I^saa^yaa 1 (Isaiah 1)

I^saa^yaa

Biux Mengh Waac

I^saa^yaa Sou cuotv mbuox gan yietc laanh mengh dauh hlo nyei mienh, se douc waac mienh, I^saa^yaa. I^saa^yaa yiem Ye^lu^saa^lem douc waac doix Yesu maiv gaengh cuotv seix 739-701 wuov deix hnyangx mbu'ndongx nyei dorngx. Naaiv buonv sou haih bun nqoi zoux buo ginc.

1) Da'yietv ginc se da'yietv taux faah ziepc juov zaang, doix zuqc naamh bung guoqv, Yu^ndaa, zuqc henv haic nyei guoqv, Atc^si^lie, haeqv ninh mbuo nyei ziangh hoc. I^saa^yaa hiuv duqv Yu^ndaa maiv zeiz kungx laaix Atc^si^lie henv haic cingx haih zuqc kouv hnangv, se laaix ninh mbuo ganh nyei zuiz. Ninh mbuo maiv muangx Tin-Hungh nyei waac yaac maiv kaux Tin-Hungh. Douc waac mienh,
I^saa^yaa, zoux sic yaac longc waac nzaaih nyei, hniev nyei, kuinx baeqc fingx caux ninh mbuo nyei bieiv zeiv goiv hnyouv zoux horpc, zoux baengh fim nyei jauv.
I^saa^yaa donv jienv ninh mbuo, bun ninh mbuo hiuv duqv ninh mbuo ngaengc, maiv muangx Tin-Hungh, ninh mbuo zungv oix zuqc kouv, zuqc mietc nzengc.
I^saa^yaa aengx gorngv zinh hoz waac, nqa'haav hingv lungh ndiev oix duqv baengh orn, yaac maaih dauh Ndaawitv nyei zeiv-fun oix cuotv daaih zoux gauh longx jiex nyei hungh.

2) Da'nyeic ginc se feix ziepc taux hmz ziepc hmz zaang yaac gorngv doix zuqc Yu^ndaa nyei mienh camv zuqc guaatv mingh Mbaa^mbi^lon, zuqc kouv, maiv lamh hnamv dorngx. Douc waac mienh douc waac gorngv Tin-Hungh oix bungx ninh nyei baeqc fingx yaac dorh ninh mbuo nzuonx Ye^lu^saa^lem Zingh jiez siang-gorn. Yiem sou naaiv deix ziex zaang gorngv mengh Tin-Hungh se gunv I^saa^laa^en Mienh nyei jauv-louc nyei Ziouv. Ninh nyei za'eix weic I^saa^laa^en Mienh se ninh oix lungh ndiev maanc fingx weic ninh mbuo duqv fuqv. Yiem Loz-Ngaengc Waac Sou mienh gauh zuoqc jiex se yiem I^saa^yaa Sou gorngv, “Ziouv nyei bou” wuov deix dorngx.

3) Da'faam ginc se hmz ziepc luoqc taux luoqc ziepc luoqc zaang. Naaiv ginc gauh camv jiex gorngv taux baeqc fingx nzuonx Ye^lu^saa^lem yaac kuinx mienh sienx dingc Tin-Hungh za'gengh oix ziux ninh caux ninh mbuo laengz nyei waac zoux ziangx. Fiev sou nyei mienh yaac kuinx jangx jienv zoux horpc caux baengh fim nyei jauv, siou longx Dingh Gong Hnoi nyei leiz, fongc horc ziec nyei leiz, caux daux gaux nyei jauv. Yesu jiez gorn zoux gong wuov zanc ninh longc I^saa^yaa Sou 61:1-2 weic gorngv mengh ninh nyei gong hnangv haaix nor.

Sou Gorngv
1:1-12:6	Donv nyei caux laengz nyei waac
13:1-23:18	Fingx-fingx mienh zuqc dingc zuiz
24:1-27:13	Tin-Hungh siemv lungh ndiev
28:1-35:10	Aengx maaih yietc kang donv nyei caux laengz nyei waac
36:1-39:8	Yu^ndaa nyei He^se^ki^yaa Hungh caux Atc^si^lie Mienh
40:1-55:13	Laengz nyei caux maaih lamh hnamv nyei waac
56:1-66:24	Donv nyei caux laengz nyei waac

I^saa^yaa 1

Baeqc Fingx Ngaengc Tin-Hungh

¹ Naaiv se Aamortv nyei dorn,
I^saa^yaa, buatc laauc yaangh nyei sic, gorngv taux Yu^ndaa caux Ye^lu^saa^lem nyei jauv-louc doix Utc^si^yaa, * Yotaam, * Aa^hatc * caux He^se^ki^yaa * zoux Yu^ndaa Hungh nyei ziangh hoc.

