อิ^สะ^ยา 42 (Isaiah 42)

อิ^สะ^ยา 42

เฒี้ยว เญย โปว

¹ เฒี้ยว ก๊อง,

``หมั่ง ม่าะ! น้าย เซ เยีย เญย โปว. เยีย ป๊า เจี๊ยน นิ่น.

เยีย กิ๊น นิ่น ต้าย หย่า อะเฮน้ย นิ่น.

เยีย เฒาะ เยีย เญย สีง ลี่ง เหธย ปุน นิ่น.

นิ่น อ๋อย ปุน หม่าน กั๊วะ ตุ๊ แป้ง ฟิม เญย เล์ย. *

² นิ่น ไม้ เหน่า ไฟ เห่ว เฉีย บุย,

นิ่น ไม้ เยียม เฮย-ห่อง ก๊อง หว่า โฮล.

³ หลัวะ ติ แกว๊ง ต๊บ มี่ง นิ่น ไม้ อ๊าว ดุ๊ด,

ตัง-โธ้ กั๋น เญย เสียว นิ่น หย่า ไม้ ปย๊ม ไต่.

นิ่น อ๋อย เหฒียบ ฒัวะ เญย ปุน แป้ง ฟิม เญย เจ๊า ธ้วด.

⁴ นิ่น ไม้ เซวย, เฮญี้ยว หย่า ไม้ หนัม,

เถา นิ่น เหลียบ แป้ง ฟิม เญย เล์ย เยียม
ลู่ง เดี๊ย.

ค้อย-โฑว เญย เมี่ยน * หย่า ฒั้ว เจี๊ยน นิ่น เญย เล์ย-หลัด.''

⁵ ทิน-ฮู่ง เหฒย ลู่ง แอ๋ง ธอง เจี๊ยน.

นิ่น เฒาะ เดา เหธา เหยียด ฒู้ง เยียม เดา ธ้วด เญย กะน้าย ทาน ฆอย,

หย่า ปุน เยียม เดา-เป้ย เญย หฒวัง เมี่ยน ม่าย เฉีย เท้า,

ปุน ยั่ง ลู่ง เดี๊ย เญย เมี่ยน ม่าย แหม่ง เฒี่ยง.'' * กง-โฒ่ 17:24-25

เฒี้ยว ทิน-ฮู่ง ฮนั้ง น้าย ก๊อง,

⁶ ``เยีย, เฒี้ยว, หล่ง โหฒว หอบ เญย เจ๊า เห่ว เม่ย ต้าย.

เยีย อ๋อย นั้น เจี๊ยน เม่ย เญย ปั์ว,
โก๋ว เจี๊ยน เม่ย.

เยีย อ๋อย หล่ง เม่ย เหธา หฒวัง เมี่ยน เหลียบ เจี์ย แหง่ง หว่า,

หย่า ปุน เม่ย โหฒว หม่าน กั๊วะ เมี่ยน เญย ฌัง, *

⁷ เหว่ย ปุน มฒีง แม่ง เญย เมี่ยน ไฮ่ หมั่ง ตุ๊ ปวัด,

เหว่ย ต้อ หฒุ หววน โล่ วั้ว เต๋ย ธ้วด ต้าย,

หย่า ปู๋ง เฒว์ย เจี๊ยน โล่ หฮมวัง เญย เมี่ยน ธ้วด.

⁸ ``เยีย เซ เฒี้ยว. น้าย เซ เยีย เญย บั๋ว.

เยีย เญย ฌัง-หล่าง เยีย ไม้ เฒาะ ปุน กั้น เต้า,

หย่า ไม้ ปุน หล่ง เธง เยีย เญย หว่า เธง ติว ต้าย เญย หมิ่ว-ฝัง.

⁹ หมั่ง ม่าะ! ฒิ่น ด่าง เญย สี่ เจี๋ย หมี่ อ๊ะ.

อี้ หฒั่น เยีย ก๊อง เซียง-สี่.

