หน่าน ฒี่ง ฑูง 3 (Lamentations 3)

หน่าน ฒี่ง ฑูง 3

หฒุ โค้ว มป่า หธ่อ ม่าย ลั่ม ฮนั้ม ต๋อง *

¹ เยีย เซ เหยียด เต้า หฒุ เจี๋ย โค้ว หน่าน เญย เมี่ยน,

เซ หฒุ ทิน-ฮู่ง เฉีย เจี์ย เบ๊าะ.

² นิ่น หฒุ่น เยีย มี่ง หย่า ปุน เยีย

ยั่ง หฮมวัง เญย ต๋อง,
ไม้ ม่าย ฌัง.

³ นิ่น ฒู้ง เฒี่ยง ฮนอย เบ๊าะ เยีย

เหยียด หฑุ่น เจี๋ย เหยียด หฑุ่น หย่า ไม้ ค้อ-เลี่ยน.

⁴ นิ่น ปุน เยีย เญย ด๊บ เหธา อ๊อ โซะ

หย่า ว้วด เยีย เญย บู๊ง เน้า.

⁵ นิ่น ปุน เยีย หฒุ โค้ว ไห่ เญย หน่าน ฒี่ง

เว่ย เจี๊ยน เยีย ฮนั้ง หลาด นอ.

⁶ นิ่น ห่อย เยีย เยียม หฮมวัง เญย ต๋อง

ฮนั้ง ไต่ มี่ง เล่า เญย เมี่ยน นอ.

⁷ นิ่น โหฒว หลาด เว่ย เจี๊ยน เยีย, ปุน เยีย เปย๋า ไม้ ดุ๊ด.

นิ่น หล่ง หลิ่ม เฮนี้ย เญย โด้ เจี๊ยน เยีย.

⁸ ไม้ กุ๊น เยีย เห่ว เจี๊ยน โท้ เถง,

นิ่น ไม้ หมวัง เยีย เต๋า เก๋า เญย หว่า.

⁹ นิ่น หล่ง หฒุ ต้าย เญย หละเปย๊ย ตั๊ง เจี๊ยน เยีย เญย เจ๊า,

หย่า ปุน เยีย เญย เจ๊า ฌ้วด มี่ง.

¹⁰ นิ่น เซ ฮนั้ง เต้า เจี๊ยบ ฒั้ว เจี๊ยน แมะ เยีย,

หย่า ฮนั้ง เซี่ยน ปี๋ง เจี๊ยน เยียม เบว์ย เญย ต๋อง.

¹¹ นิ่น ทอ เยีย ธ้วด เยีย เญย เจ๊า หย่า เป๊ด เยีย เป๋น เหฒีย เต๋ย เหฒีย เต๋ย,

ปุน เยีย หฒุ กวั่ง ฮวาง.

¹² นิ่น แปง นิ่น เญย จวัง-หฒิน,

เฒาะ เยีย เป๋น แบะ
หฒุ นิ่น เญย ฟอง ป๊วน.

¹³ นิ่น แปง ฟอง เยียม นิ่น เญย ฟอง-ด้ง ธ้วด,

ป๊วน เปียะ เยีย เญย เฮญี้ยว กะญั์ว.

¹⁴ เยีย เป๋น หฒวัง ฝีง เมี่ยน * จั๊ด เญย กะน้าย,

นิ่น บัว เฒี่ยง ฮนอย เฒาะ เยีย เป๋น ฑูง ป๋าว.

¹⁵ นิ่น ปุน เยีย หฒุ โค้ว หน่าน ฮนั้ง หญั่น อิม เญย กะน้าย เป๊ว,

ปุน เยีย โค้ว เถา เดี๊ย ฮนั้ง ฮบ ยั่ง เม์ว
หฒูง.

¹⁶ นิ่น หล่ง หละเปย๊ย ปุน เยีย เญย ญ่า เน้า, *

ปุน เยีย กั้ม เหฑีย เจี๊ยน บ๊าบ เหฌี่ย ซ้าย-ดุย.

