Singx Nzung 84

Ngorc Zaangc Tin-Hungh Nyei Biauv

Bun taux dorh nzung nyei mienh.
Ziux gitc^titv.
Kolaa nyei Zeiv-Fun zoc nyei singx nzung.

• ¹ O Nernh Jiex nyei Ziouv aac,
• yie hnamv haic meih yiem nyei dorngx. * Fai “meih yiem nyei dorngx za'gengh nzueic haic”.
• ² Yie nyei hnyouv ndongc haaix oix yiem Ziouv nyei biauv, laatc gu'nyuoz,
• zungv haiz ngorc jienv yiem.
• Yie nyei sin caux hnyouv njien-youh nyei baaux nzung
• ceng ziangh jienv nyei Tin-Hungh.
• ³ O Nernh Jiex nyei Ziouv, yie nyei Hungh,
• yie nyei Tin-Hungh aac,
• yiem meih nyei ziec-dorngh ga'hlen,
• norqc meix lorz duqv dorngx yiem,
• mba'hinx yaac weic ganh lorz dorngx zoux lauz buoc dorn.
• ⁴ Yiem meih nyei biauv wuov deix mienh maaih orn-lorqc,
• zanc-zanc baaux nzung ceng meih. Selaa
• ⁵ Kaux meih duqv qaqv wuov deix,
• se liepc dingc hnyouv mingh Si^on Mbong * Hipv^lu waac maiv maaih Si^on naaiv joux waac. nyei mienh, * Faan zaqc gorngv “se yiem ninh mbuo nyei hnyouv maaih mingh Si^on nyei domh jauv wuov deix”. maaih orn-lorqc.
• ⁶ Ninh mbuo jiex Mbaakaa Horngz, * Fai “Wuom-Mueic Liouc nyei Horngz”.
• naaiv norm horngz tiuv benx wuom-zingv nyei dorngx.
• Ciou gueix mbiungc yaac bun wuov norm dorngx,
• zaangh wuom buangv nzengc. * Maaih deix loz-hnoi sou gorngv duqv fuqv.
• ⁷ Mingh nyei ziangh hoc ninh mbuo gunv mingh gunv henv,
• dauh dauh ziouc mingh taux Si^on, yiem Tin-Hungh nyei nza'hmien.
• ⁸ O Nernh Jiex nyei Ziouv Tin-Hungh aah! Tov muangx yie daux gaux nyei waac.
• O Yaakopv nyei Tin-Hungh aah! Tov baeng m'normh muangx. Selaa
• ⁹ O Tin-Hungh aac, tov meih mangc yie mbuo nyei torngv-baaih, * torngv-baaih se beu mienh wuov dauh. Gorngv zuqc hungh diex fai gorngv zuqc Tin-Hungh ganh.
• tov meih mangc meih longc youh orn daaih wuov dauh nyei hmien.
• ¹⁰ Yiem meih nyei biauv nyei laatc gu'nyuoz yietc hnoi
• se gauh longx yiem ganh norm dorngx yietc cin hnoi.
• Yie yiem yie nyei Tin-Hungh nyei biauv zuov gaengh
• se gauh longx yiem orqv mienh nyei biauv. * Hipv^lu waac gorngv ndopv-liuh.
• ¹¹ Ziouv Tin-Hungh se mba'hnoi caux torngv-baaih,
• ninh ceix en caux njang-laangc.
• Maiv maaih haaix nyungc longx nyei,
• Ziouv ngaengc jienv maiv ceix bun zoux horpc nyei mienh. * Fai “maiv lamh nqemh dorngx nyei mienh”.
• ¹² O Nernh Jiex nyei Ziouv aac,
• sienx kaux meih wuov deix maaih orn-lorqc.