น้าย เต๋ย สี่ ไม้ แก้ง ธ้วด

เยีย ฯฒฯ จา-ด่าง ก๊อง บั๋ว เม่ย บัว.''

เธง เฒี้ยว เญย ฑูง

¹⁰ อ๋อย หฒุ ป๋าว ติ้ว เซียง-ฑูง เธง เฒี้ยว.

จ่ม ลู่ง เดี๊ย อ๋อย หฒุ เธง นิ่น.

มี่ง ค้อย เญย เมี่ยน เหธา เหยียด ฒู้ง เยียม ค้อย เญย กะน้าย,

ค้อย-โฑว เหธา เยียม ค้อย-โฑว เญย เมี่ยน อ๋อย หฒุ เธง นิ่น.

¹¹ เต่ย-ปูง-ฮวาง เหธา เยียม หน่าย กะญั์ว เญย ฒี่ง,

เลี่ยม เค^ดา เมี่ยน ตี้ง เฒ้บ เญย ต๋อง อ๋อย หฒุ ธ้วด เฉีย.

เซ^เอ^ลา เมี่ยน อ๋อย หฒุ เฌียน-โย่ว เญย ป๋าว ฑูง,

เยียม บง-นี้ง กู้ หงว่าย เห่ว.

¹² นิ่น บัว อ๋อย หฒุ ท่าย เฒี้ยว,

หย่า เยียม วั้ว ค้อย-โฑว เธง นิ่น.

¹³ เฒี้ยว ฮนั้ง เต้า เมี่ยน เฮ้น เมี่ยน อ๋อย ธ้วด มี่ง

หย่า ฮนั้ง เต้า เบ๊าะ จ๋า เฮ้น เญย เมี่ยน, นิ่น อ๋อย หฒูง ชะ, จอม เฮญี้ยว.

นิ่น เหน่า, ชะ เห่ว เบ๊าะ จ๋า เญย เฉีย บุย,

นิ่น ฒู้ง ฮี่ง เจี๋ย นิ่น เญย วิน-วั้ง.

¹⁴ ``เยีย เญี์ยน เจี๊ยน ฑุ่ย เล่า อ๊ะ.

เยีย เซ้ก เหฑียะ, ไม้ โค โล,

มป่า อี้ หฒั่น ฮนั้ง มเซียะ ตอน อ๋อย ดุ๊ด ซิน,

เยีย เห่ว เจี๊ยน, เท้า เฉีย ขวน ฌุ่นๆ เญย.

¹⁵ เยีย อ๋อย ปุน ต้ม บง ฟิ้ว-บง เป๋น เดา-ฮวาง,

ปุน นิ่น บัว เญย เหยียด ฒู้ง เมี้ย ฆาย.

เยีย อ๋อย ปุน ด้าย ทิ้ว เป๋น ด้าย โฑว,

หย่า ปุน ววม-ต้ม ฆาย มี่ง.

¹⁶ เยีย อ๋อย ต้อ มฒีง แม่ง เมี่ยน ยั่ง นิ่น บัว เฒียะ ไม้ ตุ๊ เญย เจ๊า,

อ๋อย ต้อ นิ่น บัว ยั่ง นิ่น บัว ไม้ ฮิ้ว ตุ๊ เญย เจ๊า-โหล่ว.

เยีย อ๋อย เยียม นิ่น บัว เญย วั้ว ด่าง แหมง ปุน หฮมวัง ทิ้ว เป๋น ฌัง,

อ๋อย ปุน ไม้ ย่วน เญย เจ๊า ย่วน เญย.

น้าย เต๋ย สี่ เซ เยีย อ๋อย โหฒว เญย,

เยีย ฒู้ง ไม้ กวั่ง.