¹⁷ เยีย เญย เฮญี้ยว ไม้ ม่าย เหยียด เต๋ย
แป้ง ออน,

เยีย ฒู้ง หละคุ ออน-เหลาะ เญย เจ๊า
ฮนั้ง หาย นอ.

¹⁸ เยีย ฯฒฯ ก๊อง, ``เยีย เญย ชะ *
หฒิด เหฑ่ง.

เยีย เขา เฒี้ยว ม่าย ลั่ม ฮนั้ม เญย
หย่า ไม้ ม่าย อ๊ะ.''

¹⁹ โท้ จั๋ง เยีย หฒุ โค้ว เหธา เยีย หฒุ เญย หน่าน ฒี่ง, *

ฮนั้ง ยั่ง เม์ว เหธา เจี๊ยบ-ต๊าม อิม.

²⁰ เยีย เญย เฮญี้ยว หฒั่นๆ จั๋ง เจี๊ยน,

เยีย เญย เฮญี้ยว หย่า เฑ่า เจี๊ยน เยียม.

²¹ มป่า เยีย จั๋ง หฒุ น้าย เต๋ย สี่,

เยีย ฯฒฯ ม่าย ลั่ม ฮนั้ม ต๋อง.

²² เฒี้ยว ไม้ ตี้ง เลี่ยว เหฒียบ ฒัวะ เญย ฮนั้ม เมี่ยน.

นิ่น ค้อ-เลี่ยน เมี่ยน เญย เฮญี้ยว เหยียด ลิ์ว ไม้ ตั๋ง.

²³ ดอมๆ ฒู้ง เซียง เญย.

เม่ย หฒะเก้ง! เหฒียบ ฒัวะ ไห่.

²⁴ เยีย เญย เฮญี้ยว ก๊อง, `` เฒี้ยว เซ เยีย เญย ป่วน.

เหว่ย น้าย เยีย เขา นิ่น ม่าย ลั่ม ฮนั้ม.''

²⁵ เฒี้ยว โหฒว หลง ปุน เขา * นิ่น,

ม่าย เฮญี้ยว ล์อ นิ่น วั้ว เต๋ย เมี่ยน.

²⁶ เมี่ยน เซ้ก เหฑียะ เญย ฒั้ว เจี๊ยน

เฒี้ยว เญย เหฌียว เอน เซ หลง ไห่.

²⁷ เมี่ยน หฮญัง-เจ๊ย หลุน เญย เฒี่ยง โห่

โหะ หลิ่น ม่าย หน่อย * เซ หลง เญย.

²⁸ นิ่น หฒุ โค้ว หน่าน * เญย เฒี่ยง โห่,

ปุน นิ่น กั้น ดุ เต้า เฒว์ย เจี๊ยน เซ้กๆ เญย เยียม วั้ว.

²⁹ ปุน นิ่น โด๊ะ มฆ้อง เหญี่ยม กั้น โหฒว ไฝ, *

เหฑีย หธ่อ ม่าย ลั่ม ฮนั้ม.

³⁰ ปุน นิ่น ฮวิน เฮมียน เซว่ย เมี่ยน ไบ๋,

ปุน นิ่น หฒุ เตี๊ย ไญ้ เถา ต้าว.

³¹ เหว่ย หฒุ เฒี้ยว ไม้ เหยียด ลิ์ว กวั่ง เมี่ยน.

³² ไม้ กุ๊น เฒี้ยว ปุน เมี่ยน หฒุ เฑ่า,

หฒิว นิ่น เหฒียบ ฒัวะ เญย ฮนั้ม เมี่ยน,

นิ่น ฒู้ง อ๋อย ค้อ-เลี่ยน.

³³ เหว่ย หฒุ นิ่น ไม้ เฒ์ย อะเฮน้ย ปุน เมี่ยน

หฒุ โค้ว ไฟ หฒุ เฑ่า เญย สี่.

