E^li^hu Gorngv Nyei Waac
E^li^hu Qiex Jiez Ziouc Gorngv
1 Naaiv deix buo laanh mienh ziouc dingh njiec, maiv dau Yopv, weic zuqc ziux Yopv mangc, ninh ganh zoux kuv mienh.
2 Mv baac maaih dauh Laam Fingx, Mbusi Mienh, Mbaa^laa^ken nyei dorn, E^li^hu, qiex jiez. Ninh qiex jiez Yopv weic zuqc Yopv gorngv ninh ganh zoux duqv horpc, maiv zeiz Tin-Hungh.
3 Ninh yaac qiex jiez Yopv nyei buo dauh doic, weic zuqc ninh mbuo lorz maiv duqv waac dau, maiv gunv ninh mbuo gorngv Yopv dorngc.
4 E^li^hu zuov jienv oix caux Yopv gorngv weic zuqc wuov deix gauh gox ninh.
5 E^li^hu buatc naaiv deix buo laanh mienh maiv maaih waac dau ninh ziouc qiex jiez haic.
E^li^hu Gorngv Da'yietv Nzunc Waac
6 Mbusi Mienh, Mbaa^laa^ken nyei dorn, E^li^hu, ziouc dau,
- “Yie hnyangx-jeiv lunx,
- meih mbuo gox.
- Weic naaiv yie daamv faix,
- maiv gaamv gorngv yie hnamv cuotv nyei waac bun meih mbuo muangx.
-
7 Yie gorngv, ‘Hnyangx-jeiv gox oix zuqc gorngv,
- bun siouc nyuonh ndaauv nyei longc cong-mengh njaaux mienh.’
-
8 Nernh Jiex nyei Tin-Hungh nyei qiex
- bun baamh mienh nyei hnyouv
- maaih banh zeic haih mengh baeqc.
-
9 Se maiv zeiz laaix hnyangx-jeiv hlang, mienh cingx maaih cong-mengh,
- fai siouc nyuonh ndaauv cingx bun ninh mbuo mengh baeqc haaix nyungc se horpc.
-
10 Weic naaiv yie gorngv. Muangx yie maah!
- Tov bun yie ziux yie nyei hnyouv hnamv nyei gorngv.
E^li^hu Gorngv Wuov Deix Doic
Dau Maiv Zuqc
-
11 “Yie zuov jienv muangx meih mbuo gorngv nyei waac.
- Yie muangx meih mbuo hnamv cuotv nyei za'eix,
- yaac zuov jienv meih mbuo lorz waac gorngv.
-
12 Yie longc hnyouv muangx meih mbuo,
- yaac maiv maaih haaix dauh dau duqv horpc Yopv.
- Meih mbuo maiv maaih yietc laanh haih dau Yopv nzaeng nyei waac.
-
13 Faix fim, maiv dungx gorngv, ‘Yie mbuo lorz duqv cong-mengh.
- Bun Tin-Hungh ganh dau ninh,
- maiv zeiz mienh.’
-
14 Yopv maiv zeiz zueih yietv zueih nyeic doix yie gorngv,
- yie zungv maiv longc waac hnangv meih mbuo nor dau.
E^li^hu Nyienz Maiv Jienv,
Oix Zuqc Gorngv
-
15 “Ninh mbuo gamh nziex, maiv aengx dau aqv,
- zungv maiv maaih waac dau.
-
16 Ninh mbuo maiv gorngv waac, yie corc oix zuqc zuov fai?
- Weic zuqc ninh mbuo souv jienv wuov, yaac maiv maaih waac aengx dau.
-
17 Yie ganh yaac oix dau,
- yie oix ziux yie hnamv nyei jauv gorngv.
-
18 Weic zuqc yie maaih waac camv, nyienz maiv jienv,
- yie nyei hnyouv aapv yie gorngv.
-
19 Yie nyei hnyouv hnangv a'ngunc diuv dapv mbuoqc, maiv maaih dorngx bun qiex cuotv.
- Yaac hnangv siang-ndopv-mbuoqc haih zungx mbaaix.
-
20 Yie hnangv haaix oix zuqc gorngv cingx duqv kuh yiem,
- yie oix zuqc morngx nqoi nzuih dau.
-
21 Yie maiv mangc haaix dauh nyei hmien,
- maiv la'guaih ceng haaix dauh.
-
22 Weic zuqc yie maiv hiuv duqv hnangv haaix nor la'guaih ceng,
- se gorngv yie la'guaih ceng, Zeix Yie Wuov Dauh oix siepv-siepv nyei mietc yie.
