นิ^นะ^เว หฒุ บาง

• ¹ นิ^นะ^เว ฒี่ง อ่า, ม่าย เมี่ยน ต้าย เบ๊าะ เม่ย อ๊ะ.
• อ๋อย หฒุ ม่าย เมี่ยน เยียม ฒี่ง เญย ล่าว ฒั้ว เจี๊ยน,
• บู้ง เจี๊ยน เจ๊า-คู้,
• หลิ่ว เล์ย เหฒียง,
• กั๊บ เจี๊ยน ชะ เบ๊าะ จ๋า.
• ² เฒี้ยว อ๋อย ปุน ยา^โค้บ เญย ฌัง-หล่าง หฑวน ต้าย ฮนั้ง โล์ วั้ว นอ,
• หย่า ฮนั้ง อิ^สะ^ลา^เอน เญย ฌัง-หล่าง,
• ไม้ กุ๊น โหฒว หว่าย เญย เมี่ยน ปุน นิ่น บัว หฒุ ป่าย หว่าย,
• หย่า ปุน นิ่น บัว เญย อะหงุ่น เฮมย-ฆว่า หว่าย เหฑ่ง.
• ³ นิ่น เญย เบ๊าะ จ๋า เฮ้น เญย แปง เญย ท้อง-ป้าย ซิ เญย.
• แปง ฒุ เญย ลุย-โหว ซิ-ห่ง.
• นิ่น บัว หลิ่ว เล์ย เบ๊าะ จ๋า วั้ว ฮนอย,
• เบ๊าะ จ๋า เธีย เญย เฮลียะ หฌับๆ เญย ฮนั้ง โต์ว นอ.
• เบ๊าะ จ๋า เญย ม์า เจี๋ย น้าย เจี๋ย วั้ว เป๊ะ เจี๊ยน มี่ง. * อี้ จ๋า ฮนอย เมี่ยน ไม้ ฮิ้ว ตี่ง น้าย โจ๋ว ฮิบ^ลู หว่า ม่าย หาย หญู่ง เอ๋ย เล์ย.
• ⁴ เบ๊าะ จ๋า เธีย ดุดๆ เญย กัน เฮย-ห่อง มี่ง,
• เยียม วั้ว ต้ม หฒวัง หฒ่าม เซี้ยบๆ เญย ถิว มี่ง ถิว ต้าย.
• ปวัด นิ่น บัว ฮนั้ง โต์ว-ป๊า นอ ฌัง,
• หย่า ฮนั้ง บะหลี่ง นอ เซี้ยบ.
• ⁵ นิ่น เห่ว นิ่น เญย แปง-เปย๊ย ต้าย,
• นิ่น บัว หย่า ดอบๆ เลาะๆ เญย มี่ง.
• นิ่น บัว ถิว เจี๊ยน มี่ง เถา ฒี่ง หลาด,
• เฒาะ ท้อง หวัวะ กิ่น เญย กะน้าย ท้อง เจี๊ยน. * โล์-ฮนอย เมี่ยน เบ๊าะ จ๋า นิ่น บัว หล่ง ติ้ว เดี๋ยง, หล่ง เฮลียะ ปวัง เจี๊ยน เตว๊ย-เมว์ย, แอ๋ง ดิ๋ว เจี๊ยน ชอง ฟ้ง มี่ง ฒง ฒี่ง หลาด แก้ง ฮู้. เยียม ฒี่ง หลาด กู้ หงว่าย วั้ว เต๋ย แปง ไฮ่ หล่ง หละเปย๊ย ฒอย เหฌี่ย ไฟ หล่ง จวัง-หฒิน ป๊วน เหฌี่ย. ฒง หลาด แก้ง เญย แปง ฯฒฯ หล่ง คว้าย กะน้าย จั๊ง เญย ท้อง เจี๊ยน นิ่น บัว เญย มฆ้อง กู้ หงว่าย.
