อิ^สะ^ยา 60 (Isaiah 60)

อิ^สะ^ยา 60

สิ^โอน ฆะฮ้า ฮี้ง
อ๋อย ตุ๊ เญย ฌัง-หล่าง

¹ ``เจี์ย ต้าย, หฒิว เจี๊ยน ฌัง,

เหว่ย หฒุ เม่ย เญย ฌัง เถา อ๊ะ.

เฒี้ยว เญย ฌัง-หล่าง ธ้วด ต้าย หฒิว เจี๊ยน เม่ย.

² หมั่ง ม่าะ! หฮมวัง อ๋อย ก๊ม ปวั๊ง ลู่ง เดี๊ย,

มับ แม่ง เญย หฮมวัง ก๊ม หม่าน ฝีง.

มป่า เฒี้ยว อ๋อย หฒิว เจี๊ยน เม่ย,

เมี่ยน ฯฒฯ ปวัด นิ่น เญย ฌัง-หล่าง เยียม เม่ย กู้ หงว่าย.

³ หม่าน กั๊วะ เมี่ยน อ๋อย ต้าย ล์อ เม่ย เญย ฌัง,

ฮู่ง เตี๋ย อ๋อย ต้าย ล์อ เม่ย ลู่ง ดอม เฑี้ยว เญย ฌัง.

⁴ ``เธา เม่ย เญย เฮมียน หมั่ง เปยย ปูง,

ปวัด เม่ย เญย แปะ ฝีง เหยียด ฒู้ง กั๊บ ฒุ้น ต้าย เม่ย น้าย.

เม่ย เญย ตอน บัว เยียม โก เญย ต๋อง หฑวน,

เม่ย เญย เซียะ หย่า ฮนั้ง ฝุเจว๊ย นอ, ตุ๊ ฮล้อบ เจี๊ยน ต้าย.

⁵ วั้ว หฒั่น เม่ย หมั่ง ปวัด ฯฒฯ อะเฮน้ย ไห่,

เฌียน-โย่ว เกา, บะฑิว บกๆ เญย,

เหว่ย หฒุ ค้อย ปู๋ง-หฒัวะ เญย หัว ฮวิน ต้าย ล์อ เม่ย,

หม่าน กั๊วะ เญย ฒิ่น ฒ่อย หย่า อ๋อย ต้าย เกวย เม่ย.

⁶ ล่อ ท่อ กวั้น, เลี่ยม มี^เดียน เหธา เอ^ฟา ต้าย เญย ล่อ ท่อ หลุน,

อ๋อย ปวั๊ง เม่ย เญย เต่ย-ปูง.

เยียม เช^บา เญย หฒวัง เมี่ยน อ๋อย ต้าย,

หย่า ต้อ เจียม เหธา ฟาน^เกน^เซน * ต้าย

ฒุ่น ก๊อง เธง เฒี้ยว เญย หว่า.'

⁷ เค^ดา เญย เหยียด ฒู้ง ปะกี ยู่ง กวั้น อ๋อย กั๊บ ฒุ้น เม่ย น้าย.

เน^บา^โย้ด เญย ปะกี ยู่ง โก๊ว อ๋อย ฟู-สู เม่ย.

นิ่น บัว อ๋อย ฝาว เยีย เญย เหฒี่ย-ต้อง,

เป๋น เยีย อะเฮน้ย ฒิบ ฝ่ง ห่อ เหฒี่ย เญย กะน้าย.

เยีย อ๋อย ปุน เยีย เญย เปย๊า

เก้า ฌัง-หล่าง เจี๋ย ฒิ่น ด่าง.

⁸ ``ได๋ ต้าย ฮนั้ง บ๋วน

หย่า ฮนั้ง แปะ ก๊บ หฑวน นิ่น เญย เล์า น้าย เต๋ย เซ หาย เต้า?

