laengz ei jienv baengh fim nyei leiz zoux.
• ¹⁰⁷ O Ziouv aac, yie za'gengh siouc kouv naanc hniev haic,
• tov meih ziux meih nyei waac bun yie duqv ziangh jienv.
• ¹⁰⁸ O Ziouv aac, tov zipv yie nyei nzuih ceng nyei waac benx ziec nyei ga'naaiv,
• yaac njaaux yie hiuv duqv meih nyei leiz.
• ¹⁰⁹ Yie nyei maengc zanc-zanc zuqc gamh nziex nyei sic, * Fai “Yie zanc-zanc maiv funx maengc nyei yiem.” Faan zaqc gorngv “Yie nyei maengc zanc-zanc yiem yie nyei buoz gu'nyuoz”.
• mv baac yie maiv la'kuqv meih nyei leiz-latc.
• ¹¹⁰ Orqv mienh zaeng koux oix hlopv yie,
• mv baac yie maiv leih nqoi meih hatc nyei waac.
• ¹¹¹ Meih njaaux nyei waac se yie yietc liuz nzipc nyei buonc,
• yaac bun yie nyei hnyouv a'hneiv haic.
• ¹¹² Yie liepc dingc hnyouv gan meih nyei leiz-nyeic,
• yietc liuz gan taux daauh taux mueiz.

Kaux Ziouv Nyei Leiz-Latc
Duqv Longx

Saa^mekv

• ¹¹³ Maaih i diuc hnyouv nyei mienh yie nzorng haic,
• mv baac yie hnamv meih nyei leiz-latc.
• ¹¹⁴ Meih zoux yie bingx nyei dorngx yaac zoux yie nyei torngv-baaih.
• Yie kaux meih nyei waac maaih lamh hnamv dorngx.
• ¹¹⁵ Zoux orqv nyei mienh aah! Biaux nqoi yie maah!
• Weic bun yie haih gan longx yie nyei Tin-Hungh hatc nyei lingc.
• ¹¹⁶ Tov ziux meih laengz nyei waac baav jienv yie, bun yie duqv ziangh jienv.
• Yie maaih lamh hnamv nyei yaac tov maiv dungx bungx ndortv weic bun yie maiv zuqc nyaiv.
• ¹¹⁷ Tov baav jienv yie, yie ziouc yiem duqv longx
• yaac zanc-zanc taaih meih nyei leiz-nyeic.
• ¹¹⁸ Meih nqemh maiv ei meih nyei leiz-nyeic nyei mienh.
• Ninh mbuo guv guaix nyei za'eix se maiv lamh longc.
• ¹¹⁹ Meih zorqv lungh ndiev nyei orqv mienh funx hnangv hlieqv-nqaiv nor,
• weic naaiv yie hnamv meih njaaux nyei waac.
• ¹²⁰ Yie sin zinx weic zuqc yie gamh nziex meih.
• Yie yaac gamh nziex meih siemv nyei waac.

Oix Zuqc Ei Jienv Ziouv Nyei Leiz-Latc

Aayin

• ¹²¹ Yie zoux nyei se baengh fim, horpc nyei.
• Tov maiv dungx guangc yie yiem zeix yie wuov deix nyei buoz-ndiev.
• ¹²² Tov beu jienv meih nyei bou bun yie duqv longx,
• maiv dungx bun zoux maux nyei mienh zeix yie.
• ¹²³ Yie zuov gau meih nyei njoux en,
• caux meih zoux ziangx meih baengh fim laengz nyei waac,
• yie m'zing zungv maiv njang aqv.
• ¹²⁴ Tov meih ziux meih ziepc zuoqv nyei hnamv mienh dorh meih nyei bou,
• yaac tov njaaux meih nyei leiz-nyeic yie.
• ¹²⁵ Yie se meih nyei bou. Tov bun yie bieqc hnyouv,
• weic bun yie mengh baeqc meih njaaux nyei waac.
• ¹²⁶ Ziouv dingc zuiz nyei ziangh hoc taux aqv,
• weic zuqc mienh baamz meih nyei leiz-latc.
• ¹²⁷ Yie za'gengh hnamv meih nyei lingc gauh camv jiem,
• zungv gauh camv zien jiem.
• ¹²⁸ Weic naaiv yie yangh meih hatc nyei waac, * Naaiv joux Hipv^lu waac se maiv nangc mengh.
• yie nzorng haic yietc zungv jaav nyei jauv.

