Oix Zuqc Kaux Tin-Hungh
Maiv Zeiz Kaux I^yipv

• ¹ Mingh kaux I^yipv Mienh wuov deix oix zuqc kouv aqv.
• Ninh mbuo kaux I^yipv Mienh nyei maaz,
• yaac kaux ninh mbuo mborqv jaax nyei maaz-cie camv,
• yaac kaux ninh mbuo nyei geh maaz baeng weic zuqc ninh mbuo henv haic,
• mv baac ninh mbuo maiv kaux I^saa^laa^en nyei Cing-Nzengc Tin-Hungh
• fai lorz Ziouv tengx.
• ² Mv baac Ziouv maaih cong-mengh ziouc oix bun zuqc zeqc naanc.
• Ninh yaac maiv tuix ninh nyei waac.
• Ninh oix jiez daaih caux orqv mienh nyei zeiv-fun
• caux tengx orqv mienh wuov deix doix-dekc.
• ³ I^yipv Mienh m'daaih baamh mienh, maiv zeiz zienh.
• Ninh mbuo nyei maaz m'daaih maaih orv maaih nziaamv nyei, maiv zeiz benx wuonh.
• Ziouv yietv sung buoz,
• tengx mienh nyei mienh
• caux duqv mienh tengx wuov deix zungv oix ndiqv zuqc ndorpc.
• Ninh mbuo ziouc yietc njiec zuqc mietc nzengc.

⁴ Ziouv hnangv naaiv gorngv mbuox yie,

• “Hnangv dauh sienh fai sienh lunx
• njunh ninh caa daaih nyei orv,
• maiv gunv heuc guanh bungx yungh nyei mienh camv nyei
• gapv zunv daaih borngz ninh,
• ninh maiv gamh nziex ninh mbuo yietc zungv heuc nyei qiex.
• Ninh yaac maiv huaang ninh mbuo mbiouh mbiouh nyei heuc.
• Nernh Jiex nyei Ziouv oix hnangv wuov nor njiec daaih
• yiem Si^on Mbong caux
  Si^on nyei mbong-aiv dorngx mborqv jaax.
• ⁵ Hnangv norqc ndaix youh jienv gu'nguaaic mangc,
• Nernh Jiex nyei Ziouv oix hnangv naaiv nor beu jienv Ye^lu^saa^lem.
• Ninh oix beu jienv yaac njoux,
• ninh oix jiex gu'nguaaic * Beiv mangc Cuotv I^yipv 12:13 . siex cuotv.”

⁶ O I^saa^laa^en Mienh aah! Nzuonx daaih lorz Ziouv, dongh meih mbuo ngaengc duqv hniev wuov dauh. ⁷ Taux wuov hnoi meih mbuo dauh dauh oix zorqv meih mbuo ganh nyei buoz baamz zuiz longc jiem longc nyaanh zoux daaih nyei miuc-fangx zoi guangc.

• ⁸ “Atc^si^lie Mienh oix zuqc nzuqc ndaauv daix, yaac maiv zeiz mienh nyei nzuqc.
• Maaih nzuqc ndaauv oix naqv nzengc ninh mbuo, mv baac maiv zeiz baamh mienh nyei nzuqc.
• Ninh mbuo oix biaux nzuqc ndaauv,
• ninh mbuo nyei mienh lunx mienh oix zuqc aapv zoux gong kouv.
• ⁹ Ninh mbuo nyei hungh diex * Hipv^lu waac gorngv la'bieiv. Maaih deix sou faan daaih gorngv hungh diex fai zienh fai weih wuonv nyei dorngx. laaix gamh nziex ziouc biaux.
• Ninh mbuo nyei domh baeng-bieiv ba'laqc gamh nziex ziouc guangc jienv mborqv jaax nyei geh biaux.”
• Naaiv se maaih douz yiem Si^on
• yaac maaih douz-louh yiem Ye^lu^saa^lem nyei Ziouv gorngv nyei waac.