สีง ฑูง 8

ทิน-ฮู่ง เญย ฌัง-หล่าง
เหธา เมี่ยน เญย ฌัง-หล่าง

จิว ปุน ต้อ ฑูง เญย เมี่ยน. หฒิว กิด^ทิด. ดา^วิด โหฒ่ เญย สีง ฑูง.

• ¹ โอ เฒี้ยว, เยีย บัว เญย เฒี้ยว อ่า,
• เม่ย เญย เม่ง เก้ง โฮล ไห่ ปวั๊ง ลู่ง เดี๊ย.
• เมี่ยน เธง เม่ย เญย ฌัง-หล่าง,
• เถา กู้ หงว่าย ลู่ง.
• ² ฝุเจว๊ย เหธา กู้งว์า
• เห่ว เจี๊ยน เธง เฒี้ยว. * มัด^ทาย 21:16
• หลาย เม่ย เญย วิน-วั้ง
• เม่ย เหลียบ ต๋อง ว้วน เญย,
• ปุน แหง่ง เม่ย เหธา อ๋อย จ๊าว เซี่ยว วั้ว เต๋ย ตี้ง เหฌี่ย.
• ³ เยีย เธา เฮมียน หมั่ง ลู่ง,
• ปวัด เม่ย หล่ง ปั์ว เหฒย ต้าย เญย กะน้าย,
• ปวัด หฮลา เหธา เหฮลย,
• เซ เม่ย กั้น ปุน นิ่น บัว ม่าย กั้น เญย ต๋อง เยียม.
• ⁴ เม่ย ฝุน ป้าม เมี่ยน เป๋น หาย หญู่ง หธีง จั๋ง เถา นิ่น? * โย้บ 7:17-18 ; สีง ฑูง 144:3 ; ฮิบ^ลู 2:6-8
• ฝุน เสย หฒั่ง เมี่ยน เป๋น หาย หญู่ง หธีง ต้าย โก๋ว นิ่น?
• ⁵ เม่ย ปุน นิ่น โหฒว เก้า ไอ๊ เต๋ย เม่ย กั้น, * ฮิบ^ลู หว่า ก๊อง ทิน-ฮู่ง ไฟ เฒี่ยน. กีก หว่า ก๊อง ฟิน-เมี่ยน.
• แอ๋ง ท่าย นิ่น, ปุน นิ่น ม่าย ฌัง-หล่าง เหว่ย โหฒว ฮู่ง นี้ง.
• ⁶ เม่ย พ้าย นิ่น กุ๊น เม่ย เญย ปั์ว เหฒย ต้าย เญย หญู่งๆ,
• หย่า ออน นิ่น โหฒว เฒี้ยว กุ๊น หม่าน หมวด, * ฮิบ^ลู หว่า ก๊อง ``ปุน หญู่งๆ เยียม นิ่น เญย เหฒา-เดี๊ย.'' * 1 โค^ลิน^โท 15:27 ; เอ^เฟ^โซ 1:22 ; ฮิบ^ลู 2:8
• ⁷ เซ กุ๊น เหยียด ฒู้ง ง่ง เหธา ยู่ง,
• เหธา เยียม หล่ม เญย เฮยี่ย ฒ่อย,
• ⁸ เยียม ด๊าม-ลู่ง เญย เหนาะ,
• เยียม ค้อย เญย เบย์า,
• เหธา เยียม ค้อย มี่งๆ ต้ายๆ เญย เหยียด ฒู้ง กะน้าย.
• ⁹ โอ เฒี้ยว, เยีย บัว เญย เฒี้ยว อ่า,
• เม่ย เญย บั๋ว เก้ง โฮล! ไห่ ปวั๊ง ลู่ง เดี๊ย.