⁹ หฒวัง ค้อย-โฑว ฒู้ง ฒั้ว เจี๊ยน เยีย,

ทาน^ซิด เญย ฑั้ง-กวั้น ต้อ เจ๊า,

ต้อ เจี๊ยน เม่ย เญย ตอน บัว เยียม โก เญย ต๋อง หฑวน,

แอ๋ง ต้อ เจี๊ยน นิ่น บัว เญย เจียม ญ่าน ต้าย,

เหว่ย ท่าย เฒี้ยว, เม่ย เญย ทิน-ฮู่ง เญย บั๋ว,

เซ อิ^สะ^ลา^เอน เญย ธีง-เหฑ่ง ทิน-ฮู่ง,

เหว่ย หฒุ นิ่น ปุน เม่ย ม่าย ฌัง-หล่าง.

¹⁰ ``กั้น ฝีง เมี่ยน อ๋อย เหธย เม่ย เญย ฒี่ง หลาด.

นิ่น บัว เญย ฮู่ง เตี๋ย อ๋อย ฟู-สู เม่ย.

เหว่ย หฒุ เยีย เฉีย เจี์ย เม่ย ฯฒฯ เบ๊าะ เม่ย,

มป่า อี้ หฒั่น เยีย ค้อ-เลี่ยน เม่ย, เหธย เอน ปุน เม่ย.

¹¹ เม่ย เญย ฒี่ง แก้ง อ๋อย หฒั่นๆ คอย ฆอย,

เฒี่ยง ฮนอย เฒี่ยง ม์วน ไม้ กวน,

เหว่ย ปุน เมี่ยน ต้อ หม่าน กั๊วะ เญย ฒิ่น ฒ่อย ต้าย ปุน เม่ย,

เลี่ยม นิ่น บัว เญย ฮู่ง เตี๋ย หย่า เยี์ยน เจี๊ยน ต้าย. * หล่าว ย่าง 21:25-26

¹² เหว่ย หฒุ หาย นอม กั๊วะ, หาย ฝีง เมี่ยน

ไม้ ฟู-สู เม่ย, ฒู้ง หฒุ ป่าย หว่าย.

วั้ว เต๋ย นอมๆ กั๊วะ หย่า อ๋อย หฒุ ป่าย หว่าย เหฑ่ง.

¹³ ``เล^บา^นอน เก้า หลง เจี๋ย เญย เดี๋ยง, * อ๋อย เถา เม่ย น้าย,

ปัว คว้าย น่อม เญย ฒ่ง เหธา อี หญู่ง ฒ่ง เดี๋ยง,

เหว่ย ฒอง เยีย เญย สีง ติ่น เญย ต๋อง
เหฑว่ย,

หย่า ปุน เยีย เญย เหฒา ธ้าย เญย ต๋อง ม่าย ฌัง-หล่าง.

¹⁴ เหฒย เม่ย วั้ว เต๋ย เมี่ยน เญย เฒ้ย-ฟุน

อ๋อย ต้าย เยียม เม่ย เญย หฑะเฮมียน โด๊ะ เหฌี่ย.

หมั่ง เผีย เม่ย วั้ว เต๋ย,

อ๋อย เกว่ย เหฌี่ย เม่ย เญย เหฒา-เฮลน ป๋าย.

นิ่น บัว อ๋อย เห่ว เม่ย โหฒว เฒี้ยว เญย ฒี่ง,

อิ^สะ^ลา^เอน เญย ธีง-เหฑ่ง ทิน-ฮู่ง เญย ฒี่ง, สิ^โอน. * หล่าว ย่าง 3:9

¹⁵ ``ไม้ กุ๊น เม่ย หฒุ กวั่ง หฒุ ฑอง,

ไม้ ม่าย เมี่ยน เจี๋ย เจ๊า.

เยีย อ๋อย ปุน เม่ย โหฒว โฮล, ผุย ตุ๊ เธง,

ต่อย เจี๋ย ต่อย เป๋น เฌียน-โย่ว เญย ต๋อง.

