I^saa^laa^en Mienh Waaic Jienv Njiec

• ¹ Yie zuqc kouv aqv.
• Yie se hnangv siou baac nqaai gorng nyei biouv nor,
• yaac hnangv mienh gaeqv baac zengc njiec nyei a'ngunc biouv.
• Maiv maaih yietc joih biouv nyanc,
• yaac maiv maaih dongh yie nyei hnyouv oix nyei
• daauh torngx zuoqc nyei ngongh nyorx biouv.
• ² Yiem naaiv norm deic-bung * deic-bung fai baamh gen.
• maiv zengc yietc dauh gan longx Tin-Hungh nyei mienh.
• Yiem zuangx mienh mbu'ndongx
• maiv maaih yietc dauh hnyouv zingx.
• Dauh dauh mienh zuov jienv daix mienh,
• gorqv-mienh longc mungz mingh zaeng ninh nyei gorx-youz.
• ³ Ninh mbuo nyei buoz za'gengh haih zoux orqv sic.
• Zoux jien nyei mienh caux siemv zuiz jien oix nyanc nyaanh hmuangx,
• maaih hatc maaz nyei mienh gorngv cuotv yiem hnyouv hnamv orqv nyei za'eix.
• Ninh mbuo gapv doic caangh laangh zoux waaic sic.
• ⁴ Yiem ninh mbuo mbu'ndongx gauh longx jiex nyei mienh se hnangv maaih njimv nyei miev.
• Meih mbuo hnyouv gauh zingx jiex nyei mienh yaac hnangv njimv nyei laatc.
• Siouv gaeng mienh gorngv oix taux nyei hnoi,
• se Tin-Hungh dingc zuiz nyei hnoi taux aqv.
• Ih zanc ninh mbuo lunc nzengc.
• ⁵ Maiv dungx kaux meih nyei juangc laangz mienh,
• yaac maiv dungx sienx haaix dauh loz-gaeng doic.
• Oix zuqc gunv jienv meih mbuo nyei nzuih,
• yaac oix zuqc faix fim caux ganh nyei auv gorngv nyei waac.
• ⁶ Weic zuqc dorn mangc piex die,
• sieqv yaac caux maa doix-dekc,
• mbuangz caux maa-buoc nzaeng jaax,
• mienh nyei win-wangv se ganh nyei biauv zong mienh. * Matv^taai 10:35-36 ; Lugaa 12:53
• ⁷ Mv baac yie ganh aeqv, yie oix mangc jienv Ziouv,
• yie oix zuov jienv dongh njoux yie wuov dauh Tin-Hungh.
• Yie nyei Tin-Hungh oix muangx yie.

Ziouv Dorh Njoux En Daaih

• ⁸ Yie nyei win-wangv aac, maiv dungx huotv yie.
• Maiv gunv yie ndorpc, yie duqv jiez sin daaih.
• Maiv gunv yie zueiz hmuangx gu'nyuoz,
• Ziouv oix zoux yie nyei njang.
• ⁹ Yie oix zuqc diev jienv Ziouv nouz yie,
• weic zuqc yie baamz zuiz dorngc ninh.
• Yie oix zuqc diev jienv
• zuov ninh tengx yie jaiv sic.
• Ninh oix dorh yie cuotv daaih yiem njang gu'nyuoz,
• yie ziouc buatc ninh zoux duqv baengh fim nyei. * Fai “buatc ninh nyei njoux en”.
• ¹⁰ Wuov zanc yie nyei win-wangv ziouc duqv buatc,
• dongh gorngv mbuox yie, “Ziouv, meih nyei Tin-Hungh yiem haaix?”wuov dauh
• oix zuqc nyaiv aqv.
• Yie duqv buatc ninh mbuo zuqc baaic
• hnangv yiem hei-horngc nyei wuom-bamc zuqc mienh caaiv nor.
• ¹¹ Ye^lu^saa^lem aac, ceix zingh laatc nyei hnoi oix taux aqv.
• Taux wuov hnoi meih nyei gapv-jaaix duqv capv cuotv.
• ¹² Taux wuov hnoi meih nyei baeqc fingx ziouc yiem norm-norm dorngx nzuonx daaih lorz meih.
• Ninh mbuo yiem Atc^si^lie Guoqv taux I^yipv Deic-Bung,
• yiem I^yipv taux Yu^fe^ditc Domh Ndaaih,
• yiem naaiv bung koiv taux wuov bung koiv mbu'ndongx,
• yiem naaiv norm mbong taux wuov norm mbong nyei mienh oix nzuonx taux meih naaiv.
• ¹³ Ndau-beih ziouc zuqc baaic huaang nzengc,
• laaix lungh ndiev mienh zoux nyei waaic sic.

Ziouv Korv-Lienh I^saa^laa^en Mienh

• ¹⁴ Ziouv aac, tov goux meih nyei baeqc fingx
• hnangv goux ba'gi yungh mienh longc biaav-mbiaac goux ba'gi yungh nor,
• se meih nzipc daaih nyei ba'gi yungh guanh.
• Ninh mbuo yiem lomc-huaang lengh nyei dorngx,
• yiem ndau-touv longx nyei deic-bung mbu'ndongx hnangv yiem huingx nor.
• Tov bun ninh mbuo yiem Mbaasaan caux Gi^le^aatc lorz nyanc
• hnangv loz-hnoi wuov nor.

¹⁵ Ziouv gorngv,

• “Hnangv meih mbuo cuotv I^yipv Deic-Bung wuov zanc,
• yie oix bun ninh mbuo mangc mbuoqc horngh nyei sic.”
• ¹⁶ Maanc guoqv mienh ziouc buatc yaac zuqc nyaiv,
• maiv gunv ninh mbuo maaih domh qaqv.
• Ninh mbuo ziouc longc buoz buang jienv nzuih,
• m'normh yaac ndung mi'aqv.
• ¹⁷ Ninh mbuo ziouc mbiec nie-mbung hnangv naang nor,
• yaac hnangv nyorng ndau nyei ga'naaiv.
• Ninh mbuo sin zinx jienv cuotv ninh mbuo weih wuonv nyei dorngx.
• Ninh mbuo ziouc huin daaih gamh nziex jienv lorz Ziouv, yie mbuo nyei Tin-Hungh,
• yaac weic Ziouv gamh nziex.
• ¹⁸ O Tin-Hungh aac, maiv maaih ganh dauh zienh hnangv meih.
• Meih guangc meih nzipc daaih zengc njiec nyei mienh nyei zuiz.
• Meih maiv yietc liuz qiex jiez.
• Weic zuqc meih a'hneiv ziepc zuoqv nyei hnamv mienh.
• ¹⁹ Meih aengx oix korv-lienh nzunc yie mbuo,
• yaac zorqv yie mbuo nyei zuiz caaiv jienv.
• Meih oix zorqv yie mbuo nyei zuiz
• zoi njiec ndo nyei koiv.
• ²⁰ Meih oix ziepc zuoqv nyei zoux bun Yaakopv,
• yaac bun Apc^laa^ham nyei zeiv-fun hiuv duqv
• meih ziepc zuoqv nyei hnamv Apc^laa^ham,
• hnangv loz-hnoi meih caux yie mbuo nyei ong-taaix,
• houv jienv laengz jiex nyei ngaengc waac.