Singx Nzung 118

Dor-Ziec Weic Zuqc Ziouv Njoux Ninh Nyei Baeqc Fingx

• ¹ Oix zuqc dor-ziec Ziouv weic zuqc ninh longx haic.
• Ninh yietc liuz ziepc zuoqv nyei hnamv mienh. * 1 Zunh Doic Douh 16:34 ; 2 Zunh Doic Douh 5:13 ; 7:3 ; E^saa^laa 3:11 ; Singx Nzung 100:5 ; 106:1 ; 107:1 ; 136:1 ; Ye^le^mi 33:11
• ² Bun I^saa^laa^en Mienh gorngv,
• “Ninh yietc liuz ziepc zuoqv nyei hnamv mienh.”
• ³ Bun Aalon nyei zeiv-fun gorngv,
• “Ninh yietc liuz ziepc zuoqv nyei hnamv mienh.”
• ⁴ Bun yietc zungv taaih Ziouv nyei mienh gorngv,
• “Ninh yietc liuz ziepc zuoqv nyei hnamv mienh.”
• ⁵ Zuqc kouv naanc wuov zanc yie heuc Ziouv.
• Ziouv dau yie yaac bungx nqoi yie.
• ⁶ Maaih Ziouv tengx yie, yie ziouc maiv gamh nziex.
• Baamh mienh haih zoux haaix nyungc bun yie? * Hipv^lu 13:6
• ⁷ Ziouv caux yie yiem yaac tengx yie,
• yie ziouc mangc buatc nzorng yie wuov deix win-wangv zuqc suei.
• ⁸ Ndaauh kaux Ziouv se gauh longx
• kaux baamh mienh.
• ⁹ Ndaauh kaux Ziouv se gauh longx
• kaux zoux hlo nyei mienh.
• ¹⁰ Maanc guoqv nyei mienh weih gormx yie.
• Yie dengv Ziouv nyei mbuox mietc ninh mbuo.
• ¹¹ Ninh mbuo weih gormx yie, feix-bung weih gormx yie.
• Yie dengv Ziouv nyei mbuox mietc ninh mbuo.
• ¹² Ninh mbuo hnangv mueiz nor, weih gormx yie.
• Ninh mbuo hnangv buov njimv-lomc nyei douz daic siepv.
• Yie dengv Ziouv nyei mbuox mietc ninh mbuo.
• ¹³ Yie zuqc ninh mbuo fongv seix nyei, bun yie kaav deix ndorpc,
• mv baac Ziouv tengx yie.
• ¹⁴ Ziouv se yie nyei qaqv caux yie nyei nzung,
• ninh benx yie nyei njoux en. * Cuotv I^yipv 15:2 ; I^saa^yaa 12:2
• ¹⁵ Muangx maah! Yiem kuv mienh nyei ndopv-liuh
• maaih njien-youh caux hingh jiex nyei qiex aengv cuotv gorngv,
• “Ziouv nyei mbiaauc jieqv buoz tengx hingh jiex.
• ¹⁶ Ziouv sung ninh nyei mbiaauc jieqv buoz faaux hlang.
• Ziouv sung ninh nyei mbiaauc jieqv buoz tengx hingh jiex.”
• ¹⁷ Yie ziouc maiv daic mv baac duqv ziangh jienv
• yaac zunh Ziouv zoux nyei sic.
• ¹⁸ Ziouv dingc yie nyei zuiz hniev nyei
• mv baac maiv bun yie zuqc daic.
• ¹⁹ Tengx yie koi nqoi zaangc Tin-Hungh nyei gaengh * Faan zaqc se “Kuv mienh bieqc nyei gaengh.” Eix leiz se “zaangc Tin-Hungh nyei gaengh”.
• weic bun yie haih bieqc mingh dor-ziec Ziouv.
• ²⁰ Naaiv se Ziouv nyei gaengh.
• Kuv mienh duqv yangh naaiv bieqc.
• ²¹ Yie dor-ziec meih weic zuqc meih dau yie.
• Yaac benx yie nyei njoux en.
• ²² Gomv biauv zaangc nqemh cuotv wuov norm la'bieiv,
• zungv benx an biauv-gorqv gauh longc jienv jiex wuov norm. * Matv^taai 21:42 ; Maako 12:10-11 ; Lugaa 20:17 ; Gong-Zoh 4:11 ; 1 Bide 2:7
• ²³ Naaiv se Ziouv zoux nyei sic.
• Ziux yie mbuo nyei m'zing mangc, yie mbuo buatc mbuoqc horngh haic.
• ²⁴ Naaiv se Ziouv liepc daaih nyei hnoi.
• Yie mbuo oix zuqc yiem naaiv norm hnoi njien-youh, a'hneiv.
• ²⁵ O Ziouv aah! Njoux yie mbuo maah! * Matv^taai 21:9 ; Maako 11:9 ; Yo^han 12:13
• O Ziouv aah! Tov tengx yie mbuo haih zoux duqv ziangx nyei.
• ²⁶ Tov ceix fuqv bun dengv Ziouv nyei mbuox bieqc daaih nyei mienh. * Matv^taai 21:9 ; 23:39 ; Maako 11:9 ; Lugaa 13:35 ; 19:38 ; Yo^han 12:13
• Yie mbuo yiem Ziouv nyei biauv tov Ziouv ceix fuqv bun meih mbuo.
• ²⁷ Ziouv se dongh Tin-Hungh.
• Ninh yaac ceix njang bun yie mbuo.
• Longc hlaang ndoh jienv fongc horc ziec weic jiex zipv nyei saeng-kuv yaac dorh mingh taux ziec-dorngh nyei jorng. * Naaiv yiemc nyei Hipv^lu waac aqc duqv mengh baeqc. Maaih deix gorngv “oix zuqc nanv jienv ndiangx-nquaah jiez gorn jiex zipv, mingh taux ziec-dorngh nyei jorng”.
• ²⁸ Meih zoux yie nyei Tin-Hungh.
  
• Yie oix dor-ziec meih.
• Meih zoux yie nyei Tin-Hungh.
  
• Yie oix taaih meih weih hlo.
• ²⁹ Oix zuqc dor-ziec Ziouv weic zuqc ninh longx haic.
• Ninh yietc liuz ziepc zuoqv nyei hnamv mienh.