I^saa^yaa 2 (Isaiah 2)

I^saa^yaa 2

Tin-Hungh Oix Baengh Orn Nyei
Gunv Lungh Ndiev

(Beiv mangc Mikaa 4:1-3 )

¹ Naaiv se Aamortv nyei dorn,
I^saa^yaa, buatc laauc yaangh nyei sic gorngv taux Yu^ndaa caux Ye^lu^saa^lem.

² Nqa'haav laai nyei hnoi,

zaangc Ziouv nyei biauv yiem nyei mbong

duqv liepc gauh hlang jiex zuangx mbong.

Zungv oix ceix gauh hlang jiex yietc zungv mbong-aiv.

Maanc guoqv mienh yaac oix ndutc ndutc nyei daaih.

³ Camv-fingx mienh oix daaih gorngv,

“Daaih maah! Mbuo lomh nzoih faaux Ziouv nyei mbong,

mingh taux Yaakopv nyei Tin-Hungh nyei biauv,

bun ninh njaaux mbuo hiuv duqv ninh nyei jauv,

yie mbuo ziouc duqv gan ninh nyei jauv yangh.

Weic zuqc ninh nyei leiz-latc oix yiem Si^on cuotv,

Ziouv nyei waac oix yiem Ye^lu^saa^lem cuotv mingh.”

⁴ Ninh oix siemv naaiv norm guoqv caux wuov norm guoqv gu'nyuoz nyei sic,

yaac weic camv-fingx mienh dunx sic.

Ninh mbuo ziouc zorqv ninh mbuo nyei nzuqc ndaauv daav benx laih bieiv,

ninh mbuo nyei cang daav benx pitv ndiangx-nquaah dueiv nyei limh ngau. * Yo^en 3:10 ; Mikaa 4:3

Guoqv caux guoqv yietc liuz maiv aengx mborqv jaax,

yiem naaiv mingh maiv hoqc linc mborqv jaax nyei jauv aqv.

⁵ O Yaakopv nyei zeiv-fun aah! Daaih maah!

Bun mbuo gan jienv Ziouv nyei njang yangh.

Tin-Hungh Oix Siemv
Zoux Maux Nyei Mienh

⁶ Meih guangc meih nyei baeqc fingx, Yaakopv nyei zeiv-fun,

weic zuqc ninh mbuo nyei guoqv

maaih dong bung daaih zoux faatv nyei jauv buangv nzengc.

Ninh mbuo mbouv guaax hnangv
Fi^li^saa^die Mienh,

yaac ei jienv ganh fingx mienh nyei leiz-fingx zoux. *

⁷ Ninh mbuo nyei guoqv maaih jiem nyaanh buangv nzengc,

ninh mbuo nyei zinh zoih maiv maaih soux mouc.

Ninh mbuo nyei deic-bung maaih maaz buangv nzengc.

Ninh mbuo mborqv jaax nyei maaz-cie yaac saauv maiv hingh.

⁸ Ninh mbuo nyei guoqv maaih miuc-fangx buangv nzengc,

ninh mbuo gueic njiec baaix ninh mbuo ganh nyei buoz zoux daaih nyei ga'naaiv,

se ninh mbuo ganh nyei buoz-ndoqv zoux daaih nyei ga'naaiv.

⁹ Dauh dauh mienh ziouc zuqc zatv njiec,

yaac zuqc nyaiv, zuqc baaic hmien.

Maiv dungx guangc ninh mbuo nyei zuiz. *

¹⁰ Oix zuqc bieqc mbaengx-kuotv,

bingx jienv ndau-kuotv gu'nyuoz,

weic gamh nziex haic Ziouv *

caux ninh njang-laangc nyei haangh daauh. *

¹¹ M'zing hlang, zoux maux nyei mienh oix zuqc zatv njiec,

ceng-hlo nyei mienh oix zuqc baaic hmien.

Taux wuov hnoi kungx Ziouv ganh duqv mienh taaih.

¹² Nernh Jiex nyei Ziouv dingc norm hnoi

weic bun yietc zungv zoux maux, ceng ganh hlo,

caux yietc zungv taaih ganh nyei mienh.

Ninh mbuo zungv zuqc zatv njiec aiv,

¹³ weic Le^mbaa^norn hlo hlang nyei yietc zungv si^ndaa zongh ndiangx,

caux Mbaasaan nyei yietc zungv mba'ong zuei ndiangx,

¹⁴ weic yietc zungv domh zorng

caux yietc zungv mbong-hlang.

¹⁵ weic norm-norm hlang haic nyei laauh,

caux norm-norm wuonv nyei zingh laatc.

¹⁶ weic Taansitv nyei poux-poux domh nzangv,

caux yietc zungv nzueic haic nyei nzangv.

¹⁷ Zoux maux nyei mienh oix zuqc zatv njiec aiv,

ceng-hlo nyei mienh yaac oix zuqc baaic hmien.

Taux wuov hnoi kungx Ziouv ganh oix duqv mienh taaih.

¹⁸ Yietc zungv miuc-fangx yaac oix zuqc baaic nzengc.

¹⁹ Ziouv jiez daaih bun ndau dongz wuov zanc,

mienh ziouc biaux bieqc la'bieiv-mbaengx nyei kuotv,

yaac bieqc ndau nyei kuotv,

weic gamh nziex haic Ziouv, * Beiv mangc I^saa^yaa 2:10

yaac biaux ndutv ninh njang-laangc nyei haangh daauh.

²⁰ Taux wuov hnoi, mienh oix zorqv
weic ganh zoux daaih baaix nyei jiem-miuc-fangx caux nyaanh miuc-fangx,

zoi bun louh caux mba'mbui.

²¹ Ziouv jiez daaih bun ndau dongz wuov zanc,

mienh oix biaux bieqc la'bieiv-mbaengx-kuotv caux mbaengx-ngaamh,

weic gamh nziex haic Ziouv, * Beiv mangc I^saa^yaa 2:10

yaac biaux ndutv ninh njang-laangc nyei haangh daauh.

²² Leih nqoi, maiv dungx kaux baamh mienh.

Maiv gunv ninh nyei mba'zorng maaih qiex tauv,

haih funx ninh benx haaix nyungc maaih lamh longc?