Yo^en
Biux Mengh Waac
Naaiv dauh douc waac mienh, mbuox heuc Yo^en, mienh maiv nangc hiuv duqv ninh nyei jauv-louc ndongc haaix camv, yaac maiv nangc hiuv duqv mengh ninh ziangh haaix yiem. Daaix ninh yiem Yesu maiv gaengh cuotv seix 500 taux 400 hnyangx mbu'ndongx, dongh Besie nyei hungh gunv Yu^ndaa Deic-Bung nyei ziangh hoc. Yo^en fiev gorngv taux Baa^letv^dai zuqc domh zeqc naanc, se zuqc jopv-nyeic faanv caux lungh haanz kouv haic. Yiem naaiv deix sic Yo^en buatc benx jangx-hoc biux mengh Ziouv
nyei Hnoi oix taux aqv. Wuov zanc Ziouv
oix dingc maiv ei ninh nyei za'eix zoux horpc nyei mienh nyei zuiz. Yo^en douc waac gorngv Ziouv
oix mienh goiv hnyouv guangc zuiz, ninh ziouc laengz bun ninh mbuo duqv longx hnangv loz wuov nor, yaac ceix fuqv bun ninh nyei baeqc fingx. Aengx maaih nyungc buatc duqv mengh nyei, se Tin-Hungh laengz bun ninh nyei Singx Lingh njiec ninh nyei mienh, maiv gunv m'jangc m'sieqv, gox lunx.
Yo^en 1
Jopv-Nyeic Faanv
1 Naaiv se Be^tu^en nyei dorn,
Yo^en, zipv Ziouv
nyei waac gorngv,
-
2 Meih mbuo mienh gox mienh aah!
- Muangx naaiv deix waac maah!
- Yiem deic-bung nyei yietc zungv baeqc fingx
- oix zuqc baeng m'normh muangx.
- Yiem meih mbuo ziangh nyei hnoi-nyieqc
- fai meih mbuo nyei ong-taaix nyei hnoi-nyieqc,
- maaih naaiv nyungc sic cuotv jiex nyei fai?
-
3 Zorqv naaiv deix sic mbuox meih mbuo nyei fu'jueiv,
- yaac bun meih mbuo nyei fu'jueiv gorngv mbuox ninh mbuo nyei fu'jueiv,
- yaac bun ninh mbuo nyei fu'jueiv gorngv mbuox ninh mbuo nyei fun-faqv.
-
4 Jopv-nyeic guanh nyanc zengc nyei,
- domh jopv-nyeic daaih nyanc.
- Domh jopv-nyeic nyanc zengc nyei,
- jopv-nyeic ndaix daaih nyanc.
- Jopv-nyeic ndaix nyanc zengc nyei,
- jopv-nyeic tiux daaih nyanc.
-
5 Diuv nquin nyei mienh aah! Oix zuqc nyie daaih nyiemv.
- Hopv diuv nyei mienh aah! Oix zuqc nzauh nyiemv,
- weic zuqc gaam nyei diuv dangx mi'aqv,
- maiv taux meih mbuo nyei nzuih aqv.
-
6 Maaih guanh henv haic nyei fingx,
zungv saauv maiv hingh,
- daaih mborqv yie nyei deic-bung.
- Wuov fingx nyei nyaah hnangv sienh nyei nyaah,
- ninh nyei nyaah ngau hnangv sienh nyeiz nyei nyaah ngau.
-
7 Ninh baaic waaic yie nyei a'ngunc hmei
- yaac pai yie nyei ngongh nyorx biouv ndiangx,
- ninh maeqv nzengc ndiangx-ndopv,
- maeqv liuz zoi guangc,
- ndiangx-nquaah mbopv baeqc nyei.
-
8 Oix zuqc nzauh nyiemv hnangv dauh maiv bueix jiex dorn nyei sieqv
zuqv jienv la'maah ndie-cou,
- nzauh nyiemv ninh lunx nyei ziangh hoc gorngv ziangh ninh wuov dauh nqox.