Oix Yangh Ziouv Nyei Leiz-Latc

Pe

• ¹²⁹ Meih njaaux nyei waac gengh peix fuc haic,
• weic naaiv yie longc hnyouv gan jienv mingh.
• ¹³⁰ Meih nyei waac porv nqoi se hnangv ziux njang nor,
• bun maiv nangc hiuv camv nyei mienh bieqc hnyouv.
• ¹³¹ Yie morngx nqoi nzuih tauv qiex hae hae nyei,
• weic zuqc yie za'gengh oix meih nyei lingc.
• ¹³² Tov huin mangc yie yaac korv-lienh yie,
• hnangv meih zoux jiex weic hnamv meih nyei mengh wuov deix mienh.
• ¹³³ Tov meih longc meih nyei waac bun yie nyei zaux-mbiec haih caaiv duqv jienv,
• yaac maiv dungx bun haaix nyungc zuiz gunv yie.
• ¹³⁴ Tov tengx yie biaux ndutv zeix yie wuov deix mienh,
• weic bun yie haih ei jienv meih hatc nyei waac.
• ¹³⁵ Tov meih nyei hmien ziux njang meih nyei bou,
• yaac tov njaaux meih nyei leiz-nyeic yie.
• ¹³⁶ Yie nyei wuom-mueic liouc njiec hnangv ndoqv nor,
• weic zuqc mienh maiv ei meih nyei leiz-latc.

Ziouv Nyei Leiz-Latc
Se Baengh Fim Nyei

Zaa^nde

• ¹³⁷ O Ziouv aac, meih se baengh fim nyei,
• meih nyei leiz-latc yaac zingx nyei.
• ¹³⁸ Meih dingc daaih nyei leiz-nyeic se horpc nyei,
• yaac baengh fim nzengc.
• ¹³⁹ Yie nyei hnyouv qiex jiez haic hnangv douz buov jienv nor,
• weic zuqc yie nyei win-wangv la'kuqv meih nyei waac.
• ¹⁴⁰ Meih laengz nyei waac seix liuz, hiuv duqv kaux duqv wuonv nyei,
• yie, meih nyei bou, yaac hnamv haic.
• ¹⁴¹ Yie zoux faix, zuqc mienh mangc piex,
• mv baac yie maiv la'kuqv meih hatc nyei waac.
• ¹⁴² Meih se baengh fim nyei, yaac yietc liuz baengh fim.
• Meih nyei leiz-latc yaac zien.
• ¹⁴³ Yie zuqc doh naanc, nzauh kouv,
• mv baac meih nyei lingc bun yie njien-youh.
• ¹⁴⁴ Meih njaaux nyei waac yietc liuz baengh fim nyei,
• tov bun yie mengh baeqc weic bun yie duqv ziangh jienv.

Daux Gaux Tov Ziouv Njoux

Kopv

• ¹⁴⁵ O Ziouv aac, yie longc nzengc hnyouv heuc jienv meih. Tov dau yie,
• yie ziouc ei jienv meih nyei leiz-nyeic.
• ¹⁴⁶ Yie heuc jienv meih, tov njoux yie,
• weic bun yie haih ei jienv meih njaaux nyei waac.
• ¹⁴⁷ Lungh maiv gaengh njang yie jiez sin heuc meih tengx.
• Yie kaux meih nyei waac maaih lamh hnamv dorngx.
• ¹⁴⁸ Yie ziangh muonz nungx jienv m'zing
• weic fei-fangv meih laengz nyei waac.
• ¹⁴⁹ Ziux meih ziepc zuoqv nyei hnamv mienh tov muangx yie nyei qiex.
• O Ziouv aac, tov ziux meih nyei leiz beu yie nyei maengc.
• ¹⁵⁰ Daav orqv za'eix zeix yie wuov deix mienh taux fatv aqv.
• Ninh mbuo leih go meih nyei leiz-latc.
• ¹⁵¹ Mv baac Ziouv aac, meih yiem nitv fatv.
• Meih nyei yietc zungv lingc yaac zien.
• ¹⁵² Yie weic hoqc meih njaaux nyei waac hiuv duqv lauh aqv,
• meih njaaux nyei waac yietc liuz liepc wuonv.

