Tin-Hungh Hiuv Duqv
Cong-Mengh Yiem Haaix Daaih

Wetv Jiem Nyaanh Nyei Dorngx

• ¹ “Zien aqv, maaih wetv nyaanh nyei ciangv,
• yaac maaih dorngx sinx jiem.
• ² Hlieqv yiem ndau-ndiev wetv cuotv daaih,
• dongh yaac yiem la'bieiv sinx daaih.
• ³ Mienh bun hmuangx nyei dorngx tiuv benx njang.
• Ninh mbuo zimh lorz yiem go jiex nyei dorngx,
• yiem mapv hmuangx nyei dorngx wetv cuotv la'bieiv.
• ⁴ Ninh mbuo yiem leih mienh nyei dorngx go nyei, wetv ndau-ndiev nyei kuotv,
• jiex jauv nyei mienh zungv maiv jangx ninh mbuo.
• Ninh mbuo leih duqv mienh go,
• yiem kuotv gu'nyuoz nanv jienv hlaang ndioux mingh ndioux daaih.
• ⁵ Ndau-beih aeqv, cuotv laangh ziqc,
• mv baac ndau-ndiev lunc nzengc hnangv zuqc douz buov nor.
• ⁶ Ndau-ndiev nyei la'bieiv maaih la'bieiv-jaaix mbuov nyei, * Fai mbanv mbuov nzang nyei.
• la'bieiv gu'nyuoz yaac maaih jiem-mbuonv.

Norqc Caux Hieh Zoih Maiv Hiuv
Wuov Deix Kuotv Yiem Haaix

• ⁷ “Wuov diuh jauv maiv maaih haaix norm domh jaangv hiuv,
• domh jaangv-ngongh nyei m'zing yaac maiv buatc jiex.
• ⁸ Ciouv nyei hieh zoih maiv caaiv jiex,
• sienh yaac maiv yangh jiex wuov.

Mienh Hnangv Haaix Nor
Wetv Kuotv Lorz La'bieiv-Jaaix

• ⁹ “Mienh sung buoz mborqv ngaengc haic nyei la'bieiv,
• wetv mbong njiec taux gorn.
• ¹⁰ Ninh yiem la'bieiv-mbaengx gu'nyuoz wetv jauv,
• ninh nyei m'zing duqv buatc nyungc-nyungc jaaix nyei ga'naaiv.
• ¹¹ Ninh zaeqv jienv wuom-nyuonh, maiv bun wuom saamx cuotv,
• bun bingx jienv nyei ga'naaiv cuotv daaih yiem njang.

Maiv Maaih Haaix Dauh Hiuv Duqv
Cong-Mengh Nyei Gorn Yiem Haaix

• ¹² “Mv baac cong-mengh aeqv, oix zuqc mingh haaix ndau lorz?
• Wuonh zaang nyei dorngx yiem haaix?
• ¹³ Mienh maiv hiuv duqv cong-mengh nyei jaax-zinh, * Maaih deix gan Gikc waac faan daaih gorngv “Mienh maiv hiuv duqv mingh haaix diuc jauv lorz cong-mengh”.
• yiem yaangh gen lorz maiv buatc.
• ¹⁴ Ndau-ndiev nyei wuom gorngv, ‘Cong-mengh maiv yiem yie gu'nyuoz.’
• Koiv yaac gorngv, ‘Cong-mengh maiv caux yie yiem.’

Cong-Mengh Gauh Jaaix Jiex
Yietc Zungv Jaaix Nyei Ga'naaiv

• ¹⁵ “Longc jiem maaiz yaac maiv duqv,
• yaac maiv haih nziang nyaanh zic ninh nyei jaax-zinh.
• ¹⁶ Ofi nyei jiem caux jaaix haic nyei la'bieiv-jieqv baeqc
• fai mbuov nyei la'bieiv-jaaix * Fai mbanv mbuov nzang nyei. yaac maaiz maiv ndutv,
• ¹⁷ jiem caux jaaix nyei gingx yaac beiv maiv taux.
• Yaac maiv haih longc zien jiem nyei jaa-sic maaiz ndutv.
• ¹⁸ Liemh maiv zuqc gorngv taux yiem koiv jaaix nyei la'bieiv fai nzang jiex nyei gingx,
• cong-mengh nyei jaax-zinh se gauh jaaix jiex jaaix nyei la'bieiv-zou. * Janx-Taiv waac gorngv kaic mukv.
• ¹⁹ E^ti^o^bie yangh ungv nyei la'bieiv-jaaix yaac maiv haih beiv maiv taux,
• zien jiem nyei jaax-zinh yaac beiv maiv zaaic aqv.
• ²⁰ Wuov nyungc cong-mengh yiem haaix daaih?
• Wuonh zaang nyei dorngx yiem haaix?
• ²¹ Cong-mengh se bingx jienv yietc zungv maaih maengc nyei ga'naaiv nyei m'zing,
• yaac gem jienv yiem ndaamv-lungh nyei norqc.
• ²² Zuqc mietc nyei dorngx caux yiemh gen gorngv, * Hipv^lu waac gorngv zuqc daic.
• ‘Yie mbuo nyei m'normh haiz deix waac-nziaaux gorngv taux cong-mengh.’

Kungx Tin-Hungh Hiuv Duqv
Cong-Mengh Nyei Jauv

• ²³ “Tin-Hungh mengh baeqc lorz cong-mengh wuov diuh jauv,
• yaac hiuv duqv cong-mengh yiem nyei dorngx.
• ²⁴ Weic zuqc ninh mangc taux jomc ndau-beih,
• yaac buatc yiem lungh ndiev nyei nyungc-nyungc.
• ²⁵ Tin-Hungh bun nziaaux maaih hniev-daauh wuov zanc,
• yaac longc ga'naaiv hlaau wuom,
• ²⁶ ninh paaiv ziangx mbiungc nyei soux mouc,
• yaac dingc mba'lingc douz nyei jauv,
• ²⁷ wuov zanc ninh buatc cong-mengh yaac gorngv se longx nyei.
• Ninh liepc jiez yaac zaah mangc.
• ²⁸ Tin-Hungh gorngv mbuox mienh,
• ‘Oix zuqc taaih Ziouv, naaiv se cong-mengh.
• Yaac oix zuqc guangc orqv sic, naaiv se wuonh zaang.’” * Singx Nzung 111:10 ; Cong-Mengh Waac 1:7 ; 9:10