1 เฒี้ยว หฒิว นิ่น ก๊อง เญย หว่า ค้อ-เลี่ยน ซา^ลา หย่า เอย นิ่น แล์ง เญย หว่า โหฒว. 2 อับ^ลา^ฮัม หฮญัง-เจ๊ย โก๋ วั้ว หฒั่น, ซา^ลา ม่าย กู้งว์า, ยู์ง ตุ๊ เต้า ตอน ปุน อับ^ลา^ฮัม ต๋อย เหฑ่ง ทิน-ฮู่ง แล์ง เญย เฒี่ยง โห่. * 3 ซา^ลา ยู์ง ปุน นิ่น วั้ว เต้า ตอน, อับ^ลา^ฮัม ธ้วด บั๋ว เห่ว อี^สัก. 4 เยียม อี^สัก ธ้วด เสย เถา ตะเป๊ด ฮนอย วั้ว ฮนอย, อับ^ลา^ฮัม เอย ทิน-ฮู่ง หัด เญย หว่า เถง อี^สัก เจี๋ย ก๊าด เญย เล์ย. * 5 นิ่น เญย ตอน, อี^สัก, ธ้วด เสย วั้ว หฒั่น อับ^ลา^ฮัม ตุ๊ เหยียด แป๊ะ หฮญัง.
6 ซา^ลา ก๊อง, ``ทิน-ฮู่ง ปุน เยีย คู่ จั๊ด. หาย เต้า ไฮ์ หย่า อ๋อย คู่ จั๊ด.'' 7 นิ่น แอ๋ง ก๊อง, ``หาย เต้า ก๊าม ก๊อง บั๋ว อับ^ลา^ฮัม, ซา^ลา ไฮ่ ม่าย กู้งว์า ฮบ หญอ? อับ^ลา^ฮัม โก๋ ไห่ อ๊ะ, มป่า เยีย ยู์ง ตุ๊ เต้า ตอน ปุน นิ่น หมี่ อ๊ะ.''
8 วั้ว เต้า ตอน โฮล เต๋ย อ๊ะ. เถา กวั่ง หญอ เญย ฮนอย อับ^ลา^ฮัม เบ่น หญั่น เบ่น ฮบ โฮล เญย โห่ว นิ่น เญย ตอน กวั่ง หญอ. 9 มป่า ซา^ลา ปวัด อี^ยิบ เมี่ยน, ฮา^กา, ยู์ง ปุน อับ^ลา^ฮัม วั้ว เต้า ตอน, อิ^สะ^มา^เอน, จั๊ด อี^สัก. * 10 ซา^ลา ฯฒฯ ก๊อง บั๋ว อับ^ลา^ฮัม, ``หฒุ่น น้าย เต้า โน่ว เป์ย บัว อี ตอน-หม่า ธ้วด ม่าะ! เหว่ย หฒุ น้าย เต้า โน่ว เป์ย เญย ตอน ไม้ ไฮ่ เหธา เยีย เญย ตอน, อี^สัก, จวั่ง จา-ตี้ง หฑิบ.'' *
11 อับ^ลา^ฮัม เหว่ย นิ่น เญย ตอน เฑ่า ไห่. 12 มป่า ทิน-ฮู่ง ก๊อง บั๋ว นิ่น, ``เม่ย ไม้ ตู๋ง หลาย น้าย เต้า ตอน เหธา น้าย เต้า โน่ว เป์ย เฑ่า โอ่. ซา^ลา อ๋อย เม่ย ฮนั้ง หาย นอ โหฒว, กุ๊น เอย เจี๊ยน โหฒว อ๊ะ. เหว่ย หฒุ เม่ย เญย โฮ์ ต่อย เฒ้ย-ฟุน อ๋อย เยียม อี^สัก ต้าย. * 13 โน่ว เป์ย เญย ตอน เยีย หย่า อ๋อย ปุน นิ่น เป๋น เหยียด ฝีง, เหว่ย หฒุ นิ่น เป๋น เม่ย เญย เธียน ตอน.''