Daux Gaux Tov Ziouv Tengx

Letv

• ¹⁵³ Tov mangc buatc yie nyei kouv naanc yaac njoux yie,
• weic zuqc yie maiv la'kuqv meih nyei leiz-latc.
• ¹⁵⁴ Tov tengx mbenc yie nyei sic yaac zuoqc yie.
• Ziux meih laengz nyei waac tov bun yie duqv ziangh jienv.
• ¹⁵⁵ Zoux orqv nyei mienh maiv haih duqv njoux, * Fai “Njoux en leih duqv orqv mienh go”.
• ninh mbuo maiv gan meih nyei leiz-nyeic.
• ¹⁵⁶ O Ziouv aac, meih za'gengh korv-lienh mienh haic.
• Tov ziux meih nyei leiz bun yie maaih maengc ziangh jienv.
• ¹⁵⁷ Zeix yie, caux yie doix-dekc nyei mienh camv haic,
• mv baac yie maiv leih nqoi meih hatc nyei waac.
• ¹⁵⁸ Yie buatc maiv ziepc zuoqv nyei mienh ziouc youx haic
• weic zuqc ninh mbuo maiv ei meih nyei waac. * Fai meih hatc nyei waac.
• ¹⁵⁹ Samx mangc gaax yie ndongc haaix hnamv meih hatc nyei waac.
• Tov ziux meih ziepc zuoqv nyei hnamv mienh beu yie nyei maengc.
• ¹⁶⁰ Meih nyei waac nzutv zunv gorngv se zien leiz,
• meih nyei yietc zungv gong-fim nyei leiz yietc liuz yiem.

Dingc Hnyouv Gan
Ziouv Nyei Leiz-Latc

Sin

• ¹⁶¹ Zoux hlo nyei mienh maiv longc leiz nyei hoic yie,
• mv baac yie nyei hnyouv gamh nziex nyei se meih nyei waac.
• ¹⁶² Yie weic meih nyei waac a'hneiv,
• hnangv mienh duqv caangv daaih nyei ga'naaiv camv nor.
• ¹⁶³ Yie nzorng haic, youx haic yietc zungv gorngv-baeqc nyei waac,
• mv baac yie hnamv haic meih nyei leiz-latc.
• ¹⁶⁴ Weic meih baengh fim nyei leiz
• yie yietc hnoi ceng meih siec nzunc.
• ¹⁶⁵ Hnamv meih nyei leiz nyei mienh duqv baengh orn camv,
• yaac maiv maaih haaix nyungc haih bun ninh mbuo ndiqv zuqc ndorpc.
• ¹⁶⁶ O Ziouv aac, yie zuov jienv meih njoux yie,
• yie yaac ei meih hatc nyei lingc zoux.
• ¹⁶⁷ Yie nyei hnyouv ei jienv meih nyei waac.
• Yie za'gengh! hnamv haic meih nyei waac.
• ¹⁶⁸ Yie ei jienv meih hatc nyei, paaiv nyei waac,
• weic zuqc yie nyei diuc-diuc jauv yiem meih nyei nza'hmien.

Tov Ziouv Tengx

Tau

• ¹⁶⁹ O Ziouv aac, tov bun yie heuc nyei sing-qiex taux meih nyei nza'hmien,
• yaac ziux meih nyei waac bun yie bieqc hnyouv.
• ¹⁷⁰ Tov bun yie jouh nyei waac taux meih nyei nza'hmien,
• tov ziux meih nyei waac njoux yie.
• ¹⁷¹ Yie nyei nzuih meix oix gorngv cuotv ceng nyei waac,
• weic zuqc meih njaaux meih nyei leiz-nyeic yie.
• ¹⁷² Yie nyei mbietc oix baaux nzung gorngv meih nyei waac,
• weic zuqc meih nyei yietc zungv lingc se baengh fim nyei.
• ¹⁷³ Tov liuc leiz ziangx meih nyei buoz tengx yie,
• weic zuqc yie ginv liuz meih hatc nyei waac.
• ¹⁷⁴ O Ziouv aac, yie gengh oix duqv meih nyei njoux en,
• meih nyei leiz-latc yaac bun yie a'hneiv.
• ¹⁷⁵ Tov bun yie duqv ziangh jienv weic bun yie haih ceng meih,
• tov bun meih nyei leiz tengx yie.
• ¹⁷⁶ Yie mingh dorngc jauv hnangv ba'gi yungh dingx laaih nor,
• tov daaih lorz meih nyei bou,
• weic zuqc yie maiv la'kuqv meih nyei lingc.