ธง-เม่ง หว่า 17 (Proverbs 17)

ธง-เม่ง หว่า 17

¹ ดุ อ๋า หฮนาง-ฆาย, เปย๊า หย่า แป้ง ออน เซ้ก เญย,

เซ เก้า หลง ม่าย อ๊อ ติ๊ว ปวั๊ง เตี้ย หย่า ม่าย แฑง จ๋า เญย สี่.

² โหฒว ตุ๊ กง หลง, ธง-เม่ง เญย โปว * ไฟ โน่ว. ตุ๊ กุ๊น นิ่น เญย เฒี้ยว โหฒว สี่ ไญ้ เญย ตอน,

ฯฒฯ ตุ๊ หฑิบ ป่วน ด่ง เหยียด เต้า วั้ว เต๋ย มั์ว-ตอน ต่อย.

³ ญ่าน เคาะ เซ เหว่ย สิน ญ่าน, โล่ว เซ เหว่ย สิน เจียม,

เซ เฒี้ยว เสย เมี่ยน เญย เฮญี้ยว.

⁴ โหฒว เอ๊าะ เญย เมี่ยน หมวัง เมี่ยน หว่าย เมี่ยน เญย ฑุ่ย ก๊อง.

ก๊อง-แปะ เมี่ยน หมวัง ก๊อง-แปะ เมี่ยน เญย หว่า.

⁵ หาย เต้า ฮว้วด เมี่ยน จ่ม เมี่ยน เซ หมั่ง เผีย เหฒย นิ่น ต้าย เญย ทิน-ฮู่ง.

หาย เต้า อะเฮน้ย เมี่ยน หฒุ เหฒะ หน่าน, วั้ว เต้า เปย๋า ไม้ ดุ๊ด ตี่ง ฒุ์ย.

⁶ ฝุเจว๊ย-ฟุน เป๋น เมี่ยน โก๋ เมี่ยน เญย นี้ง, *

เตี๋ย หม่า เป๋น ฝุเจว๊ย เญย ฌัง-หล่าง.

⁷ เมี่ยน หฮงง เมี่ยน ปู๋ง หว่า-เหมา *
เซ ไม้ ผุย.

โหฒว โฮล เญย เมี่ยน ก๊อง-แปะ เซ เก้า ฟัด ไม้ ผุย.

⁸ หฒิว ปุน เญย เมี่ยน เญย มฒีง ปวัด, ญ่าน หฮมวัง เป๋น ปู๊ อ๊ะ,

ไม้ กุ๊น ฮวิน หาย ปูง หย่า ไฮ่ ตุ๊ หลง.

⁹ หาย เต้า กวั่ง ฆอย เมี่ยน โหฒว ต่อง เญย สี่ ฯฒฯ ตุ๊ เมี่ยน ฮนั้ม,

มป่า หาย เต้า หฑั่ม โหฒว ต่อง เญย เจ๊า ฯฒฯ แธะ ฆอย โล์-แกง ต่อย.

¹⁰ เหยียด โจ๋ว ก๊อง-เหม เญย หว่า ไฮ่ เถง เฮญี้ยว เม่ง แปะ เญย เมี่ยน

เก้า ธั้ม เมี่ยน หฮงง เมี่ยน หฒุ เบ๊าะ เหยียด แป๊ะ ปย๊า.

¹¹ เอ๊าะ เมี่ยน ขูง อ๋อย ล์อ เจ๊า ฟ้าน หลุ่น,

มป่า ฒู้ง ม่าย เต้า โตะ ไห่ เญย โต่ว เฝียน เมี่ยน อ๋อย ต้าย เบ๊าะ นิ่น.

¹² เมี่ยน มี่ง ปวั้ง เต้า หฒุ กวั่ง ตอน เญย เจี๊ยบ-เญ์ย,

เซ เก้า หลง ปวั้ง เมี่ยน หฮงง เมี่ยน โหฒว เจี๊ยน นิ่น หฮงง เญย สี่.

¹³ หาย เต้า โหฒว เอ๊าะ สี่ วิ่น เมี่ยน โหฒว เญย คู้ สี่,

เอ๊าะ เญย สี่ ฯฒฯ ไม้ เล่ย ฆอย นิ่น เญย เปย๊า.