Hnyouv Ngaengc Nyei Baeqc Fingx

² Lungh aah! Muangx maah!

Ndau aah! Baeng m'normh muangx,

weic zuqc Ziouv gorngv,

“Yie dorh naamh nyouz yaac dorh ninh mbuo hlo daaih,

mv baac ninh mbuo ngaengc yie.

³ Ngongh zieqv duqv ninh nyei ziouv,

lorh yaac zieqv duqv ninh nyei ziouv nyei miev-zoh,

mv baac I^saa^laa^en Mienh zieqv maiv duqv,

yie nyei baeqc fingx maiv bieqc hnyouv.”

⁴ Aa, baamz zuiz nyei yietc guoqv mienh,

zuiz hniev haic nyei baeqc fingx,

zoux orqv sic nyei zuangv,

zoux baaic waaic nyei naamh nyouz.

Ninh mbuo guangc Ziouv,

mangc piex I^saa^laa^en nyei Cing-Nzengc Tin-Hungh.

Ninh mbuo huin nqaang leih ninh.

⁵ Meih mbuo weic haaix diuc ngaengc jienv mingh

ziouc oix zuqc aengx zuqc mborqv?

Ziangh norm m'nqorngv mun,

hnyouv yaac mau nzengc.

⁶ Yiem zaux-benv taux m'nqorngv-baengh,

ziangh sin maiv maaih yietc norm dorngx longx.

Kungx maaih faaux nziaamv, butv faang,

maaih nziaamv liouc cuotv nyei ga'naaiv-mun,

yaac maiv maaih haaix dauh zatv fai tengx beu,

fai longc youh nzaatv mun nyei dorngx.

⁷ Meih mbuo nyei guoqv benx ndau-huaang,

meih mbuo nyei zingh zuqc douz buov qui.

Meih mbuo mangc jienv nyei ziangh hoc,

ganh fingx mienh oix baaic waaic meih mbuo nyei deic-bung,

ziouc zuqc ganh fingx mienh mbienv

benx deic-bung-huaang nzengc.

⁸ Kungx zengc Si^on Zingh *

hnangv zuov a'ngunc huingx nyei liuh,

hnangv yiem guaa-wuom ndeic nyei liuh,

yaac hnangv zuqc weih gormx nyei zingh.

⁹ Se gorngv Nernh Jiex nyei Ziouv

maiv liouh njiec deix zeiv-fun cuotv singx maengc,

yie mbuo ziouc zuqc hnangv
So^ndom,

yaac hnangv Go^mo^laa. * Tin Deic Douh 19:24 ; Lomaa 9:29

Heuc I^saa^laa^en Mienh
Goiv Hnyouv Nzuonx

¹⁰ Meih mbuo zoux hlo, gunv
So^ndom Zingh nyei mienh aah!

Muangx Ziouv nyei waac maah!

Go^mo^laa Zingh nyei baeqc fingx aah!

Baeng m'normh muangx yie mbuo nyei Tin-Hungh njaaux nyei waac.

¹¹ Ziouv gorngv, “Meih mbuo fongc horc ziec ga'naaiv camv nyei,

weic yie maaih haaix nyungc eix leiz?

Yie duqv buov ziec nyei yungh gouv

caux uix junc nyei saeng-kuv hmei zungv gaux haic aqv.

Yie yaac maiv a'hneiv ngongh gouv

caux ba'gi yungh dorn caux yungh gouv nyei nziaamv. * Aamotv 5:21-22

¹² Meih mbuo daaih yiem yie nyei nza'hmien nyei ziangh hoc,

haaix dauh heuc meih mbuo daaih linc yie nyei laatc gu'nyuoz?

¹³ Meih mbuo maiv dungx aengx dorh

meih mbuo maiv lamh longc nyei ga'naaiv fongc horc bun yie,

meih mbuo nyei hung yie gamh nziev haic.

Siang-Hlaax caux Dingh Gong Hnoi caux heuc gapv zunv nyei domh wuic,

yie diev maiv duqv meih mbuo zoux nyei zuiz

caux meih mbuo gan leiz gapv zunv nyei wuic.

¹⁴ Yie nzorng haic meih mbuo nyei

Siang-Hlaax zipv caux dingc daaih nyei zipv.

Ih zanc yie ndaam hniev,

zungv haiz ndaam kouv haic.

¹⁵ Meih mbuo sung jienv buoz daux gaux nyei ziangh hoc,

yie oix buang jienv yie nyei m'zing maiv mangc meih mbuo.

Maiv gunv meih mbuo daux gaux camv,

yie maiv muangx.

Meih mbuo nyei buoz maaih daix mienh nyei nziaamv

guoqv buangv nzengc.

