Singx Nzung 83

Daux Gaux Tov Tin-Hungh Tengx Hingh Jiex I^saa^laa^en Nyei Win-Wangv

Yietc diuh nzung.
Aasaapc zoc nyei singx nzung.

• ¹ Tin-Hungh aac, tov meih maiv dungx sekv-sekv nyei yiem.
• O Tin-Hungh aac, tov maiv dungx kungx nqapc jienv nzuih, maiv ko lo.
• ² Mangc maah! Meih nyei win-wangv faanv.
• Nzorng meih wuov deix cau jiez m'nqorngv daaih aqv.
• ³ Ninh mbuo daav guv guaix nyei za'eix hoic meih nyei baeqc fingx.
• Ninh mbuo lomh nzoih caangh laangh zoux bun meih beu jienv nyei mienh.
• ⁴ Ninh mbuo gorngv, “Daaih maah! Mbuo zorqv ninh mbuo yietc guoqv mienh mietc nzengc,
• ziouc maiv maaih haaix dauh haih jangx duqv I^saa^laa^en wuov norm mbuox.”
• ⁵ Ninh mbuo dongh hnyouv daav za'eix,
• yaac liepc jiez ngaengc waac caux meih doix-dekc.
• ⁶ Se maaih E^ndom Mienh caux
  I^saa^maa^en Mienh,
• Mo^apc Mienh caux Haagaa Mienh,
• ⁷ maaih Ge^mbaan Mienh, Ammon Mienh, caux Aa^maa^lekv Mienh,
• maaih Fi^li^saa^die Mienh caux Tailaqv Mienh.
• ⁸ Atc^si^lie Mienh yaac caux ninh mbuo gapv jienv doic.
• Ninh mbuo tengx qaqv Lotv nyei zeiv-fun.
• ⁹ Tov zoux bun ninh mbuo hnangv meih zoux bun Mi^ndien Mienh, * Domh Jien 7:1-23
• yaac hnangv yiem Kison Ndaaih zoux bun Si^se^laa caux Yaa^mbin, * Domh Jien 4:6-22
• ¹⁰ dongh yiem En^ndo zuqc mietc,
• benx ndau nyei buonx. * Faan zaqc gorngv “benx nqaiv an ndau”.
• ¹¹ Tov bun ninh mbuo zoux hlo nyei mienh zuqc hnangv Olepv caux Se^epc, * Domh Jien 7:25
• ninh mbuo nyei zuangx hungh dorn yaac zuqc hnangv Ze^mbaa caux Saanx^mun^naa. * Domh Jien 8:12
• ¹² Ninh mbuo gorngv, “Mbuo oix zuqc zorqv
• Tin-Hungh nyei miev-ciangv
• weic benx mbuo ganh nyei buonc.”
• ¹³ O yie nyei Tin-Hungh aac, tov bun ninh mbuo hnangv nziaaux-zunc nyei nie-mbung,
• yaac hnangv cuqv-maux zuqc nziaaux buonc nor.
• ¹⁴ Hnangv douz buov qui gemh,
• yaac hnangv douz-mbietc zieqc jienv mbong,
• ¹⁵ tov hnangv naaic longc meih nyei domh nziaaux zunc ninh mbuo,
• yaac longc meih nyei domh mbiungc-nziaaux haeqv ninh mbuo gamh nziex haic.
• ¹⁶ O Ziouv aac, tov bun ninh mbuo zuqc baaic hmien nyaiv nzengc
• weic bun ninh mbuo daaih lorz meih. * Faan zaqc se meih nyei mengh.
• ¹⁷ Tov bun ninh mbuo yietc liuz nyaiv yaac gamh nziex,
• bun ninh mbuo baaic hmien yaac zuqc mietc.
• ¹⁸ Tov bun ninh mbuo hiuv duqv kungx meih ganh hnangv,
• dongh maaih mbuox heuc Ziouv,
• se Yiem Hlang Jiex gunv lungh ndiev Wuov Dauh.