Singx Nzung 37 * Naaiv diuh nzung longc Hipv^lu waac nyei yietc norm jiex yietc norm nzaangc-maac zoux yietc douc yietc douc nyei nzaangc-gorn.

Zoux Orqv Nyei Mienh Caux
Kuv Mienh Nyei Setv Mueiz

Ndaawitv zoc nyei singx nzung.

• ¹ Maiv dungx weic zoux orqv nyei mienh guaax hnyouv.
• Yaac maiv dungx mueic jieqv zoux dorngc nyei mienh.
• ² Weic zuqc ninh mbuo hnangv miev nor, siepv-siepv nyei nyaux mingh.
• Yaac hnangv miev-maeng nor, nqaai nzengc.
• ³ Oix zuqc kaux Ziouv yaac zoux kuv sic,
• meih ziouc duqv baengh orn nyei yiem naaiv norm deic-bung.
• ⁴ Oix zuqc a'hneiv lorz Ziouv nyei orn-lorqc,
• ninh ziouc ziux meih nyei hnyouv oix nyei ceix bun meih.
• ⁵ Oix zuqc zorqv meih nyei jauv fungx bun Ziouv,
• yaac kaux ninh, ninh ziouc tengx meih zoux ziangx.
• ⁶ Ninh oix bun meih zoux baengh fim nyei jauv hnangv njang nor ziux cuotv daaih,
• bun meih nyei gong-fim hnangv lungh aanx zanc nyei njang.
• ⁷ Oix zuqc yiem Ziouv nyei nza'hmien sekv-sekv nyei longc noic zuov ninh.
• Maiv dungx weic ei ganh nyei jauv duqv longx
• fai ei waaic nyei za'eix zoux wuov deix guaax hnyouv.
• ⁸ Maiv dungx qiex jiez, oix zuqc guangc nqoi nouz mienh nyei hnyouv.
• Maiv dungx guaax hnyouv,
  naaiv kungx dorh mienh mingh zoux orqv sic hnangv.
• ⁹ Zoux orqv nyei mienh oix zuqc pai guangc mingh,
• mv baac zuov jienv Ziouv wuov deix duqv nzipc naaiv norm deic-bung.
• ¹⁰ Maiv lauh maiv maaih orqv mienh aqv.
• Maiv gunv meih longx-longx nyei mangc ninh yiem nyei dorngx, ninh maiv yiem naaic aqv.
• ¹¹ Mv baac nyiemc ganh zoux faix wuov deix oix duqv nzipc naaiv norm deic-bung.
• Ninh mbuo yaac bungx-zuoqc, baengh orn nyei yiem. * Matv^taai 5:5
• ¹² Mienh waaic mienh daav za'eix hoic kuv mienh,
• yaac dorng jienv ninh mbuo ngaatc nyaah.
• ¹³ Ziouv kuh jatv haic zoux waaic nyei mienh
• weic zuqc ninh hiuv duqv ninh mbuo zuqc mietc nyei ziangh hoc oix taux aqv.
• ¹⁴ Orqv mienh baeng cuotv nzuqc ndaauv yaac baeng juang-zinx,
• oix hoic mienh jomc mienh caux dangx-donx nyei mienh,
• yaac daix zoux horpc nyei mienh.
• ¹⁵ Mv baac ninh mbuo nyei nzuqc ndaauv oix nzopv ninh mbuo ganh nyei mba'nziu,
• ninh mbuo nyei juang-zinx yaac oix zuqc wuotv nauv.
• ¹⁶ Kuv mienh maaih nyei deix baav ga'naaiv,
• corc gauh longx mienh waaic mienh maaih nyei yietc zungv zinh zoih.
• ¹⁷ Weic zuqc mienh waaic mienh nyei buoz oix zuqc nauv,
• mv baac Ziouv zoux longx bun kuv mienh.
• ¹⁸ Ziouv hiuv duqv maiv maaih dorngx nqemh nyei mienh nyei hnoi-nyieqc.
• Ninh mbuo nzipc nyei buonc oix yietc liuz yiem.
• ¹⁹ Ninh mbuo yiem kuonx naanh nyei hnoi-nyieqc maiv zuqc nyaiv,
• ngorc hnaangx nyei ziangh hoc ninh mbuo duqv nyanc beuv.
• ²⁰ Mv baac mienh waaic mienh oix zuqc mietc.