³⁴ ลู่ง เดี๊ย เหยียด ฒู้ง หววน โล่ เญย เมี่ยน

หฒุ ธ้าย เหฌี่ย เหฒา-เดี๊ย,

³⁵ ไฟ ตอง เจี๊ยน เยียม ฮลัง เจี๋ย วั้ว เต้า เญย หฑะเฮมียน,

เมี่ยน ไม้ ตุ๊ หอบ หฒุ ตุ๊ เญย เล์ย,

³⁶ ไฟ เยียม สี่-ต้อง ตุ๋น สี่ ไม้ หฒีง,

เฒี้ยว ไม้ หอบ เฮญี้ยว อ๊ะ.

³⁷ ธ้วด ลิ์ว เฒี้ยว ตี่ง,

หาย เต้า ก๊อง หาย หญู่ง ฯฒฯ ธ้วด ฮนั้ง วั้ว หญู่ง ไฟ?

³⁸ หลง เญย เหธา เธี้ยว เญย ไม้ เฒ์ย เยียม

ฮลัง เจี๋ย วั้ว เต้า เญย ฑุ่ย ธ้วด ไฟ?

³⁹ เฒี่ยง เจี๊ยน เญย ป้าม เมี่ยน

เหว่ย กั้น โหฒว เญย สี่ หฒุ ตี่ง ฒุ์ย

ฝู่ง อ๋อย หฒุ งบ?

⁴⁰ บัว อ๋อย หฒุ ฒ่า หมั่ง หย่า เสย บัว โหฒว เญย เจ๊า

แอ๋ง หฑวน ต้าย ล์อ เฒี้ยว.

⁴¹ บัว อ๋อย หฒุ คอย ฆอย เฮญี้ยว,
ซูง เจี๊ยน ปั์ว

หูง เจี๊ยน เยียม ลู่ง หฒั่ง เญย ทิน-ฮู่ง
เต๋า เก๋า.

⁴² ``เยีย บัว ป์าม ฒุ์ย แหง่ง เม่ย,

เม่ย ฒู้ง ไม้ กวั่ง เยีย บัว เญย ฒุ์ย.

⁴³ ``เม่ย หฒะเก้ง เฉีย เจี์ย เจี๊ยน หฒุ่น เยีย บัว,

เม่ย ไต๋ เยีย บัว หย่า ไม้ ค้อ-เลี่ยน.

⁴⁴ เม่ย หล่ง บ๋วน-เจี๊ยะ อม เจี๊ยน กั้น,

ปุน เยีย บัว เต๋า เก๋า เญย หว่า ฝาว ไม้ ทง.

⁴⁵ เม่ย ปุน เยีย บัว หฒุ เยียม หม่าน ฝีง บุด๋ง,

เป๋น หละฟับ เหธา กวั่ง เญย กะน้าย.

⁴⁶ ``เยีย บัว เญย เหยียด ฒู้ง วิน-วั้ง,

หมอง ฆอย นิ่น บัว เญย ฑุ่ย ก๊อง เยีย บัว.

⁴⁷ เยีย บัว หฒุ แฮะ กั้ม เหฑีย, หฒุ ด๊อด เหฌี่ย แฒง เมี่ยน เญย ค้วด,

หฒุ ป่าย, หฒุ เหมียด.''

⁴⁸ เยีย เญย มฒีง เหลี่ยว ววม-เหมว่ย ฮนั้ง โด๊ะ นอ,

หลาย เยีย เญย จวั่ง ฝีง เมี่ยน หฒุ เหมียด.

⁴⁹ เยีย เญย มฒีง หฒั่นๆ เหลี่ยว ววม-เหมว่ย,

ไม้ ม่าย เฒี่ยง โห่ ตี้ง,

⁵⁰ ฒั้ว เจี๊ยน เฒี้ยว เยียม กู้ หงว่าย ลู่ง

หมั่ง เหฌี่ย ฯฒฯ ปวัด.

⁵¹ เยีย ปวัด เยีย เญย ป๊วน-ฒี่ง เญย หฒวัง มเซียะ ตอน * ปวั้ง เญย สี่,

เยีย ไฮ์ เฮญี้ยว มุน ไห่.