-
9 Fongc horc nyei laangh ziqc caux ciev ziec nyei ga'naaiv
- yiem Ziouv
nyei biauv dangx mi'aqv.
- Fu-sux Ziouv
nyei sai mienh ziouc nzauh nyiemv.
-
10 Lingh deic huaang nzengc mi'aqv.
- Ndau mborngx nqaai nyei.
- Weic zuqc mbiauh zuqc mietc,
- siang-a'ngunc diuv nqaai mingh,
- ga'lanv youh yaac dangx mi'aqv.
-
11 Zoux ndeic nyei mienh aah! Oix zuqc nzauh aqv.
- Fioux a'ngunc hmei nyei mienh aah! Oix zuqc nzauh nyiemv.
- Weic zuqc mbiauh witv caux mbiauh mbaali,
- liemh lingh deic nyei gaeng-zuangx zuqc mietc nzengc.
-
12 A'ngunc hmei nqaai nzengc.
- Ngongh nyorx biouv ndiangx nyaux mi'aqv.
- Ziqc liouh biouv,
daau ndiangx caux ba'jaauh ndiangx,
- caux yietc zungv lomc-huaang nyei ndiangx kou nqaai nzengc.
- Zuangx mienh nyei njien-youh
- zitc nzengc mi'aqv.
Oix Zuqc Goiv Hnyouv
Lorz Tin-Hungh
-
13 Sai mienh aah! Meih mbuo oix zuqc zuqv jienv la'maah ndie-cou nzauh nyiemv,
- meih mbuo yiem ziec-dorngh fu-sux nyei sai mienh aah! Oix zuqc qaqv nyiemv mbui,
- meih mbuo fu-sux yie nyei Tin-Hungh nyei mienh aah!
- Daaih maah! Zuqv jienv la'maah ndie-cou jiex muonz,
- weic zuqc fongc horc nyei laangh ziqc caux ciev ziec nyei ga'naaiv
- yiem meih mbuo nyei Tin-Hungh nyei biauv dangx mi'aqv.
-
14 Oix zuqc dingc ziangx norm zei maiv nyanc haaix nyungc nyei hnoi,
- heuc mienh gapv zunv daaih zoux leiz-baaix.
- Heuc zuangx mienh gox
- caux yiem deic-bung nyei yietc zungv baeqc fingx
- daaih taux Ziouv,
meih mbuo nyei Tin-Hungh, nyei biauv
- heuc jienv tov Ziouv.
-
15 Kouv aqv! Wuov norm hnoi oix taux.
- Ziouv
nyei hnoi taux fatv aqv,
- oix yiem Nernh Jiex Wuov Dauh
daaih
- yaac benx norm bun nyungc-nyungc zuqc mietc nyei hnoi.
-
16 Nyanc hopv dorng jienv yie mbuo nyei m'zing dangx mi'aqv,
- yiem yie mbuo nyei Tin-Hungh nyei biauv nyei
- njien-youh caux orn-lorqc jiex mi'aqv, maiv zeiz?
-
17 Ga'naaiv-nyim yiem ndau-ndiev
- huv mi'aqv.
- Siou ga'naaiv nyei dorngx zuqc guangc huaang,
- lamz yaac huv waaic njiec,
- weic zuqc mbiauh kou nqaai mi'aqv.
-
18 Saeng-kuv qaqv heuc,
- ngongh guanh yaac lunc
- weic zuqc ninh mbuo maiv maaih miev-ciangv.
- Ba'gi yungh caux yungh guanh fih hnangv nyei zuqc kouv.
-
19 O Ziouv
aah! Yie heuc jienv tov meih
- weic zuqc douz buov mietc deic-bung-huaang nyei miev-ciangv.
- Douz-mbietc buov nzengc lomc-huaang nyei ndiangx.
-
20 Liemh hieh zoih heuc jienv tov meih,
- weic zuqc ndoqv nyei wuom nqaai mi'aqv.
- Douz yaac buov waaic lomc-huaang nyei miev-ciangv.