¹⁴ เจี์ย กอน แฑง จ๋า เซ ฮนั้ง ปู๋ง ววม เหลี่ยว ธ้วด.

ฮนั้ง หน่าย อ๋อย หฒุ กวั่ง ฆอย ด่าง ม่าย แฑง จ๋า เญย สี่ ธ้วด.

¹⁵ หาย เต้า ปู๋ง โหฒว ต่อง เญย เมี่ยน,

หย่า ปุน ไม้ โหฒว ต๋อง เญย เมี่ยน *
หฒุ ตี่ง ฒุ์ย,

น้าย เต๋ย อี หญู่ง ฒู้ง ฟี่ ฮนั้ง เญย, เฒี้ยว โหยว ไห่.

¹⁶ เมี่ยน หฮงง เมี่ยน เญย ปั์ว เหว่ย หาย ติ่ว อ๋อย นั้น เจี๊ยน ญ่าน ม์าย ธง-เม่ง?

นิ่น ฒู้ง ไม้ ม่าย เฮญี้ยว โหะ ฮิ้ว.

¹⁷ โล์-แกง ต่อย หฒั่นๆ ฮนั้ม จ๋า,

มั์ว-ต่อย ธ้วด เสย เหว่ย เถง เจี๊ยน ดาม โค้ว หน่าน.

¹⁸ สัม ไม้ ธ้วด หาย หญู่ง เญย เมี่ยน แล์ง เปว เมี่ยน เญย แฒะ,

หย่า ตอง เจี๊ยน นิ่น เญย จวั่ง ล์าง เมี่ยน แล์ง โหฒว ดาม-ต้าว.

¹⁹ หาย เต้า อะเฮน้ย โหฒว หว่าย สี่, นิ่น อะเฮน้ย แฑง จ๋า.

หาย เต้า โหฒว เปย๊า เญย แก้ง ฮลัง * ฯฒฯ ล์อ เจ๊า ปุน กั้น หฒุ เหมียด.

²⁰ เฮญี้ยว ฌ้วด เญย เมี่ยน ไม้ ไฮ่ ตุ๊ หลง,

ก๊อง-แปะ เญย เมี่ยน ฒู้ง หฒุ เหฒะ หน่าน.

²¹ เตีย ม่าย ตอน หฮงง ฯฒฯ ปุน เตีย เฑ่า,

เมี่ยน หฮงง เมี่ยน เญย เตีย ไม้ ม่าย เฌียน-โย่ว.

²² เฮญี้ยว เฌียน-โย่ว เซ หลง ไห่ เญย เดีย.

เฮญี้ยว โค้ว ห่อย ซิน โค้ว เจี๊ยน เหฌี่ย. *

²³ เอ๊าะ เมี่ยน เป่ย เดี๊ย ฒิบ ญ่าน หฮมวัง

เหว่ย โหฒว หว่าย แป้ง ฟิม เญย เจ๊า.

²⁴ เมี่ยน ไกว เมี่ยน เญย เฮมียน หูง เจี๊ยน ธง-เม่ง เญย เจ๊า มี่ง,

มป่า เมี่ยน หฮงง เมี่ยน เญย มฒีง หมั่ง
ลู่ง กอน.

²⁵ หฮงง เญย ตอน ปุน นิ่น เญย เตีย หฒุ เฑ่า,

หย่า ปุน นิ่น เญย มา เฮญี้ยว มุน.

²⁶ ปาด คู้ เมี่ยน เซ ไม้ เป๋น,

เบ๊าะ เฮญี้ยว หลง เญย เมี่ยน *
หย่า ไม้ หอบ.

²⁷ หาย เต้า ไฮ่ เญี์ยน ตุ๊ นิ่น เญย หว่า
ม่าย ว่วน ฒาง,

ไฮ่ ฒั้น ตุ๊ เฮญี้ยว เญย เมี่ยน เซ ไฮ่ เม่ง แปะ เญย เมี่ยน.

²⁸ เลี่ยม เมี่ยน หฮงง เมี่ยน เซ้ก เหฑียะ, ไม้ โค โล, ฯฒฯ ฝุน ม่าย ธง-เม่ง,

นิ่น หฆับ เจี๊ยน ฑุ่ย ไม้ ก๊อง หว่า ฯฒฯ ฝุน ไกว.