Ni^naa^we Oix Zuqc Kouv Aqv

• ¹ Guoqv jienv mienh nziaamv nyei zingh oix zuqc kouv aqv.
• Maaih gorngv-baeqc nyei sic caux luv daaih nyei ga'naaiv buangv nzengc.
• Caangv nyei sic yaac maiv dingh.
• ² Muangx maah! Biaav-bin nyei qiex mbui fiuv-fiuv nyei,
• cie-yienh guinh guinh japc japc nyei,
• maaz tiux mingh lopc lopc nyei,
• mborqv jaax nyei cie njih njungx njapc nyei.
• ³ Geh maaz baeng tiux mingh mborqv jaax,
• nzuqc ndaauv zaengh zaengh nyei,
• cang njih njungx njapc nyei.
• Zuqc daix nyei mienh ndui-ndui wuov,
• janx-daic nyei sei maiv haih saauv maiv zienz,
• mienh zungv ndiqv zuqc sei ndorpc.
• ⁴ Ni^naa^we hnangv naaiv nor zuqc daaih weic zuqc ninh se hnangv maaic buonv-sin nyei m'sieqv dorn maaih hienx nyei sic camv.
• Ninh zoux nzueic yuoqc mienh, bungx faatv baeng mienh zuqc mietc.
• Ninh bangc ninh hienx nyei sic bun ziex norm guoqv zuqc maaic zoux nouh,
• yaac longc ninh nyei faatv nduov maanc fingx.
• ⁵ Nernh Jiex nyei Ziouv gorngv, “Yie caux meih benx win.
• Yie oix nzien meih nyei junh faaux gomv meih nyei hmien.
• Yie oix bun maanc fingx mangc meih laengh gaengv nyei yiem,
• bun norm-norm guoqv buatc meih zuqc nyaiv.
• ⁶ Yie oix zorqv laih hlopv nyei ga'naaiv zoi meih,
• oix ki meih,
• bun meih zuqc mienh qaqv mangc.
• ⁷ Haaix dauh buatc meih ziouc oix hluotv nqaang biaux yaac gorngv,
• ‘Ni^naa^we Zingh zuqc baaic huaang mi'aqv. Haaix dauh oix tengx ninh nzauh?’
• Oix zuqc mingh haaix norm dorngx lorz mienh orn ninh nyei hnyouv?”
• ⁸ Ni^naa^we aac, meih gauh longx yiem Nai^aa Ndaaih hlen,
• I^yipv Deic-Bung nyei domh zingh, Te^mbetc * Hipv^lu waac gorngv No Aamon fai?
• Te^mbetc yaac maaih wuom weih jienv,
• maaih koiv beu jienv ninh,
• maaih wuom zoux ninh nyei zingh laatc.
• ⁹ E^ti^o^bie * E^ti^o^bie fai Kutv. caux I^yipv se ninh nyei qaqv, yaac maiv maaih soux mouc.
• Putv caux Li^mbie yaac tengx ninh.
• ¹⁰ Mv baac ninh corc zuqc caangv mingh,
• zuqc yiem ganh norm deic-bung.
• Yiem diuh diuh jauv-kuv,
• ninh nyei gu'nguaaz zuqc mienh zong huv.
• Ninh nyei zoux hlo nyei zuangx mienh zuqc limc ndoh jienv,
• mienh yaac dingc maengc mangc, zorqv ninh mbuo bun nqoi.
• ¹¹ Ni^naa^we aac, meih yaac oix zuqc diuv nquin mongh longh.
• Meih oix lorz dorngx biaux ndutv,
• bingx meih nyei win-wangv.
• ¹² Meih wuonv nyei zingh laatc ziouc hnangv ngongh nyorx ndiangx
• maaih zuoqc ndaangc nyei daauh torngx ngongh nyorx biouv.
• Yietv nqamv ziouc ndortv
• bieqc oix nyanc nyei mienh nyei nzuih.
• ¹³ Mangc maah! Meih nyei baeng se hnangv yiem meih mbu'ndongx nyei m'sieqv dorn nor.
• Meih nyei guoqv nyei gaengh yiem win-wangv nyei nza'hmien koi nqoi.
• Douz yaac buov mietc meih nyei gaengh sorn.
• ¹⁴ Oix zuqc zaangh wuom liouh jienv win-wangv daaih weih jienv,
• aengx ceix meih nyei zingh laatc wuonv.
• Caix nie zoux nie-zun,
• liuc leiz ziangx nie-zun nyei zorngh.
• ¹⁵ Yiem wuov meih zungv zuqc douz buov qui,
• zuqc nzuqc ndaauv daix meih,
• hnangv jopv-nyeic naqv nzengc gaeng-zuangx nor.
• Gunv hiaangx jiez daaih hnangv jopv-nyeic lunx,
• hiaangx jiez daaih hnangv jopv-nyeic gox.
• ¹⁶ Meih jaa saeng-eix mienh
• gauh camv lungh nyei hleix.
• Mv baac ih zanc maiv buatc mi'aqv,
• hnangv jopv-nyeic yang ndaatv ndaix jienv mingh mi'aqv.
• ¹⁷ Meih nyei zoux hlo nyei mienh hnangv jopv-nyeic nor camv,
• meih mbuo nyei jien yaac camv hnangv yietc domh guanh jopv-nyeic,
• taux juangv nyei hnoi nzopc jienv laatc gu'nguaaic.
• Mba'hnoi yietv cuotv daaih ziouc ndaix jienv mingh mi'aqv,
• maiv maaih haaix dauh hiuv duqv ninh mbuo jiex haaix.
• ¹⁸ O Atc^si^lie nyei hungh diex aah!
• Meih nyei goux yungh mienh * goux yungh mienh fai “gunv meih mbuo wuov deix”. m'njormh nzengc mi'aqv.
• Meih nyei zoux hlo nyei mienh yaac m'njormh nzengc.
• Meih nyei baeqc fingx faatv nzaanx nyei yiem wuov mbong,
• maiv maaih haaix dauh dorh ninh mbuo daaih zunv.
• ¹⁹ Meih zuqc mun kouv, zungv maiv haih zorc,
• zuqc mun nyei dorngx siang haic.
• Da'faanh haiz gorngv meih zuqc kouv nyei fienx,
• mienh ziouc a'hneiv nyei mbaix buoz-zaangv,
• weic zuqc maiv maaih haaix dauh maiv zuqc jiex
• meih zanc-zanc zoux doqc nyei sic.