¹⁶ Meih mbuo oix zuqc saax ganh cing-nzengc daaih,

zorqv nqoi meih mbuo nyei orqv sic

bun yie maiv zuqc mangc.

Dingh njiec, maiv dungx zoux waaic sic.

¹⁷ Oix zuqc hoqc zoux horpc nyei sic,

lorz baengh fim nyei jauv,

tengx zuqc zeix nyei mienh. *

Oix zuqc beu guh hanh fu'jueiv

yaac tengx auv-guaav mbenc sung.”

¹⁸ Ziouv gorngv,

“Ih zanc daaih maah! Mbuo lomh nzoih caangh laangh daav za'eix.

Maiv gunv meih mbuo nyei zuiz hongc siqv,

zungv oix tiuv hnangv sorng nor mbopv baeqc.

Maiv gunv meih mbuo nyei zuiz nzanc siqv,

zungv oix baeqc hnangv ba'gi yungh biei.

¹⁹ Se gorngv meih mbuo buangv hnyouv muangx yie nyei waac,

meih mbuo ziouc duqv nyanc yiem deic-bung

gauh longx jiex nyei ga'naaiv.

²⁰ Mv baac se gorngv meih mbuo maiv kangv muangx, aengx ngaengc jienv nor,

meih mbuo ziouc zuqc nzuqc ndaauv mietc meih mbuo.”

Naaiv se Ziouv ganh nyei nzuih gorngv.

Siemv Zingh Nyei Zuiz

²¹ Naaiv norm ziepc zuoqv zingh ih zanc tiuv

hnangv benx maaic sin nyei m'sieqv dorn.

Zinh ndaangc maaih baengh fim buangv nzengc,

zoux horpc nyei sic yiem gu'nyuoz.

Mv baac ih zanc kungx maaih daix mienh nyei mienh yiem.

²² Meih mbuo nyei nyaanh tiuv benx nyaanh nqaiv,

meih mbuo nyei diuv-kuv peux jienv wuom.

²³ Meih mbuo nyei jien ngaengc yie,

yaac caux janx-zaqc zoux doic.

Dauh dauh a'hneiv zipv nyaanh hmuangx,

qaqv zoux weic duqv zingh nyeic.

Ninh mbuo maiv tengx goux guh hanh fu'jueiv,

auv-guaav nyei sic yaac maiv taux ninh mbuo nyei nza'hmien.

²⁴ Weic naaiv, Ziouv, dongh Nernh Jiex nyei Ziouv,

se I^saa^laa^en nyei henv haic Tin-Hungh gorngv,

“Mangc maah! Yie oix bun yie nyei ga'qiex baetv cuotv,

hingh jiex yie nyei win-wangv,

yaac jaauv win bun yie nyei win-jaa.

²⁵ Yie oix longc yie nyei buoz zoux bun meih mbuo.

Oix sinx meih mbuo hnangv sinx jiem nyaanh nyei nqaiv cuotv.

Se hnangv longc nzie-wuom nzox nzengc nor,

zorqv nqoi maiv cing-nzengc nyei yietc zungv.

²⁶ Yie oix bun meih mbuo nyei siemv zuiz jien hnangv loz wuov nor,

yaac bun meih mbuo nyei caangh laangh mienh hnangv daauh dangh wuov zanc.

Nqa'haav mienh ziouc heuc
naaiv norm zingh benx

Baengh Fim, Ziepc Zuoqv nyei Zingh.” *

²⁷ Si^on weic baengh fim nyei jauv duqv zuoqc nzuonx,

weic zoux horpc nyei jauv yiem zingh gu'nyuoz

goiv hnyouv nyei mienh yaac duqv zuoqc.

²⁸ Mv baac hnyouv ngaengc nyei mienh caux zuiz-mienh

oix lomh nzoih zuqc baaic nzengc.

Guangc Ziouv wuov deix

yaac oix zuqc mietc.

²⁹ “Meih mbuo oix zuqc nyaiv

laaix meih mbuo a'hneiv wuov deix mba'ong zuei ndiangx. *

Meih mbuo laaix meih mbuo ginv daaih nyei huingx

oix zuqc baaic hmien.

³⁰ Meih mbuo ziouc hnangv mba'ong zuei ndiangx, normh nqaai mingh,

yaac hnangv maiv maaih wuom nyei huingx.

³¹ Maaih qaqv nyei mienh ziouc hnangv la'maah suix nyei nyongh,

ninh zoux nyei gong hnangv douz-fing.

I nyungc zungv zuqc douz buov,

yaac maiv maaih haaix dauh mborqv duqv douz daic.”

Loz-Ngaengc Waac

Siang-Ngaengc Waac