• Ziouv nyei win-wangv se hnangv lomc nyei miev-biangh nyei njang-laangc ziec nzengc,
• hnangv douz-sioux nor, mitc mi'aqv.
• ²¹ Mienh waaic mienh gaav mingh yaac maiv jaauv,
• mv baac kuv mienh hnyouv jangv, fungx zingh nyeic bun mienh.
• ²² Weic zuqc Ziouv ceix fuqv nyei mienh oix duqv nzipc naaiv norm deic-bung,
• mv baac zuqc ninh zioux wuov deix oix zuqc pai guangc.
• ²³ Ziouv liepc wuonv mienh yangh nyei zaux-caaiv.
• Ninh yaac a'hneiv wuov dauh yangh nyei jauv.
• ²⁴ Maiv gunv ninh ndorpc, ninh maiv ziangh dauh king njiec,
• weic zuqc Ziouv nyei buoz baav jienv ninh.
• ²⁵ Zinh ndaangc yie lunx, ih zanc yie gox aqv,
• mv baac yie maiv buatc jiex kuv mienh zuqc guangc,
• yaac maiv buatc jiex ninh nyei zeiv-fun tov nyanc.
• ²⁶ Ninh zoux hnyouv jangv yaac a'hneiv bun mienh gaav,
• ninh nyei fun-faqv bun ninh duqv fuqv.
• ²⁷ Oix zuqc leih nqoi orqv sic,
  zoux kuv sic,
• meih ziouc duqv yietc liuz yiem.
• ²⁸ Weic zuqc Ziouv a'hneiv baengh fim nyei jauv,
• ninh yaac maiv guangc ninh nyei cing-nzengc baeqc fingx.
• Ninh oix yietc liuz beu jienv kuv mienh,
• mv baac mienh waaic mienh nyei zeiv-fun oix zuqc pai guangc.
• ²⁹ Kuv mienh zungv oix nzipc naaiv norm deic-bung,
• yaac duqv yiem naaiv weic yietc liuz.
• ³⁰ Kuv mienh nyei nzuih gorngv cong-mengh nyei waac,
• ninh nyei mbietc gorngv baengh fim nyei jauv.
• ³¹ Tin-Hungh nyei leiz-latc yiem ninh nyei hnyouv,
• ninh nyei zaux maiv caaiv piatv.
• ³² Mienh waaic mienh cienh kuv mienh,
• oix lorz qangx daix ninh.
• ³³ Ziouv maiv guangc ninh yiem win-wangv nyei buoz-ndiev,
• fai zuqc siemv nyei ziangh hoc yaac maiv bun ninh zuqc dingc zuiz.
• ³⁴ Zuov jienv Ziouv,
• ei jienv ninh nyei jauv zoux,
• ninh ziouc taaih meih, bun meih duqv nzipc naaiv norm deic-bung,
• mienh waaic mienh zuqc pai guangc wuov zanc, meih ziouc duqv buatc aqv.
• ³⁵ Yie buatc jiex mienh waaic mienh maaih hatc maaz hlo haic,
• hnangv Le^mbaa^norn Mbong nyei yietc diuh hlang jiex nyei domh si^ndaa zongh ndiangx nor.
• ³⁶ Mv baac yie * Maaih deix loz-hnoi sou gorngv ninh. aengx yangh naaic jiex, ninh zitc mi'aqv.
• Maiv gunv yie lorz ninh, yaac lorz maiv buatc.
• ³⁷ Samx mangc maiv maaih dorngx nqemh nyei mienh, yaac mangc longx kuv mienh,
• weic zuqc hnamv baengh orn nyei mienh maaih hoz doic zeiv-fun,
• ³⁸ mv baac baamz zuiz nyei mienh zungv oix zuqc mietc nzengc.
• Orqv mienh nyei zeiv-fun oix zuqc pai guangc mingh.
• ³⁹ Kuv mienh duqv njoux se yiem Ziouv daaih,
• zuqc kouv naanc nyei ziangh hoc,
• ninh zoux ninh mbuo ndaauh kaux nyei dorngx.
• ⁴⁰ Ziouv tengx ninh mbuo, njoux ninh mbuo.
• Ninh tengx ninh mbuo biaux ndutv mienh waaic mienh yaac njoux ninh mbuo,
• weic zuqc ninh mbuo ndaauh kaux ninh.