14 ตะเหญ่ย ดอม เฑี้ยว เญย, อับ^ลา^ฮัม เจี์ย ซิน ต้าย, เฒาะ เต๋ย ฌั้ว เหธา เหยียด ด๊บ-บัวะ ววม ปุน ฮา^กา ปุ๋ย เจี๊ยน ฯฒฯ ปุน นิ่น ต้อ เจี๊ยน วั้ว เต้า ตอน ธ้วด เปย๊า มี่ง หมี่ อ๊ะ. ฮา^กา ฯฒฯ เล่ย วั้ว นอม ต๋อง มี่ง เถา เบ^เอ^เช^บา เต่ย-ปูง-ฮวาง เจี๋ย น้าย
เจี๋ย วั้ว เญย.
15 มี่ง เกา, ด๊บ-บัวะ เญย ววม เหฑ่ง หมี่ อ๊ะ. ฮา^กา ฯฒฯ ปุน นิ่น เญย ตอน เปว๋ย เจี๊ยน เดี๋ยง-ตอน-ฟ้ม กะเดี๊ย. 16 นิ่น กั้น แอ๊ะ, มี่ง ล์อ ต๋อง เฒว์ย เจี๊ยน เล่ย นิ่น เญย ตอน ด่ง ป๊วน เหยียด ฑิด ฟอง เญย ต๋อง, เหว่ย หฒุ นิ่น ก๊อง, ``เยีย ไม้ อ๋อย หมั่ง เจี๊ยน เยีย เญย ตอน ไต่.'' นิ่น ฯฒฯ เยียม วั้ว เญี้ยม. *
17 ทิน-ฮู่ง ไฮ์ น้าย เต้า ตอน เญี้ยม. ทิน-ฮู่ง เญย ฟิน-เมี่ยน เยียม กู้ หงว่าย ลู่ง เห่ว, ``ฮา^กา อ่า, เม่ย เหว่ย หาย ติ่ว ด่ง หน่าย เฑ่า? ไม้ ตู๋ง กั้ม เหฑีย โอ่. น้าย เต้า ตอน เปว๋ย เจี๊ยน วั้ว เดา เญี้ยม, ทิน-ฮู่ง ไฮ์ หมี่ อ๊ะ. 18 เจี์ย ซิน มี่ง ฮล้อบ นิ่น ต้าย นั้น เจี๊ยน ปั์ว, เหว่ย หฒุ เยีย อ๋อย ปุน นิ่น เป๋น เหยียด กั๊วะ โฮล เญย.''
19 ก๊อง ลิ์ว, ทิน-ฮู่ง ปุน ฮา^กา ปวัด นอม ววม-ค้วด. ฮา^กา ฯฒฯ มี่ง ฒ่าง ววม ปวั๊ง ด๊บ-บัวะ ปุน นิ่น เญย ตอน ฮบ.
20 ทิน-ฮู่ง เหธา วั้ว เต้า ตอน เยียม. นิ่น โฮล ต้าย เยียม เต่ย-ปูง-ฮวาง แอ๋ง เป๋น เต้า ป๊วน อ๊อ เฮ้น เญย เมี่ยน. 21 นิ่น เยียม ปา^ลาน เต่ย-ปูง-ฮวาง. นิ่น เญย มา มี่ง ก๊อง เต้า อี^ยิบ เซียะ ปุน นิ่น หล่ง โหฒว เอ๊า.
