Singx Nzung 12

Daux Gaux Tov Ziouv Tengx
Hingh Jiex Orqv Mienh

Jiu bun dorh nzung nyei mienh.
Ziux se^me^nitv.
Ndaawitv zoc nyei singx nzung.

• ¹ O Ziouv aah! Tov meih tengx yie mbuo, weic zuqc maiv maaih kuv mienh aqv.
• Yiem baamh mienh mbu'ndongx ziepc zuoqv nyei mienh zutc nzengc mi'aqv.
• ² Dauh dauh gorngv-baeqc nduov ganh nyei juangc laangz mienh.
• Ninh mbuo nyei nzuih gorngv waac mbiaangc ceng mienh,
• yaac maaih i diuc hnyouv.
• ³ Tov Ziouv gaatv guangc ceng weic nduov mienh a'hneiv nyei yietc zungv nzuih meix
• caux bungx waac-maux, ceng-hlo wuov deix mienh nyei mbietc.
• ⁴ Ninh mbuo gorngv, “Yie mbuo haih bangc yie mbuo nyei mbietc hingh jiex.
• Yie mbuo nyei nzuih meix benx yie mbuo ganh nyei. Haaix dauh zoux yie mbuo nyei ziouv?”
• ⁵ Ziouv gorngv, “Yie ih zanc oix jiez daaih
• weic zuqc jomc nyei mienh zuqc zeix,
• doh naanc mienh njunh jienv yiem.
• .
• Yie oix bun ninh mbuo baengh orn nyei yiem
• dongh ninh mbuo maaih lamh hnamv oix duqv yiem nyei dorngx.”
• ⁶ Ziouv nyei waac * Ziouv nyei waac fai Ziouv laengz nyei waac. se cing-nzengc nyei waac,
• hnangv longc louh douz sinx jiex siec nzunc zien haic nyei nyaanh nor.
• ⁷ O Ziouv aac, meih zungv beu jienv yie mbuo,
• meih oix goux jienv yie mbuo, bun yie mbuo biaux ndutv naaiv doic mienh.
• ⁸ Baamh mienh ceng orqv nyei, waaic nyei jauv wuov zanc,
• orqv mienh youh jienv mingh faam-bung feix louc.