¹⁷ มป่า เขา ติว ต้าย เญย หมิ่ว-ฝัง,

แอ๋ง ก๊อง บั๋ว โต๋ ต้าย เญย หมิ่ว-ฝัง,

`เม่ย บัว โหฒว เยีย บัว เญย เฒี่ยน' วั้ว เต๋ย,

น้าย หญู่ง เมี่ยน อ๋อย หฒุ ถุย หฑวน ฆะฮ้า หย่า หฒุ ไญ้ เถา ต้าว.

อิ^สะ^ลา^เอน ไม้ คั้ง โหะ ฮิ้ว

¹⁸ ``เม่ย บัว มน่อม ดูง เญย เมี่ยน อ้า!
หมวัง ม่าะ!

เม่ย บัว มฒีง แม่ง เญย เมี่ยน อ้า!
หมั่ง ม่าะ!

¹⁹ หาย เต้า มฒีง แม่ง? เซ เยีย เญย โปว.

ไฟ หาย เต้า มน่อม ดูง ฮนั้ง เยีย พ้าย มี่ง เญย โต่ว เฝียน เมี่ยน?

หาย เต้า มฒีง แม่ง ฮนั้ง เหธา เยีย หอบ เฮญี้ยว วั้ว เต้า,

ไฟ หาย เต้า มฒีง แม่ง ฮนั้ง เฒี้ยว เญย โปว?

²⁰ อิ^สะ^ลา^เอน เมี่ยน อ้า! เม่ย บัว ปวัด เหฒีย หญู่ง,

มป่า ฮนั้ง ไม้ ปวัด นอ.

เม่ย บัว เญย มน่อม ไฮ่ หมวัง ตุ๊ ไฮ์,

มป่า เม่ย บัว ไม้ ไฮ์ หาย หญู่ง.''

²¹ เฒี้ยว เหว่ย กั้น โหฒว หอบ เญย เจ๊า

อะเฮน้ย ปุน นิ่น เญย เล์ย-หลัด เว่ย โฮล หย่า ฌัง-หล่าง.

²² มป่า น้าย เต๋ย แปะ ฝีง หฒุ ธ้าง, หฒุ ลู้.

นิ่น บัว เหยียด ฒู้ง หฒุ หววน เจี๊ยน เดา-ค้วด,

ไฟ หฒุ เฒาะ ต้าย หววน เจี๊ยน โล่.

นิ่น บัว เป๋น ธ้าง ต้าย เญย กะน้าย หย่า ไม้ ม่าย หาย เต้า เหฌียว นิ่น บัว.

หย่า ไม้ ม่าย เมี่ยน ก๊อง, ``อ๋อย หฒุ ฝูง หฑวน.''

²³ เยียม เม่ย บัว บุด๋ง ม่าย หาย เต้า อ๋อย หมวัง น้าย เต๋ย หว่า?

ฆะฮ้า ฮี้ง ม่าย หาย เต้า อ๋อย หล่ง เฮญี้ยว หมวัง?

²⁴ หาย เต้า จิว ยา^โค้บ เป๋น หฒุ ธ้าง เญย กะน้าย,

หย่า เฒาะ อิ^สะ^ลา^เอน ปุน ลู้ เญย เมี่ยน ลู้?

เซ เฒี้ยว, ต้ง เยีย บัว ป์าม ฒุ์ย วั้ว เต้า
ไม้ เฒ์ย?

เหว่ย หฒุ นิ่น บัว ไม้ แล์ง ยั่ง นิ่น เญย เจ๊า,

นิ่น บัว หย่า ไม้ กัน นิ่น เญย เล์ย-หลัด.

²⁵ เหว่ย น้าย นิ่น โน์ว ไห่, กะเฉีย แป๊ด ธ้วด,

ปุน นิ่น บัว หฒุ เบ๊าะ ต้ม จ๋า เธี้ยว เญย สี่.

ม่าย โต์ว เว่ย ก๋อม นิ่น บัว, มป่า นิ่น บัว ไม้ เม่ง แปะ.

โต์ว ปั๊ว เจี๊ยน นิ่น บัว,
มป่า นิ่น บัว ฮนั้ง ไม้ ฮิ้ว นอ.