Yopv 33 (Job 33)

Yopv 33

E^li^hu Oix Caux Yopv Luonx Leiz

¹ “Yopv aac, ih zanc tov muangx yie gorngv,

muangx longx yie gorngv nyei yietc zungv waac.

² Mangc maah! Ih zanc yie oix gorngv,

yie liuc leiz ziangx gorngv aqv.

³ Yie nyei waac bun cing yie nyei hnyouv zingx,

ziux yie hiuv nyei jauv yie nyei nzuih meix gorngv.

⁴ Tin-Hungh nyei Singx Lingh zeix yie,

Nernh Jiex Wuov Dauh nyei qiex bun yie maaih maengc.

⁵ Se gorngv meih haih dau yie, dau maah!

Liuc leiz ziangx meih nyei waac yaac souv jienv yie nyei nza'hmien.

⁶ Ziux Tin-Hungh mangc, yie caux meih fih hnangv,

ninh yaac longc ndunh nie zeix yie daaih fih hnangv nyei.

⁷ Weic naaiv meih maiv zuqc gamh nziex yie,

yie maiv zeiz oix longc qaqv zatv jienv meih.

E^li^hu Aengx Nzamc Yopv Gorngv
Ninh Maiv Zoux Dorngc

⁸ “Meih gorngv nyei waac yie haiz mi'aqv.

Meih gorngv waac nyei qiex bieqc yie nyei m'normh.

⁹ Meih gorngv, ‘Yie se cing-nzengc, maiv maaih zuiz.

Yie cing-nzengc nyei, maiv dorngc haaix nyungc.

¹⁰ Mv baac Tin-Hungh lorz sic hoic yie,

yaac funx yie benx ninh nyei win-wangv.

¹¹ Ninh zorqv ndiangx gapc jienv yie nyei zaux,

aengx zuov jienv yie nyei diuh diuh jauv.’ * Yopv 13:27

E^li^hu Gorngv
Maiv Zeiz Yopv Maiv Dorngc

¹² “Yopv aac, hnangv naaic meih dorngc mi'aqv. Yie oix dau meih.

Tin-Hungh se gauh hlo jiex baamh mienh.

¹³ Meih weic haaix diuc caux ninh nzaeng gorngv,

‘Ninh maiv dau yie * nyei haaix joux waac’?

¹⁴ Tin-Hungh longc naaiv nyungc za'eix gorngv,

longc wuov nyungc za'eix gorngv,

mv baac mienh maiv longc hnyouv muangx. * Fai mienh zieqv maiv duqv.

¹⁵ Lungh muonz zanc mienh bueix jienv coux,

m'njormh ndo nyei ziangh hoc,

mbeix mbeix, buatc hinc yaangh nyei sic, * Yopv 4:13

¹⁶ Tin-Hungh bun ninh mbuo nyei m'normh muangx duqv haiz,

yaac longc donv nyei waac haeqv ninh mbuo.

¹⁷ weic bun mienh leih nqoi zoux orqv nyei sic,

yaac bun ninh mbuo maiv ceng-hlo zoux maux.

¹⁸ Ninh dangv jienv bun mienh maiv zuqc bieqc yiemh gen,

njoux ninh mbuo nyei maengc maiv zuqc daic. *

Tin-Hungh Bun Butv Baengc Nyei Jauv
Weic Donv Mienh

¹⁹ “Mienh yaac zuqc mborqv njaaux bueix jienv coux diev mun,

ninh nyei mbungv yaac zanc-zanc mun.

²⁰ Ninh nyei nzuih ziouc youx nyanc hopv,

liemh kuv jiex nyei ga'naaiv yaac youx mi'aqv.

²¹ Ninh jaic gau, sin zaangc soqv nzengc, mangc maiv buatc orv,

zinh ndaangc maiv buatc nyei mbungv, ih zanc mbong cuotv daaih aqv.

²² Ninh nyei lingh wuonh taux fatv yiemh gen,

ninh nyei maengc taux fatv mietc maengc wuov deix.

E^li^hu Gorngv Tin-Hungh Paaiv Fin-Mienh Daaih Njoux Mienh

²³ “Se gorngv maaih dauh fin-mienh daaih tengx ninh zoux mbu'ndongx mienh,

se cin-waanc dauh nyei yietc dauh,

bun mienh hiuv duqv zoux horpc nyei jauv.

²⁴ Wuov dauh fin-mienh korv-lienh ninh ziouc gorngv,

‘Tov njoux ninh, maiv dungx bun ninh mingh yiemh gen,

yie lorz duqv zuoqc nyei jaax mi'aqv.’

²⁵ Ninh nyei sin ziouc nzuonx lunx daaih hnangv fu'jueiv nyei,

yaac henv jiez daaih hnangv mienh lunx mienh nyei hnoi-nyieqc nor.

²⁶ Ninh daux gaux jouh Tin-Hungh, Tin-Hungh ziouc zipv ninh,

ninh njien-youh nyei mingh yiem Tin-Hungh nyei nza'hmien.

Tin-Hungh aengx bun ninh nzuonx daaih zoux kuv mienh hnangv loz wuov nor.

²⁷ Ninh yiem mienh nyei nza'hmien baaux nzung gorngv,

‘Yie baamz zuiz, buatc zoux dorngc nyei sic benx zoux horpc nyei jauv.

Mv baac Tin-Hungh maiv ziux yie zoux nyei winh bun yie.

²⁸ Ninh njoux yie, bun yie maiv zuqc njiec taux yiemh gen,

yie nyei maengc ziouc duqv buatc njang.’

²⁹ “Tin-Hungh zoux naaiv deix yietc zungv sic bun mienh,

i nzunc, buo nzunc.

³⁰ Ninh njoux mienh leih ndutv yiemh gen,

bun ninh duqv a'hneiv nyei ziangh jienv. *

E^li^hu Tov Yopv Sekv
Yaac Muangx Ninh Njaaux

³¹ “O Yopv aac, baeng m'normh muangx yie gorngv oc.

Tov maiv dungx ko lo, yie ziouc gorngv.

³² Se gorngv meih maaih waac gorngv, dau yie maah!

Gunv gorngv aqv. Yie a'hneiv muangx weic laengz meih se maiv dorngc.

³³ Se gorngv meih maiv gorngv,
tov muangx yie gorngv.

Maiv dungx ko lo, yie ziouc zorqv cong-mengh nyei jauv njaaux meih.”