Singx Nzung 59

Daux Gaux Tov Njoux
Biaux Ndutv Win-Wangv

Jiu bun dorh nzung nyei mienh. Longc “Maiv Dungx Mietc”nyei pou. Ndaawitv zoc nyei mikv^taam nzung, fiev doix Saulo paaiv mienh mingh zuov Ndaawitv nyei biauv, oix zorqv ninh daix. * Beiv mangc 1 Saa^mu^en 19:11 .

• ¹ Yie nyei Tin-Hungh aah! Tov njoux yie biaux ndutv yie nyei win-wangv.
• Tov beu yie biaux ndutv oix mborqv yie wuov deix mienh.
• ² Njoux yie biaux ndutv zoux orqv sic wuov deix,
• se njoux yie biaux ndutv daix mienh nyei mienh.
• ³ Mangc maah! Ninh mbuo bingx jienv zuov oix zorqv yie nyei maengc.
• Ciouv nyei mienh gapv zunv oix mborqv yie.
• O Ziouv aah! Maiv zeiz weic yie zoux dorngc fai yie zoux nyei haaix nyungc zuiz,
• ⁴ maiv gunv yie maiv zoux haaix nyungc dorngc,
• ninh mbuo tiux daaih liuc leiz mborqv yie.
• Tov gaanv daaih tengx yie. Tov daaih mangc maah!
• ⁵ Ziouv, Nernh Jiex nyei Tin-Hungh,
• zoux I^saa^laa^en Mienh nyei Tin-Hungh.
• Tov jiez daaih dingc maanc fingx nyei zuiz.
• Maiv dungx korv-lienh daav orqv za'eix nyei mienh. Selaa
• ⁶ Ninh mbuo hnoi-hnoi lungh maanz-hmuangx nzuonx daaih,
• hnangv juv nor njunh,
• yaac saau gormx zingh gu'nyuoz.
• ⁷ Ninh mbuo nyei nzuih qaqv gorngv maiv benx nyei waac.
• Ninh mbuo hnangv maaih nzuqc ndaauv yiem ninh mbuo nyei nzuih meix,
• weic zuqc ninh mbuo hnamv, “Haaix dauh haih muangx haiz yie mbuo?”
• ⁸ Mv baac Ziouv aah! Meih jatv ninh mbuo.
• Meih huotv maanc fingx.
• ⁹ Meih zoux yie nyei Qaqv. Yie zuov jienv meih.
• O Tin-Hungh aah! Meih zoux yie wuonv haic nyei dorngx.
• ¹⁰ Yie nyei Tin-Hungh ziepc zuoqv nyei hnamv yie, oix daaih tengx * Fai buangh. yie.
• Yie nyei Tin-Hungh oix bun yie duqv buatc yie nyei win-wangv suei.
• ¹¹ O Ziouv, yie mbuo nyei torngv-baaih aah!
• Maiv dungx daix ninh mbuo. Nziex yie nyei baeqc fingx haih la'kuqv.
• Tov longc meih nyei qaqv bun ninh mbuo faatv nzaanx,
• bun ninh mbuo zuqc baaic.
• ¹² Laaix ninh mbuo nyei nzuih nyei zuiz,
• caux ninh mbuo nyei nzuih meix gorngv nyei waac,
• tov bun ninh mbuo zoux maux nyei sic benx hlaang hlopv ninh mbuo.
• Laaix ninh mbuo zioux caux gorngv-baeqc,
• ¹³ tov meih qiex jiez, bun ninh mbuo zuqc mietc,
• mietc taux ninh mbuo zutc nzengc.
• Zuangx mienh ziouc hiuv duqv Tin-Hungh gunv I^saa^laa^en Mienh, * Fai Yaakopv.
• zungv gunv taux jomc lungh gorn. * Fai “Taux jomc lungh gorn zuangx mienh ziouc hiuv duqv, Tin-Hungh gunv I^saa^laa^en Mienh”. Selaa
• ¹⁴ Ninh mbuo hnoi-hnoi lungh maanz-hmuangx nzuonx daaih,
• hnangv juv nor njunh,
• yaac saau gormx zingh gu'nyuoz.
• ¹⁵ Ninh mbuo hnangv juv nor,
• saau jienv mingh lorz hnaangx nyanc.
• Se gorngv maiv duqv nyanc beuv
• ninh ziangh muonz njunh.
• ¹⁶ Mv baac yie oix baaux nzung ceng meih nyei qaqv.
• Lungh ndorm yie oix baaux nzung mbui nyei ceng meih ziepc zuoqv nyei hnamv mienh.
• Weic zuqc meih zoux yie wuonv haic nyei dorngx,
• yie zuqc zeqc naanc nyei hnoi-nyieqc meih zoux yie kaux nyei dorngx.
• ¹⁷ O yie nyei Qaqv * Beiv mangc Singx Nzung 59:9 . aah! Yie oix baaux nzung ceng meih.
• O Tin-Hungh aah! Meih zoux yie wuonv nyei laauh,
• dongh bun cing meih ziepc zuoqv nyei hnamv yie wuov dauh Tin-Hungh.