สีง ฑูง 31 (Psalms 31)

สีง ฑูง 31

สีง ฑูง 31

เต๋า เก๋า ปุน ธีง เขา เฒี้ยว

จิว ปุน ต้อ ฑูง เญย เมี่ยน.
ดา^วิด โหฒ่ เญย สีง ฑูง.

¹ เฒี้ยว อ่า, เยีย ด้าว เขา เม่ย.

โท้ ปุน เยีย เหยียด ลิ์ว ไม้ หฒุ ไญ้.

เม่ย เซ แป้ง ฟิม เญย ทิน-ฮู่ง, โท้ เม่ย เหฌียว เยีย.

² โท้ แปง มน่อม หมวัง เยีย,

เซี้ยบๆ เญย เหฌียว เยีย.

โท้ โหฒว เยีย ด้าว เขา เญย หละเปย๊ย,

โหฒว เว่ย เจี๊ยน ว้วน เญย ต๋อง เหฌียว เยีย.

³ เม่ย โหฒว เยีย เญย หละเปย๊ย เหธา เยีย ว้วน เญย ต๋อง.

เหว่ย เม่ย กั้น เญย เม่ง โท้ ต้อ เยีย, เยี์ยน เยีย เญย เจ๊า.

⁴ โท้ ปุน เยีย เปย๋า ดุ๊ด เมี่ยน เหว่ย เยีย แฒง เญย มู์ง,

เหว่ย หฒุ เม่ย โหฒว เยีย ด้าว เขา เญย ต๋อง.

⁵ เยีย เฒาะ เยีย เญย ลี่ง ว่วน

จิว ปุน เยียม เม่ย เญย ปั์ว กะญั์ว. * ลู^กา 23:46

โอ เฒี้ยว, เหฒียบ ฒัวะ เญย ทิน-ฮู่ง อ้า!

เม่ย ฒู้ง หฒัวะ เยีย ต้าย อ๊ะ.

⁶ เม่ย * ฑอง ไห่ ป๋าย ไม้ ลั่ม หล่ง เญย หมิ่ว-ฝัง วั้ว เต๋ย,

มป่า เยีย เขา เฒี้ยว.

⁷ เม่ย เหฒียบ ฒัวะ เญย ฮนั้ม เยีย, เยีย ฯฒฯ เฌียน-โย่ว อะเฮน้ย,

เหว่ย หฒุ เม่ย ปวัด เยีย เญย โค้ว หน่าน,

หย่า ฮิ้ว ตุ๊ เยีย เญย เฮญี้ยว เฑ่า เญย เจ๊า.

⁸ เม่ย หย่า ไม้ เฒาะ เยีย จิว ปุน เยียม วิน-วั้ง เญย ปั์ว-เดี๊ย.

เม่ย ปุน เยีย เญย เหฒา ธ้าย เจี๊ยน จั๊ง เญย ต๋อง.

⁹ โอ เฒี้ยว อ่า, โท้ เม่ย ค้อ-เลี่ยน เยีย, เหว่ย หฒุ เยีย โค้ว ไห่.

เยีย เฑ่า เญี้ยม, มฒีง ฒู้ง ไม้ ฌัง อ๊ะ.

เยีย เญย ซิน เหธา เฮญี้ยว โค้ว เหฑ่ง.

¹⁰ เยีย เญย แหม่ง หฒุ เฑ่า โค้ว ฮนั้ง,

หฮญัง เจี๋ย หฮญัง ขูง ฌุ่น เจี๊ยน เยียม.

หลาย เยีย หฒุ เญย โค้ว หน่าน * เยีย เญย ชะ เมา เจี๊ยน เหฌี่ย,

ฒู้ง โค้ว เถา บู๊ง ฆาย.

¹¹ เยีย เญย เหยียด ฒู้ง วิน-วั้ง ฮว้วด เยีย,

เยีย เญย จวั่ง ล์าง เมี่ยน หมั่ง เผีย เยีย.

ฮิ้ว ตุ๊ เยีย วั้ว เต๋ย เก้ง! กั้ม เหฑีย เยีย.

เลี่ยม เยียม เจ๊า หฒั่ง ปวั้ง เยีย วั้ว เต๋ย หย่า เปย๋า เยีย.

¹² นิ่น บัว หละคุ เยีย,
ไม้ จั๋ง เยีย ฮนั้ง เยีย ไต่ หมี่ อ๊ะ นอ.

เยีย ฮนั้ง เบ๊าะ ฮู้ เญย เนีย-มอ.

