Yopv Gorngv Nqa'haav Laai Wuov Nzunc Nyei Setv Mueiz Waac

Yopv Ganh Laengz Jienv Oix Zoux Horpc

• ¹ “Yie caux yie nyei m'zing laengz jiez ngaengc waac.
• Wuov nyungc yie hnangv haaix nor haih hanc cing-nzengc nyei sieqv? * Fai “maiv bueix jiex dorn nyei sieqv”.
• ² Yiem gu'nguaaic nyei Tin-Hungh oix bun yie duqv nyei buonc se haaix nyungc?
• Yiem hlang nyei dorngx Nernh Jiex Wuov Dauh oix bun yie duqv nzipc haaix nyungc?
• ³ Ninh maiv zeiz oix bun zoux maiv horpc nyei mienh zuqc zeqc naanc,
• yaac bun baamz zuiz nyei mienh zuqc sic fai?
• ⁴ Ninh maiv zeiz mangc yie mingh nyei jauv
• yaac saauv yie nyei norm-norm zaux-mbiec fai?
• ⁵ “Se gorngv yie zoux jaav nyei jauv,
• yie nyei zaux yaac siepv-siepv nyei mingh nduov mienh,
• ⁶ tov Tin-Hungh nziang yie yiem baengh fim nyei tin-baengh nziangx,
• ninh ziouc hiuv duqv yie maiv zoux dorngc.

Yopv Laengz Ngaengc Waac Gorngv
Ninh Maiv Hienx Auv

• ⁷ “Se gorngv yie nyei zaux-mbiec yangh pien zien jauv,
• yie nyei hnyouv yaac gan yie nyei m'zing,
• se gorngv yie nyei buoz maaih haaix nyungc zuiz guoqv jienv,
• ⁸ gunv bun yie zuangx yaac bun ganh dauh nyanc,
• yaac tov weic yie cuotv daaih nyei gaeng-zuangx liemh nzungh baeng cuotv.
• ⁹ “Se gorngv yie nyei hnyouv zuqc baeng mingh lorz m'sieqv dorn,
• yie yaac bingx jienv yiem yie nyei juangc laangz mienh nyei gaengh ndaangc zuov,
• ¹⁰ gunv bun yie nyei auv weic ganh dauh m'jangc dorn morc mbuonv,
• yaac bun ninh caux ganh dauh m'jangc dorn bueix.
• ¹¹ Hnangv naaic za'gengh waaic nyei sic,
• siemv zuiz jien zungv oix zuqc dingc zuiz,
• ¹² weic zuqc naaiv nyungc zuiz benx douz buov taux zuqc mietc nyei dorngx, * Hipv^lu waac gorngv taux Aa^mbatc^ndon.
• yaac bun yie duqv daaih nyei yietc zungv zuqc buov qui.

Yopv Ngaengc Jienv Gorngv Ninh Maiv Hoic Ndortv Naanc Nyei Mienh

• ¹³ “Se gorngv yie nyei nouh gauv nouh beiz daaih gox yie,
• yie mangc piex maiv muangx ninh mbuo gox nyei waac,
• ¹⁴ wuov nyungc Tin-Hungh jiez daaih naaic yie oix zuqc hnangv haaix nor zoux?
• Ninh zaah naaic yie nyei ziangh hoc yie oix zuqc hnangv haaix nor dau?
• ¹⁵ Zeix yie yiem maa nyei ga'sie wuov dauh fih hnangv nyei zeix ninh maiv zeiz?
• Yaac dongh naaiv dauh Tin-Hungh bun yie mbuo yiem maa nyei ga'sie zeix daaih maiv zeiz?
• ¹⁶ “Se gorngv yie ngaengc jienv maiv tengx dongh mienh jomc mienh oix duqv nyei,
• fai bun auv-guaav nyei m'zing baeqc baeqc mangc,
• ¹⁷ se gorngv yie ganh nyanc yie maaih nyei diqv dien,
• guh hanh fu'jueiv yaac maiv duqv nyanc,
• ¹⁸ (weic zuqc ninh lunx nyei ziangh hoc yie dorh ninh hlo daaih hnangv benx ninh nyei die nor,
• ninh yiem maa nyei ga'sie cuotv daaih yie goux ninh), * Fai yienz ninh. Naaiv yiemc nyei Hipv^lu waac se maiv nangc mengh.
• ¹⁹ se gorngv yie buatc haaix dauh daic laaix maiv maaih lui-houx zuqv,
• fai buatc dangx-donx nyei mienh maiv maaih haaix nyungc torngv sin,
• ²⁰ se gorngv yie maiv bun ninh duqv yie nyei ba'gi yungh nyei biei tengx ninh siouv,
• ninh nyei hnyouv ziouc maiv buang waac bun yie,
• ²¹ se gorngv yie hiuv duqv yiem zingh gaengh ndaangc nyei sic dorngh maaih mienh tengx yie,
• yie ziouc sung buoz zeix guh hanh fu'jueiv,
• ²² tov bun yie nyei mba'dauh caux mbungv-zeih ndutv mingh,
• yaac bun yie nyei buoz yiem mbungv-daaux nauv ndutv,
• ²³ weic zuqc Tin-Hungh bun daaih nyei zeqc naanc bun yie gamh nziex haic.
• Yaac weic ninh nyei haangh daauh yie maiv haih zoux naaiv nyungc sic.

