Mbaa^laa^am Douc
Daauh Nzunc Waac

¹ Mbaa^laa^am gorngv mbuox Mbaalaakv, “Oix zuqc ceix siec norm ziec-dorngh weic yie, aengx liuc leiz siec dauh ngongh gouv, siec dauh ba'gi yungh gouv bun yie.” ² Mbaalaakv ziouc ei jienv Mbaa^laa^am nyei waac zoux. Ninh mbuo i dauh yiem mouz norm ziec-dorngh, yietc norm ziec-dorngh ziec yietc dauh ngongh gouv caux yietc dauh ba'gi yungh gouv.

³ Mbaa^laa^am gorngv mbuox Mbaalaakv, “Meih souv jienv naaiv meih buov ziec nyei ga'naaiv ga'hlen, yie ganh mingh pien deix. Nziex Ziouv daaih buangh yie. Ninh mbuox haaix nyungc yie, yie zungv mbuox meih.”Mbaa^laa^am ziouc faaux norm dorngx hlang nyei, njang nyei. * njang nyei eix leiz se maiv maaih ndiangx, maiv maaih miev nyei dorngx.

⁴ Tin-Hungh buangh Mbaa^laa^am, Mbaa^laa^am ziouc gorngv, “Yie liuc leiz ziangx siec norm ziec-dorngh. Mouz norm ziec-dorngh yie ziec dauh ngongh gouv caux dauh ba'gi yungh gouv.”

⁵ Ziouv mbuox Mbaa^laa^am hnangv haaix nor gorngv, yaac heuc ninh, “Nzuonx Mbaalaakv wuov zorqv naaiv deix waac mbuox ninh.”

⁶ Mbaa^laa^am ziouc nzuonx, buatc Mbaalaakv caux Mo^apc wuov deix yietv zungv jien corc souv jienv ninh ziec nyei ga'naaiv nyei ga'hlen. ⁷ Mbaa^laa^am ziouc gorngv cuotv ninh douc nyei waac. Ninh gorngv,

• “Mo^apc Hungh, Mbaalaakv, dorh yie cuotv Aalam, * Se Silie Deic-Bung.
• se dorh yie yiem dong bung maengx nyei mbong daaih.
• Ninh gorngv, ‘Daaih maah! Tengx yie zioux Yaakopv nyei zeiv-fun.
• Daaih maah! Tengx yie zengx
  I^saa^laa^en Mienh.’
• ⁸ Tin-Hungh maiv zioux wuov deix, yie hnangv haaix nor haih zioux?
• Ziouv maiv zengx nyei, yie hnangv haaix nor haih zengx?
• ⁹ Yie yiem mbaengx-ningv buatc ninh mbuo.
• Yie yiem hlang nyei dorngx mangc jienv ninh mbuo,
• se yietc fingx maiv zorpc ganh fingx nyei mienh,
• beiv zuangx guoqv nyei baeqc fingx,
• ninh mbuo funx ganh lengc jeiv nyei mienh.
• ¹⁰ Yaakopv nyei zeiv-fun ndongc nie-mbung camv,
• haaix dauh haih saauv duqv zienz?
• Haaix dauh haih funx I^saa^laa^en Mienh biei gouv nyei yietc gouv?
• Tov bun yie guei seix hnangv kuv mienh,
• yaac bun yie nyei setv mueiz hnoi hnangv ninh nyei nor.”

¹¹ Mbaalaakv gorngv mbuox Mbaa^laa^am, “Meih zoux haaix nyungc bun yie? Yie dorh meih daaih naaiv weic zioux yie nyei win-wangv, mv baac meih kungx buang waac bun ninh mbuo hnangv.”

¹² Mbaa^laa^am dau, “Yie oix zuqc gorngv Ziouv bun yie gorngv wuov deix waac maiv zeiz?”

Mbaa^laa^am Douc
Da'nyeic Nzunc Waac

¹³ Mbaalaakv aengx gorngv mbuox ninh, “Caux yie mingh ganh norm dorngx oc. Yiem wuov meih haih mangc duqv buatc deix I^saa^laa^en Mienh mv baac buatc maiv nzengc. Meih yiem wuov norm dorngx tengx yie zioux ninh mbuo.” ¹⁴ Mbaalaakv ziouc dorh Mbaa^laa^am taux Sofim nyei ndeic, yiem Bitc^gaa Mbong-ningv. Yiem wuov ninh aengx ceix siec norm ziec-dorngh, mouz norm ziec-dorngh ziec dauh ngongh gouv caux dauh ba'gi yungh gouv.

