ธง-เม่ง หว่า 26 (Proverbs 26)

ธง-เม่ง หว่า 26

¹ เธง เมี่ยน หฮงง เมี่ยน เซ ไม้ ผุย,

ฮนั้ง ฆาย กอง ตุ้ย ซอง,

ไฟ เซียว แกง-หฒวัง เญย เฒี่ยง โห่
ตุ้ย บยู่ง.

² เหฒียว เมี่ยน หย่า ไม้ ม่าย กอน-แป๋ง หย่า เหฒียว ไม้ หฒุ,

ฮนั้ง เหนาะ เหมย ไฟ เหนาะ บะหิน ได๋ มี่ง ได๋ ต้าย หย่า ไม้ หฑบ นอ.

³ ปย๊า-ปิน หล่ง เบ๊าะ ม์า, ฮั่น โค้ว ฟับ ล่อ เญย ฑุ่ย แป๋ง,

ปย๊า หล่ง เบ๊าะ เมี่ยน หฮงง เมี่ยน เญย
ติ ต์าน.

⁴ ไม้ ตู๋ง เตา เมี่ยน หฮงง เมี่ยน หฒิว นิ่น หฮงง เญย หว่า,

เหฑีย เม่ย กั้น ฯฒฯ เหธา นิ่น ฟี่ ฮนั้ง.

⁵ อ๋อย หฒุ เตา เมี่ยน หฮงง เมี่ยน หฒิว นิ่น หฮงง เญย หว่า,

เหฑีย เอย นิ่น เญย มฒีง หมั่ง, นิ่น ฝุน นิ่น กั้น ม่าย ธง-เม่ง.

⁶ หาย เต้า ปั่ง เมี่ยน หฮงง เมี่ยน ฝูง เฝียน,

เซ ฮนั้ง ฮงะ กั้น เญย เหฒา ดุ๊ด ฯฒฯ ห่อย กั้น. *

⁷ ธง-เม่ง หว่า เยียม เมี่ยน หฮงง เมี่ยน เญย ฑุ่ย เซ ไม้ ลั่ม หล่ง,

ฮนั้ง เหฒา ไบ เมี่ยน เญย เหฒา ไม้ ลั่ม หล่ง. *

⁸ เธง เมี่ยน หฮงง เมี่ยน

เซ ฮนั้ง เฒาะ หละเปย๊ย เฮยี้ยด เจี๊ยน ด๊บ-ฮลาง. *

⁹ ธง-เม่ง หว่า เยียม เมี่ยน หฮงง เมี่ยน เญย ฑุ่ย,

ฮนั้ง ฌิ้ม เยียม ติ๊ว ฆวิน เมี่ยน เญย ปั์ว.

¹⁰ หาย เต้า ธี้ง เจี๋ย เจ๊า เญย เมี่ยน หฮงง เมี่ยน ไฟ ติ๊ว ฆวิน เมี่ยน,

เซ ฮนั้ง ป๊วน จวัง-หฒิน เญย เมี่ยน หละไกว้ ป๊วน ปุน หฒวัง เมี่ยน หฒุ มุน. *

¹¹ เมี่ยน หฮงง เมี่ยน โหฒว หฮงง เญย สี่, โหฒว ลิ์ว แอ๋ง โหฒว,

เซ ฮนั้ง จู๊ หฑวน มี่ง หญั่น นิ่น โล้ เญย กะน้าย. * 2 ปี^เต 2:22

¹² เม่ย ปวัด เมี่ยน ฝุน นิ่น กั้น ม่าย ธง-เม่ง ไฟ?

เมี่ยน หฮงง เมี่ยน ฒู้ง ม่าย ลั่ม ฮนั้ม เก้า ธั้ม นิ่น.

¹³ เมี่ยน เหลว่ย เมี่ยน ก๊อง, ``ม่าย เซี่ยน เยียม วั้ว เจ๊า!

ม่าย เต้า เซี่ยน เยียม วั้ว จาย-ห่อง.''

¹⁴ แก้ง หนาบ ฮนั้ง หาย นอ ปุน แก้ง คอย มี่ง คอย ต้าย,

เมี่ยน เหลว่ย เมี่ยน เปว๋ย เจี๊ยน โหธว ฮนั้ง วั้ว นอ เบี๊ยน มี่ง เบี๊ยน ต้าย.