• ⁶ แฒะ ด้าย เญย แก้ง คอย ฆอย หมี่ อ๊ะ,
• ฮู่ง ติ่น เญย เมี่ยน หลุ่น เหฑ่ง. * ไฟ ``ฮู่ง ติ่น หยุ เหฑ่ง หมี่ อ๊ะ'' ไฟ ``ฮู่ง ติ่น บาง เหฑ่ง หมี่ อ๊ะ''.
• ⁷ แปง เธี้ย เหฑ่ง ฮู่ง หม่า * เมี่ยน ไม้ ฮิ้ว ตี่ง น้าย โจ๋ว ฮิบ^ลู หว่า เญย เอ๋ย เล์ย. เญย ลุย-โหว,
• ธ้าง นิ่น มี่ง หมี่ อ๊ะ.
• นิ่น เญย มเซียะ โปว เฑ่า,
• เฑวย กั้น เญย หละค้วด
• เห่ว เจี๊ยน ฮนั้ง แปะ ก๊บ เห่ว เญย เฉีย.
• ⁸ นิ^นะ^เว เซ ฮนั้ง ววม-ต้ม,
• ววม เหลี่ยว เจี๊ยน ธ้วด.
• ม่าย เมี่ยน เห่ว เจี๊ยน ก๊อง, ``ตี้ง! ตี้ง!''
• มป่า ไม้ ม่าย หาย เต้า ฮวิน หฑวน.
• <sup>9</sup> ลู้ เจียม, ลู้ ญ่าน ม่าะ!
• ม่าย เญย ฒิ่น ฒ่อย ธั้ม ไห่, ฒู้ง ไม้ ไฮ่ เหฑ่ง,
• ม่าย หญู่งๆ จ๋าย ไห่ เญย กะน้าย.
• <sup>10</sup> ป่าย หว่าย ป่าย ฮวาง,
  หฒุ เหมียด เหฑ่ง อ๊ะโล่ะ!
• เมี่ยน เญย บะฑิว หยุ, ธี่ง เบาะ ฆ้าบ จ๋า,
• ซิน หฒั่ง เญย ชะ หฒิด หมี่ อ๊ะ.
• เต้าๆ เญย เฮมียน เบี่ยน เหฑ่ง.
• <sup>11</sup> เซี่ยน เญย ต๋อง
• เหธา ต้อ เซี่ยน ตอน เญย ค้วด เยียม หาย?
• เซ เซี่ยน โก๊ว เซี่ยน เญ์ย เปียะ ธ้วด เญย ต๋อง เยียม หาย? * ไฟ ``เซี่ยน ต้อ นิ่น เฒาะ ต้าย เญย อ๊อ ต้าย''.
• เซี่ยน ตอน เยียม วั้ว หย่า ไม้ ม่าย เมี่ยน แฮะ.
• ¹² เซี่ยน โก๊ว เป๊ด นิ่น ตุ๊ ต้าย เญย อ๊อ เก๋า หวุย เซี่ยน ตอน,
• แอ๋ง หงาด อ๊อ ต้าย ปุน เซี่ยน เญ์ย.
• นิ่น เซียว นิ่น เป๊ด ต้าย เญย อ๊อ ปวั๊ง นิ่น เยียม เญย ค้วด,
• นิ่น หงาด ต้าย เญย อ๊อ ปวั๊ง เหฑ่ง ค้วด กะญั์ว.
• ¹³ เน่น เจี๋ย เญย เฒี้ยว ก๊อง,
• ``เยีย เหธา เม่ย เป๋น วิน.
• เยีย อ๋อย ปั๊ว เม่ย เญย เบ๊าะ จ๋า เธีย เป๋น เสียว เหฑ่ง.
• เม่ย บัว เญย เซี่ยน ตอน อ๋อย หฒุ หฑุ ด๊าว ไต๋.
• ต้ง เม่ย บัว ธ้าง กั้น เต๋ย เมี่ยน เญย กะน้าย, เยีย อ๋อย เฒาะ เหฑ่ง.
• เยียม น้าย มี่ง ไม้ ม่าย หาย เต้า ไฮ์
• เม่ย เญย โต่ว เฝียน เมี่ยน เญย เฉีย.