Singx Nzung 120

Daux Gaux Tov Ziouv Tengx Biaux Ndutv, Maiv Zuqc Mienh Hoic

Yangh faaux nyei nzung. * Yiem Singx Nzung 120-134 benx yangh faaux nyei nzung. Haih maaih ziex nyungc eix leiz mv baac mienh gauh camv jiex funx baaux nyei ziangh hoc se I^saa^laa^en Mienh yietc hnyangx mingh buo nzunc Ye^lu^saa^lem Zingh jiex zipv. Doix ninh mbuo faaux wuov jiex nyei ziangh hoc ninh mbuo baaux naaiv deix nzung.

• ¹ Yie zuqc kouv naanc nyei ziangh hoc yie heuc Ziouv,
• ninh yaac dau yie.
• ² O Ziouv aac, tov njoux yie biaux ndutv gorngv-baeqc nyei mienh,
• caux nduov mienh nyei mienh.
• ³ Meih mbuo gorngv-baeqc nyei mienh aah!
• Oix zuqc bun haaix nyungc meih?
• Aengx jaa haaix nyungc bun meih?
• ⁴ Ninh oix longc mborqv jaax baeng nyei forng-cang laic nyei,
• caux maaih douz nyei douz-taanx dingc meih nyei zuiz.
• ⁵ Yie zuqc kouv aqv, weic zuqc yie yiem Mesekv Deic,
• yaac yiem Ke^ndaa nyei ndopv-liuh mbu'ndongx.
• ⁶ Yie yiem nzorng baengh orn nyei jauv
• wuov deix mienh mbu'ndongx lauh jiex ndaangc.
• ⁷ Yie oix taaix-baengh, mv baac yie gorngv nyei ziangh hoc,
• ninh mbuo oix mborqv jaax.