¹⁵ Mbaa^laa^am gorngv mbuox Mbaalaakv, “Meih souv jienv naaiv meih ziec nyei ga'naaiv ga'hlen, zuov yie mingh wuov maengx buangh Ziouv. ”

¹⁶ Ziouv daaih buangh Mbaa^laa^am, mbuox ninh horpc zuqc hnangv haaix nor gorngv, yaac heuc ninh, “Nzuonx Mbaalaakv wuov douc naaiv deix waac mbuox ninh.”

¹⁷ Mbaa^laa^am nzuonx mingh, buatc Mbaalaakv caux Mo^apc Mienh nyei jien souv jienv ninh ziec nyei ga'naaiv nyei ga'hlen. Mbaalaakv naaic ninh, “Ziouv hnangv haaix nor gorngv?”

¹⁸ Mbaa^laa^am aengx gorngv cuotv ninh douc nyei waac,

• “Sipc^bo nyei dorn, Mbaalaakv, daaih muangx maah!
• Muangx yie oix gorngv nyei waac.
• ¹⁹ Tin-Hungh maiv zeiz mienh, ninh maiv gorngv-baeqc.
• Ninh yaac maiv zeiz baamh mienh, ziouc maiv zuqc goiv za'eix.
• Gorngv liuz nyei waac, ninh maiv zeiz oix ei jienv zoux fai?
• Ninh laengz nyei waac, ninh maiv zeiz oix zoux ziangx?
• ²⁰ Yie zipv lingc buang waac,
• Tin-Hungh ceix fuqv bun ninh mbuo, yie yaac maiv haih goiv nzuonx.
• ²¹“Maiv buatc Yaakopv nyei zeiv-fun oix maaih haaix nyungc nzauh kouv.
• Maiv buatc I^saa^laa^en Mienh maaih haaix nyungc kuonx naanh.
• Ziouv, ninh mbuo nyei Tin-Hungh, caux ninh mbuo yiem,
• houc hungh nyei qiex yiem ninh mbuo mbu'ndongx.
• ²² Tin-Hungh dorh ninh mbuo cuotv I^yipv Deic-Bung,
• ninh mbuo maaih qaqv hnangv hieh ngongh nor.
• ²³ Maiv haih bungx haaix nyungc faatv hoic Yaakopv nyei zeiv-fun.
• Maiv haih bungx ding bungx jiemx hoic I^saa^laa^en Mienh.
• Ih zanc mienh oix gorngv taux Yaakopv nyei zeiv-fun, I^saa^laa^en Mienh,
• ‘Mangc gaax Tin-Hungh hnangv haaix nor zoux!’
• ²⁴ Naaiv fingx mienh jiez sin hnangv dauh sienh nyeiz nor,
• souv jienv hnangv dauh sienh gouv.
• Ninh maiv bueix taux nyanc nzengc ninh zorqv nyei orv,
• aengx hopv nzengc ninh daix daaih nyei nziaamv.”

²⁵ Mbaalaakv gorngv mbuox Mbaa^laa^am, “Meih maiv zioux yietc deix ninh mbuo, yaac maiv dungx buang waac ninh mbuo maah!”

²⁶ Mbaa^laa^am dau, “Yie mbuox jiex meih, Ziouv gorngv haaix nyungc, yie oix zuqc ei jienv zoux maiv zeiz?”

Mbaa^laa^am Douc
Da'faam Nzunc Waac

²⁷ Mbaalaakv gorngv mbuox Mbaa^laa^am, “Daaih maah! Yie dorh meih mingh ganh norm dorngx. Nziex Tin-Hungh horpc hnyouv bun meih yiem wuov norm dorngx tengx yie zioux ninh mbuo.” ²⁸ Mbaalaakv ziouc dorh Mbaa^laa^am taux Be^o Mbong-ningv. Yiem naaic haih mangc njiec buatc deic-bung-huaang.

²⁹ Mbaa^laa^am gorngv mbuox Mbaalaakv, “Yiem naaiv oix zuqc ceix siec norm ziec-dorngh weic yie, aengx liuc leiz siec dauh ngongh gouv, siec dauh ba'gi yungh gouv.” ³⁰ Mbaalaakv ziouc ei jienv Mbaa^laa^am nyei waac zoux. Yiem mouz norm ziec-dorngh ziec dauh ngongh gouv caux dauh ba'gi yungh gouv.