22 ต้ง วั้ว หฒั่น อา^บี^เม^เล้ก ฮู่ง เหธา เจี๊ยน นิ่น เญย ต้ม แปง-เปย๊ย, ฟี^โค, ก๊อง บั๋ว อับ^ลา^ฮัม, ``ไม้ กุ๊น เม่ย โหฒว หาย หญู่ง, ทิน-ฮู่ง เหธา เม่ย เยียม. * 23 เม่ย อ๋อย หฒุ เยียม น้าย เฒี้ยง เจี๊ยน ทิน-ฮู่ง แล์ง เม่ย ไม้ โหฒว หาย หญู่ง ต่อง เยีย ไฟ เยีย เญย ตอน-เจว๊ย ฟุน-ฟะ. เยีย ฮนั้ง หาย นอ โหฒว หลง ปุน เม่ย, เม่ย หย่า อ๋อย หฒุ ฮนั้ง วั้ว นอ โหฒว หลง ปุน เยีย เหธา เม่ย อี้ หฒั่น เยียม เจี๊ยน น้าย เญย เต่ย-ปูง.''
24 อับ^ลา^ฮัม ก๊อง, ``เยีย เฒี้ยง เจี๊ยน ทิน-ฮู่ง แล์ง อ๊ะ.''
25 อับ^ลา^ฮัม หย่า ไกว๋ อา^บี^เม^เล้ก เญย โปว บัว แฑง วั้ว นอม ววม-ค้วด ปุน อา^บี^เม^เล้ก หมวัง. 26 อา^บี^เม^เล้ก ก๊อง, ``เยีย ไม้ ฮิ้ว ตุ๊ หาย เต้า ฮนั้ง น้าย นอ โหฒว. เม่ย เลี่ยม ไม้ บั๋ว เยีย. อี้ หฒั่น หธีง ต้าย ไฮ์ เม่ย ก๊อง.''
27 อับ^ลา^ฮัม ฯฒฯ ต้อ ง่ง เหธา ปะกี ยู่ง ต้าย ปุน อา^บี^เม^เล้ก. นิ่น บัว อี เต้า หย่า เหลียบ เจี์ย แหง่ง หว่า. 28 อับ^ลา^ฮัม เยียม นิ่น เญย ปะกี ยู่ง กวั้น กิ๊น ธ้วด เสี่ย เต้า ปะกี ยู่ง เหฒ่ย ตอน ปุน ฆอย ต๋อง เยียม. 29 อา^บี^เม^เล้ก หน่าย ก๋า นิ่น, ``เม่ย กิ๊น ธ้วด น้าย เต๋ย เสี่ย เต้า ปะกี ยู่ง เหฒ่ย ตอน กั้น หธะเหล่ง อัน ม่าย หาย หญู่ง เอ๋ย เล์ย?''
30 อับ^ลา^ฮัม เตา, ``เยีย โท้ เม่ย หล่ง น้าย เต๋ย เสี่ย เต้า ปะกี ยู่ง เหฒ่ย ตอน เหว่ย โหฒว ฒอง-เหฒง ปุน ธีง เซ ต้ง เยีย เว้ด น้าย นอม ววม-ค้วด.''
31 วั้ว นอม ต๋อง นิ่น บัว ฯฒฯ ธ้วด บั๋ว เห่ว เบ^เอ^เช^บา, * เหว่ย หฒุ นิ่น บัว อี เต้า เยียม วั้ว ล่ม ฑ่อย เหลียบ เจี์ย แหง่ง หว่า. *
32 เยียม เบ^เอ^เช^บา เหลียบ ลิ์ว แหง่ง หว่า, อา^บี^เม^เล้ก เหธา นิ่น เญย ต้ม แปง-เปย๊ย, ฟี^โค, หฑวน ฟี^ลิ^สะ^เตีย เต่ย-ปูง. 33 อับ^ลา^ฮัม เยียม วั้ว เบ^เอ^เช^บา หฒวัง ฒู่ง ลิ่น เลี์ยว เดี๋ยง, แอ๋ง เยียม วั้ว ก๊อง ธ้วด เฒี้ยว เญย บั๋ว หฒั่ง เฒี้ยว, ต้ง เหยียด ลิ์ว เยียม เญย ทิน-ฮู่ง. 34 อับ^ลา^ฮัม หธ่อ เยียม วั้ว ฟี^ลิ^สะ^เตีย เต่ย-ปูง เล่า เญย.