Ni^naa^we Zuqc Mbaang

• ¹ Ni^naa^we Zingh aac, maaih mienh daaih mborqv meih aqv.
• Oix zuqc maaih mienh yiem zingh nyei laauh zuov jienv,
• mbungh jienv jauv-kuv,
• liuc leiz ziangx,
• gapv jienv qaqv mborqv jaax.
• ² Ziouv oix bun Yaakopv nyei njang-laangc nzuonx daaih hnangv loz wuov nor,
• yaac hnangv I^saa^laa^en nyei njang-laangc,
• maiv gunv zoux waaic nyei mienh bun ninh mbuo zuqc baaic waaic,
• yaac bun ninh mbuo nyei a'ngunc hmei-nquaah waaic nzengc.
• ³ Ninh nyei mborqv jaax henv nyei baeng nyei torngv-baaih siqv nyei.
• Baeng zuqv nyei lui-houx siqv-hongc.
• Ninh mbuo liuc leiz mborqv jaax wuov hnoi,
• mborqv jaax cie nyei hlieqv njapc njapc nyei hnangv douz nor.
• Mborqv jaax nyei maaz jiex naaiv jiex wuov beqv jienv mingh. * Ih jaax hnoi mienh maiv hiuv dingc naaiv joux Hipv^lu waac maaih haaix nyungc eix leiz.
• ⁴ Mborqv jaax cie ndutc ndutc nyei gan hei-horngc mingh,
• yiem wuov domh zuangx zaamc siepv-siepv nyei tiux mingh tiux daaih.
• Buatc ninh mbuo hnangv douz-baav nor njang,
• yaac hnangv mba'lingc nor siepv.
• ⁵ Ninh heuc ninh nyei baeng-bieiv daaih,
• ninh mbuo yaac ndorpc ndorpc lorqv-lorqv nyei mingh.
• Ninh mbuo tiux jienv mingh taux zingh laatc,
• zorqv torngv wuoqc ginc nyei ga'naaiv torngv jienv. * Loz-hnoi mienh mborqv jaax ninh mbuo longc diuh ndiangx, longc hlieqv buang jienv dueiv-mueiz, aengx ndiux jienv qorng fongv mingh zong zingh laatc gaengh huv. Yiem zingh laatc gu'nguaaic wuov deix baeng haih longc la'bieiv zoi njiec fai longc juang-zinx buonv njiec. Zong laatc gaengh nyei baeng ziouc longc kuaaiv ga'naaiv jangv nyei torngv jienv ninh mbuo nyei m'nqorngv gu'nguaaic.
• ⁶ Zaeqv ndaaih nyei gaengh koi nqoi mi'aqv,
• hungh dinc nyei mienh lunc nzengc. * Fai “hungh dinc yuqc nzengc mi'aqv” fai “hungh dinc mbaang nzengc mi'aqv”.
• ⁷ Baeng ciev nzengc hungh maac * Mienh maiv hiuv dingc naaiv joux Hipv^lu waac nyei eix leiz. nyei lui-houx,
• caangv ninh mingh mi'aqv.
• Ninh nyei m'sieqv bou nzauh,
• nzuei ganh nyei la'kuotv
• heuc jienv hnangv baeqc gopv heuc nyei qiex.
• ⁸ Ni^naa^we se hnangv wuom-domh,
• wuom liouc jienv cuotv.
• Maaih mienh heuc jienv gorngv, “Dingh! Dingh!”
• Mv baac maiv maaih haaix dauh huin nzuonx.
• ⁹ Luv jiem,
• luv nyaanh maah!
• Maaih nyei zinh zoih camv haic, zungv maiv haih nzengc,
• maaih nyungc-nyungc jaaix haic nyei ga'naaiv.
• ¹⁰ Baaic waaic baaic huaang,
  zuqc mietc nzengc aqv loh!
• Mienh nyei mba'nziu yuqc, cingh mborqc nqaapv jaax,
• sin zaangc nyei qaqv zitc mi'aqv.
• Dauh dauh nyei hmien mbienc nzengc.
• ¹¹ Sienh nyei dorngx
• caux dorh sienh dorn nyei kuotv yiem haaix?
• Se sienh gouv sienh nyeiz bieqc cuotv nyei dorngx yiem haaix? * Fai “sienh dorh ninh zorqv daaih nyei orv daaih”.
• Sienh dorn yiem wuov yaac maiv maaih mienh haeqv.
• ¹² Sienh gouv betv ninh duqv daaih nyei orv gaux uix sienh dorn,
• aengx ngaatc orv daaih bun sienh nyeiz.
• Ninh siou ninh betv daaih nyei orv buangv ninh yiem nyei kuotv,
• ninh ngaatc daaih nyei orv buangv nzengc kuotv gu'nyuoz.
• ¹³ Nernh Jiex nyei Ziouv gorngv,
• “Yie caux meih benx win.
• Yie oix buov meih nyei mborqv jaax cie benx sioux nzengc.
• Meih mbuo nyei sienh dorn oix zuqc nzuqc ndaauv daix.
• Dongh meih mbuo caangv ganh deix mienh nyei ga'naaiv, yie oix zorqv nzengc.
• Yiem naaiv mingh maiv maaih haaix dauh haiz
• meih nyei douc fienx mienh nyei qiex.