¹⁶ หม่าน กั๊วะ หม่าน ฮู่ง อ๋อย โก๋ว เจี๊ยน เม่ย,

ฮนั้ง มา โก๋ว นิ่น เญย ฝุเจว๊ย นอ. *

เม่ย ฯฒฯ ฮิ้ว ตุ๊ เยีย, เฒี้ยว, ต้ง เม่ย เญย เหฌียว เฒี้ยว,

หฒัวะ เม่ย วั้ว เต้า เซ, ยา^โค้บ เญย เฮ้น ไห่ เญย ทิน-ฮู่ง.

¹⁷ เยีย อ๋อย ต้อ เจียม ต้าย ตี๊ ต้ง ซิ,

ต้อ ญ่าน ตี๊ เฮลียะ.

เยีย อ๋อย ต้อ ต้ง ซิ ต้าย ตี๊ เดี๋ยง,

ต้อ เฮลียะ ตี๊ หละเปย๊ย.

เยีย อ๋อย หล่ง แป้ง ออน เหว่ย โหฒว เม่ย เญย เจียน,

ปุน โหฒว หอบ เญย เจ๊า กุ๊น เม่ย.

¹⁸ เยียม น้าย มี่ง เยียม เม่ย เญย เต่ย-ปูง

ไม้ ไฮ์ เธี้ยว เญย, โตะ เญย สี่.

เยียม เม่ย เญย กั๊บ-จ๋าย กะญั์ว

หย่า ไม้ ไฮ์ ป่าย หว่าย ป่าย ฮวาง เญย เจ๊า.

เม่ย ฯฒฯ ปุน เม่ย เญย ฒี่ง หลาด ม่าย บั๋ว เห่ว ``เหฌียว เอน,''

หย่า ปุน เม่ย เญย ฒี่ง แก้ง

ม่าย บั๋ว เห่ว ``เธง.''

¹⁹ บะฮนอย ไม้ แอ๋ง โหฒว เม่ย ลู่ง ฮนอย หฒั่น เญย ฌัง,

หฮลา-หญุด ไม้ แอ๋ง หฒิว เม่ย,

เหว่ย หฒุ เฒี้ยว อ๋อย โหฒว เม่ย เญย เหยียด ลิ์ว เญย ฌัง,

เม่ย เญย ทิน-ฮู่ง อ๋อย เป๋น เม่ย เญย
ฌัง-หล่าง. *

²⁰ เม่ย เญย บะฮนอย ไม้ ม้วด,

เม่ย เญย หฮลา ไม้ แอ๋ง ไฝ,

เหว่ย หฒุ เฒี้ยว ฒู้ง อ๋อย โหฒว

เม่ย เญย เหยียด ลิ์ว เญย ฌัง,

เม่ย หฒุ เฑ่า เญี้ยม เญย ฮนอย-เหญียะ
หย่า เจี๋ย หมี่ อ๊ะ.

²¹ เม่ย เญย เหยียด ฒู้ง แปะ ฝีง ฯฒฯ เป๋น
คู้ เมี่ยน.

นิ่น บัว ตุ๊ หฑิบ เต่ย-ปูง เป๋น นิ่น บัว เหยียด ลิ์ว เญย ป่วน.

นิ่น บัว เซ เยีย หฒวัง เญย หธุน,

เป๋น เยีย เญย ปั์ว โหฒว เญย กง

เหว่ย ปิ๋ว เม่ง เยีย เญย ฌัง-หล่าง.

²² เก้า โหฒะ เจี๋ย เญย เมี่ยน อ๋อย เป๋น
เหยียด ฝีง,

เก้า ไฝ เจี๋ย เญย ฝีง อ๋อย เป๋น เหยียด
ต้ม กั๊วะ เมี่ยน.

เยีย เซ เฒี้ยว.

เถา เฒี่ยง โห่ เยีย อ๋อย เซี้ยบๆ เญย โหฒว น้าย เต๋ย สี่.''