⁵² โหฒว เยีย เญย วิน-วั้ง หย่า ไม้ ม่าย กอน-แป๋ง วั้ว เต๋ย,

ชะ หฒุ่น เยีย ฮนั้ง หฒุ่น เหนาะ นอ.

⁵³ นิ่น บัว เฒาะ เยีย เลี่ยม นั่ง ฒอย เหฌี่ย ค้วด,

แอ๋ง เฒาะ หละเปย๊ย ฒอย เหฌี่ย
งัด เจี๊ยน เยีย. *

⁵⁴ ววม เหยียม เจี๋ย เยีย เญย มฆ้อง.

เยีย ก๊อง, ``เยีย ไต่ อ๊า โล่ะ!''

⁵⁵ โอ เฒี้ยว อ่า, เยีย เยียม ค้วด

โด เญย ต๋อง เห่ว เม่ย เญย บั๋ว.

⁵⁶ เม่ย ไฮ์ เยีย โจ้ว เญย เฉีย,

``โท้ ไม้ ตู๋ง ปวัง มน่อม ไม้ หมวัง

เยีย เห่ว เจี๊ยน โท้ เม่ย เถง เญย หว่า.''

⁵⁷ เยีย เห่ว เม่ย วั้ว หฒั่น เม่ย ต้าย นิด ฟัด เยีย.

เม่ย ก๊อง, ``ไม้ ตู๋ง กั้ม เหฑีย.''

⁵⁸ โอ เฒี้ยว อ่า, เม่ย ฒู้ง ต้าย เถง เยีย แหธง สี่,

หย่า หฒัวะ เยีย เญย แหม่ง.

⁵⁹ โอ เฒี้ยว อ่า, เม่ย ปวัด ลิ์ว

เยีย หฒุ เมี่ยน โหฒว ต่อง เยีย เญย สี่.

โท้ เถง เซี้ยม ตี่ง เยีย ไม้ ม่าย ฒุ์ย.

⁶⁰ เม่ย ปวัด วิน-วั้ง ม่าย เฮญี้ยว อ๋อย จ๊าว วิน ปุน เยีย, *

หย่า ฮิ้ว ตุ๊ นิ่น บัว ต๊า ต้าย ห่อย เยีย เญย เหยียด ฒู้ง หฒะเอ๋ย.

⁶¹ โอ เฒี้ยว อ่า, เม่ย ไฮ์ นิ่น บัว ฮว้วด เยีย เญย หว่า,

หย่า ไฮ์ นิ่น บัว ต๊า ต้าย ห่อย เยีย เญย เหยียด ฒู้ง หฒะเอ๋ย.

⁶² อ๋อย ห่อย เยีย วั้ว เต๋ย เมี่ยน เญย ฑุ่ย ก๊อง เญย หว่า

เหธา นิ่น บัว ฮนั้ม ธ้วด เญย เจ๊า,

เฒี่ยง ฮนอย เหธา เยีย ต๋อย-เตก.

⁶³ หมั่ง ม่าะ! ไม้ กุ๊น นิ่น บัว เฒว์ย ไฟ เจี์ย ซิน,

นิ่น บัว ต้อ เยีย โหฒว ฑูง ป๋าว.

⁶⁴ โอ เฒี้ยว อ่า, เม่ย อ๋อย หฒิว นิ่น บัว เญย ปั์ว โหฒว เญย กง

วิ่น ปุน นิ่น บัว.

⁶⁵ เม่ย อ๋อย ปุน นิ่น บัว เญย เฮญี้ยว แหง่ง,

ปุน นิ่น บัว หฒุ เม่ย เหฒียว.

⁶⁶ โอ เฒี้ยว อ่า, เม่ย อ๋อย เฉีย เจี์ย เจี๊ยน หฒุ่น นิ่น บัว,

ไม้ ปุน นิ่น บัว เยียม เม่ย เญย ลู่ง เดี๊ย.