Baengh Fim Nyei Hungh

• ¹ Mangc maah! Maaih dauh hungh diex oix hnyouv zingx nyei gunv.
• Maaih domh jien oix baengh fim nyei gunv.
• ² Dauh dauh mienh ziouc hnangv norm dorngx bingx nziaaux,
• yaac benx bingx mbiungc-nziaaux nyei dorngx,
• yaac hnangv ndoqv liouc ndau-nqaai,
• hnangv torngv laangh nyei la'bieiv yiem deic-bung-haanz.
• ³ Wuov zanc haih mangc duqv buatc nyei mienh nyei m'zing maiv njipv.
• Muangx duqv haiz nyei mienh nyei m'normh yaac muangx duqv haiz aqv.
• ⁴ Nzuih siepv nyei mienh haih hnamv duqv tong yaac bieqc hnyouv, * Maaih deix sou faan daaih gorngv zien leiz.
• a'lanh nyei mienh haih gorngv waac mbiaangc yaac mengh nyei.
• ⁵ Yiem naaiv mingh mienh maiv taaih mienh hngongx mienh zoux hlo,
• yaac maiv taaih zoux waaic sic nyei mienh,
• ⁶ weic zuqc hngongx nyei mienh gorngv hngongx nyei waac.
• Hnyouv kungx hnamv zoux orqv sic hnangv.
• Ninh zoux sic maiv horpc Tin-Hungh
• yaac gorngv dorngc Ziouv nyei jauv,
• weic bun hnyouv sie nyei mienh ngorc jienv yiem,
• bun jaang nqaatv nyei mienh maiv duqv wuom hopv.
• ⁷ Zoux waaic sic nyei mienh nyei za'eix se orqv haic,
• kungx daav cuotv orqv nyei za'eix hnangv
• weic longc gorngv-baeqc nyei jauv bun mienh jomc mienh zuqc mietc,
• maiv gunv dangx-donx nyei mienh tov nyei waac horpc.
• ⁸ Mienh longx mienh daav longx nyei za'eix,
• ninh kungx zoux jienv longx nyei sic mingh.

Donv Ye^lu^saa^lem Nyei
M'sieqv Dorn

• ⁹ Meih mbuo kuh yiem kuh nyanc nyei m'sieqv dorn aac,
• jiez daaih muangx yie nyei qiex.
• Buangv eix nyei sieqv aac,
• baeng m'normh muangx yie oix gorngv nyei waac.
• ¹⁰ Buangv eix nyei m'sieqv dorn aac,
• aengx jiex yietc hnyangx lengh meih ziouc hnyouv huaang, sin zinx,
• weic zuqc a'ngunc huingx maiv maaih biouv.
• Siou biouv nyei ziangh hoc yaac maiv taux.
• ¹¹ Meih mbuo kuh yiem kuh nyanc nyei m'sieqv dorn aac, oix zuqc sin zinx.
• Meih mbuo buangv eix nyei sieqv aac, oix zuqc hnyouv huaang nyanh nyanh nyei.
• Jaiv nqoi lui-houx,
• sai jienv la'maah ndie-cou.
• ¹² Meih mbuo oix zuqc weic meih mbuo longx haic nyei lingh deic
• caux ziangh duqv gitv nyei a'ngunc hmei nzuei la'kuotv. * Ninh mbuo nzuei la'kuotv bun cing ninh mbuo nzauh.
• ¹³ Oix zuqc weic yie nyei baeqc fingx nyei ndau
• kungx cuotv njimv-cou njimv-muonc,
• yaac weic njien-youh nyei zingh
• caux yietc zungv orn-lorqc nyei biauv nzauh nyiemv.
• ¹⁴ Hungh dinc oix zuqc guangc huaang,
• maaih baeqc fingx camv nyei zingh kungx nzengc mi'aqv.
• Mbong-aiv weih wuonv nyei dorngx caux laauh oix zuqc yietc liuz benx ndau-huaang,
• zoux hieh lorh a'hneiv nyei dorngx caux yungh guanh nyei miev-ciangv.
• ¹⁵ Zuov taux Singx Lingh yiem gu'nguaaic dox njiec yie mbuo,
• ndau-huaang ziouc tiuv benx ndau-longx,
• ndau-longx yaac buatc hnangv ndiangx-lomc.
• ¹⁶ Baengh fim nyei jauv ziouc yiem deic-bung-huaang,
• zoux horpc nyei jauv yaac yiem ndau-longx.
• ¹⁷ Zoux horpc nyei jauv bun mienh maaih baengh orn,
• zoux horpc nyei jauv cuotv taaix-baengh nyei sic
• caux maaih lamh kaux dorngx weic yietc liuz.
• ¹⁸ Yie nyei baeqc fingx duqv yiem baengh orn nyei dorngx,
• duqv yiem wuonv nyei biauv,
• sekv nzieqc nyei hitv kuonx dorngx.
• ¹⁹ Maiv gunv duih borqc njiec mborqv ndiangx-lomc mbaang,
• zingh yaac zuqc baaic nzengc,
• ²⁰ meih mbuo yiem diuh diuh ndoqv-hlen zuangx ga'naaiv,
• bungx meih mbuo nyei ngongh caux lorh sueih jienv mingh nyanc miev,
• naaiv nyungc mienh ziouc maaih orn-lorqc.