¹⁵ เมี่ยน เหลว่ย เมี่ยน เญย ปั์ว ตั๊บ เปียะ หฑ่อม,

โป้ว ฝาว กั้น เญย ฑุ่ย นิ่น ฒู้ง เฆ่ม โค้ว ไห่.

¹⁶ เมี่ยน เหลว่ย เมี่ยน หฒิว กั้น เญย มฒีง หมั่ง นิ่น ม่าย ธง-เม่ง,

เก้า ธั้ม เสี่ย เต้า เตา ตุ๊ หอบ เญย เมี่ยน.

¹⁷ เมี่ยน แฑง จ๋า เญย สี่ ไม้ เกวน หฒุ บัว, บัว หย่า มี่ง หละเญ้า,

เซ ฮนั้ง จู๊ เจี๋ย เจ๊า, เมี่ยน หละไกว้ แปง จู๊ เญย มน่อม.

^18-19 หาย เต้า ดั๊ว นิ่น เญย จวั่ง ล์าง เมี่ยน

หย่า ก๊อง, ``เยีย ก๊อง อะหฑย่าว ฮนั้ง เหลาะ!''

นิ่น เซ ฮนั้ง ปุ๊ด-ดิน เมี่ยน

ฒอย โต์ว-ป๊า เหธา ฟอง-ธัง,

เหธา ปุน เมี่ยน หฒุ ไต่ เญย กะน้าย.

²⁰ ไม้ ม่าย ฒ่าง, โต์ว ฯฒฯ ไต่ หมี่ อ๊ะ.

หาย เดา ไม้ ม่าย เมี่ยน ก๊อง หว่า-ซับ หว่า-ฮู้,

แฑง จ๋า เญย เจ๊า ฯฒฯ ตี้ง อ๊ะ.

²¹ แฑง จ๋า เญย เมี่ยน แฑง จ๋า ปุน สี่ ธ้วด,

ฮนั้ง โต์ว-ถาน จา เจี๊ยน โต์ว

เหธา ฒ่าง ตั๊บ เจี๊ยน เหฒียะ เจี๊ยน โต์ว เญย โต์ว-เหฑ่า.

²² ก๊อง หว่า-ซับ ต้าน เมี่ยน เญย หว่า,

เซ ฮนั้ง ตุ๊ หญั่น อ๋า คู้ เญย กะน้าย,

นะ เหฌี่ย เถา กะเซีย.

²³ ฑุ่ย กาม เฮญี้ยว เธี้ยว,

เซ ฮนั้ง เนีย-มอ ฑ้าด เจี๊ยน หลิ่ว * นอ.

²⁴ เมี่ยน ฑอง เมี่ยน หย่า หล่ง ฑุ่ย กั้น หญู่ง ก๊อง.

เยียม เฮญี้ยว นิ่น ขูง ดั๊ว เมี่ยน ฮนั้ง.

²⁵ นิ่น ก๊อง คู่ หมวัง เญย หว่า เม่ย ไม้ ตู๋ง เสียน นิ่น,

เหว่ย หฒุ เยียม นิ่น เญย เฮญี้ยว ม่าย เสี่ย หญู่ง * กั้ม เฑี้ย เญย สี่.

²⁶ ไม้ กุ๊น นิ่น หล่ง กู๊ ไกว๋ เญย หฒะเอ๋ย ปวัง เจี๊ยน นิ่น แฑง เญย เจ๊า,

นิ่น เญย เอ๊าะ สี่ อ๋อย เยียม เมี่ยน ธั้ม กั๊บ ฒุ้น เญย ต๋อง ธ้วด ต้าย.

²⁷ หาย เต้า เว้ด ค้วด, กั้น ฯฒฯ ด๊อด เปียะ ค้วด กะญั์ว.

หาย เต้า ฟ้ง หละเปย๊ย, หละเปย๊ย แอ๋ง อ๋อย ต๋าว ฆาง ดั๊บ นิ่น.

²⁸ เมี่ยน เญย ฑุ่ย ก๊อง-แปะ ห่อย นิ่น ฑอง เญย เมี่ยน.

หล่ง ฑุ่ย หละไกว้ เธง เมี่ยน หย่า ป่าย หว่าย เมี่ยน.