Yopv Ngaengc Jienv Gorngv
Ninh Maiv Mauv Ga'naaiv
Yaac Maiv Baaix Miuc-Fangx

• ²⁴ “Se gorngv yie longc jiem zoux yie kaux nyei dorngx,
• aengx mbuox zien jiem, ‘Meih benx yie kaux wuonv nyei dorngx,’
• ²⁵ se gorngv yie weic yie maaih zinh zoih bungx-zuoqc,
• fai weic yie nyei buoz zornc duqv camv njien-youh,
• ²⁶ se gorngv yie buatc mba'hnoi ziux cuotv njang,
• fai buatc hlaax nyei njang-laangc jiex gu'nguaaic,
• ²⁷ yie nyei hnyouv beic ndiev zuqc yuoqc,
• yie nyei nzuih zom yie nyei buoz bun cing taaih ninh mbuo,
• ²⁸ naaiv yaac benx siemv zuiz jien oix zuqc dingc nyei zuiz,
• weic zuqc yie maiv ziepc zuoqv nyei zoux bun Yiem Hlang Jiex nyei Tin-Hungh.

Yopv Gorngv Ninh Maiv Jaauv Win,
Ninh A'hneiv Zipv Kaeqv,
Ninh Maiv Zoux
Beih Zaqc Hnyouv Njuotv

• ²⁹ “Se gorngv yie buatc nzorng yie wuov deix zuqc baaic,
• buatc ninh mbuo zuqc orqv sic ziouc njien-youh a'hneiv,
• ³⁰ (Yie zungv maiv bun yie nyei nzuih baamz zuiz,
• zioux bun ninh zuqc daic,)
• ³¹ se gorngv yiem yie nyei ndopv-liuh nyei mienh maiv gorngv,
• ‘Maaih haaix dauh maiv duqv nyanc ninh nyei ziouv nyei nyanc hopv * Hipv^lu waac gorngv ninh nyei orv. beuv?’
• ³² (yiem go daaih nyei mienh maiv zuqc yiem hei-horngc jiex muonz,
• yie nyei gaengh koi nqoi zipv jiex jauv nyei mienh,)
• ³³ se gorngv yie bingx yie baamz nyei zuiz hnangv Aa^ndam,
• zorqv zuiz bingx jienv yie nyei hnyouv,
• ³⁴ weic zuqc yie gamh nziex zuangx mienh camv,
• yaac gamh nziex douh zong mienh mangc piex yie,
• yie ziouc maiv ko lo yaac maiv cuotv gaengh ka'ndau.

Yopv Tov Tin-Hungh Nqa'haav Laai Wuov Nzunc, Bun Ninh Hiuv Duqv Ninh Dorngc Nyei Dorngx, Aengx Ngaengc Jienv Gorngv Ninh Maiv Zoux Dorngc

• ³⁵ “O feix duqv maaih dauh muangx yie.
• (Naaiv yie faaux yie nyei mbuox. Tov Nernh Jiex Wuov Dauh dau yie.)
• Tov gox yie wuov dauh zorqv gox nyei waac fiev jienv.
• ³⁶ Yie ziouc an jienv yie nyei mba'dauh,
• yaac ndongx jienv hnangv hungh ningv.
• ³⁷ Yie oix gorngv mengh mbuox Tin-Hungh yie zoux nyei yietc zungv, * Faan zaqc gorngv “yie nyei norm-norm zaux-mbiec”.
• yie ziouc hnangv zoux hlo nyei mienh bieqc taux ninh nyei nza'hmien.
• ³⁸ “Se gorngv yie nyei ndau gox yie,
• laih nyei ndau-zuonx lomh nzoih nyiemv,
• ³⁹ se gorngv yie nyanc ndau nyei gaeng-zuangx yaac maiv cuotv nyaanh,
• bun loz-ndau-ziouv guangc maengc,
• ⁴⁰ tov bun njimv cuotv div mbiauh witv,
• bun miev-zueix cuotv div mbiauh mbaali.”

Yopv gorngv nyei waac nzengc mi'aqv.