¹³ เยีย ไฮ์ เมี่ยน ธั้ม เญย ก๊อง หว่า-ซับ,

ม่าย กั้ม เหฑีย ไห่ เญย สี่ เว่ย ก๋อม เยีย.

นิ่น บัว ธ่าง ล่าง ห่อย เยีย,

ต๊า หฒะเอ๋ย เฒาะ เยีย เญย แหม่ง.

¹⁴ มป่า เฒี้ยว อ่า, เยีย เขา เม่ย.

เยีย ก๊อง, ``เม่ย โหฒว เยีย เญย ทิน-ฮู่ง.''

¹⁵ เยีย เฒี่ยง เญย ฮนอย-เหญียะ เยียม เม่ย เญย ปั์ว,

โท้ เหฌียว เยีย เปย๋า ดุ๊ด เยีย เญย วิน-วั้ง

เหธา เหฒย เยีย วั้ว เต๋ย เมี่ยน เญย ปั์ว-เดี๊ย.

¹⁶ โท้ ปุน เม่ย เญย เฮมียน เญย ฌัง หฒิว เยีย, เม่ย เญย โปว,

เหว่ย หฒุ เม่ย เหฒียบ ฒัวะ เญย ฮนั้ม เยีย, โท้ เหฌียว เยีย.

¹⁷ โอ เฒี้ยว อ่า, โท้ ปุน เยีย ไม้ หฒุ ไญ้,

เหว่ย หฒุ เยีย เห่ว เม่ย.

โท้ ปุน เอ๊าะ เมี่ยน หฒุ ไญ้,

เซ้ก เหฑียะ เญย มี่ง เยียม เยี่ยม เกน.

¹⁸ โท้ ปุน ก๊อง-แปะ เมี่ยน เญย ฑุ่ย,

ต้ง นิ่น บัว เธง-โฮล, ปู๋ง หว่า-เหมา,

ก๊อง โตะ คู้ เมี่ยน วั้ว เต๋ย เญย ฑุ่ย หฮงง มี่ง, ไม้ ไฮ่ ก๊อง หว่า.

¹⁹ เม่ย หฒะเก้ง หลง ไห่.

เม่ย เซียว หลง เญย กะน้าย หย่า ปู๋ง-หฒัวะ,

แอ๋ง เยียม ป้าม เมี่ยน เญย หฑะเฮมียน

ปุน ท่าย เม่ย, ด้าว เขา เม่ย เญย เมี่ยน.

²⁰ เม่ย ต้อ นิ่น บัว ปี๋ง เจี๊ยน เม่ย เญย หฑะเฮมียน เบว์ย เญย ต๋อง,

เปย๋า ดุ๊ด เมี่ยน ต๊า หว่าย เญย หฒะเอ๋ย.

เม่ย ปุน นิ่น บัว เยียม นอม ต๋อง เปว เจี๊ยน นิ่น บัว,

เปย๋า ดุ๊ด ก๊อง โตะ แฑง จ๋า เญย หว่า.

²¹ อ๋อย หฒุ เธง เฒี้ยว,

เหว่ย หฒุ เยีย เยียม หฒุ เว่ย เจี๊ยน เญย ฒี่ง เญย เฒี่ยง โห่,

เม่ย ปุน ธีง เม่ย หฒะเก้ง! เหฒียบ ฒัวะ เญย ฮนั้ม เยีย.

²² เยีย หฒุ แฮะ กั้ม เหฑีย เญย เฒี่ยง โห่ เยีย ก๊อง,

``เยีย เยียม เม่ย เญย หฑะเฮมียน หฒุ หฒุ่น เล่ย โก.''

มป่า เยีย เห่ว เจี๊ยน โท้ เม่ย เถง,

เม่ย หย่า ไฮ์ เยีย โท้ เญย หว่า.

²³ เฒี้ยว เญย หฒวัง ธีง-เหฑ่ง แปะ ฝีง อ้า!

อ๋อย หฒุ ฮนั้ม เฒี้ยว.

นิ่น เปว เจี๊ยน เหฒียบ ฒัวะ เญย เมี่ยน,

มป่า เฮนี้ยๆ เญย วิ่น ปุน โหฒว เหมา เญย เมี่ยน.

²⁴ ตะฟ่าน ฒั้ว เจี๊ยน เฒี้ยว เญย เมี่ยน

อ๋อย หฒุ เฮ้น, หฒูง เจี๊ยน ต๊าม.