• ¹ “Naaiv deix sic bun yie nyei mba'nziu dongz mbokc mbokc nyei,
• ndanc zuqc yie nyei wuonh ndaix, daamv mapv nzengc.
• ² Muangx maah! Muangx Tin-Hungh nyei qiex mbui hnangv mba'ong nor,
• muangx yiem ninh nyei nzuih cuotv njunh njunh nyei qiex.
• ³ Ninh bungx mba'lingc cuotv buangv lungh ndiev,
• ninh nyei mba'lingc mingh jomc lungh gorn.
• ⁴ Nqa'haav maaih ninh nyei qiex njunh jienv daaih,
• ninh maaih haangh daauh nyei qiex hnangv mba'ong nor mbui,
• ninh nyei qiex mbui wuov zanc, ninh maiv dangv jienv mba'lingc.
• ⁵ Tin-Hungh nyei qiex mbui cuotv haiz mbuoqc horngh haic.
• Ninh zoux hlo haic nyei sic, yie mbuo zungv maiv haih bieqc hnyouv.
• ⁶ Weic zuqc ninh mbuox sorng, ‘Duih njiec ndau-beih maah!’
• Yaac mbuox mbiungc caux mbiungc-nziaaux, ‘Oix zuqc henv aqv.’
• ⁷ Ninh bun dauh dauh mienh nyei buoz dingh njiec,
• weic bun zeix daaih nyei maanc mienh hiuv duqv ninh nyei gong. * Naaiv yiemc nyei Hipv^lu waac se maiv nangc mengh.
• ⁸ Hieh zoih bieqc ninh mbuo nyei zunh,
• yaac yiem ninh mbuo nyei kuotv gu'nyuoz.
• ⁹ Nziaaux-jieqv yiem naamh bung cuotv daaih,
• juangv nyei qiex yiem baqv bung nyei nziaaux cuotv.
• ¹⁰ Tin-Hungh nyei qiex bun wuom gitv sorng,
• wuom-taan yaac gitv ngaengc nzengc.
• ¹¹ Ninh bun mbuonx-hoz maaih wuom buangv nzengc,
• bun mba'lingc yiem mbuonx faatv cuotv.
• ¹² Ziux Tin-Hungh paaiv, ninh mbuo guinh mingh guinh daaih,
• youh gormx lungh ndiev zoux ziangx
• ei jienv ninh hatc nyei yietc zungv.
• ¹³ Ninh bun naaiv deix jauv cuotv daaih weic dingc zuiz
• fai weic yungz ndau-beih,
• fai weic zuqc ninh ziepc zuoqv nyei hnamv mienh.

E^li^hu Mbuox Yopv Samx Mangc Weih Gormx Nyei Ga'naaiv Ziouc Zieqv Duqv Tin-Hungh Ndongc Haaix Hlo

• ¹⁴ “Yopv aah! Dingh jienv longx-longx nyei muangx
• taux Tin-Hungh zoux mbuoqc horngh nyei sic.
• ¹⁵ Meih hiuv nyei fai? Tin-Hungh hnangv haaix nor hatc naaiv deix ga'naaiv,
• bun mba'lingc yiem mbuonx gu'nyuoz ziux cuotv?
• ¹⁶ Meih hiuv duqv mbuonx hnangv haaix nor mbiouh jienv ndaamv-lungh nyei fai?
• Se maaih dunh yunh nyei wuonh zaang wuov dauh zoux nyei mbuoqc horngh sic.
• ¹⁷ Naamh bung nyei nziaaux bun ndau jorm zongc-zongc nyei,
• meih yuoqv, lui-houx hnangv douz nor jorm.
• ¹⁸ Meih haih hnangv * hnangv fai caux. Tin-Hungh corng lungh,
• yaac bun lungh ngaengc hnangv nzaatv daaih nyei dongh siqv gingx fai?
• ¹⁹ “Tov njaaux yie mbuo, yie mbuo oix zuqc hnangv haaix nor caux Tin-Hungh gorngv.
• Yie mbuo hnyouv hngongx, hnamv maiv cuotv waac gorngv.
• ²⁰ Oix zuqc mbuox ninh, yie oix caux ninh gorngv waac fai?
• Maaih haaix laanh mienh ganh oix tov zuqc mietc?
• ²¹ Ih zanc nziaaux buonc mbuonx mingh, lungh ziouc nzang,
• njang aengv jienv,
• baamh mienh ziouc maiv haih mangc lungh nyei njang.
• ²² Yiem baqv bung maaih njang-laangc cuotv hnangv jiem nor,
• Tin-Hungh daaih yaac maaih gamh nziex nyei haangh daauh.

E^li^hu Mbuox Yopv Jangx Jienv Tin-Hungh Maiv Muangx
Dongh Hnamv Daaih
Ganh Maaih Cong-Mengh Wuov Deix

• ²³ “Yie mbuo maiv haih mingh nitv fatv Nernh Jiex Wuov Dauh.
• Ninh maaih domh qaqv, maaih baengh fim,
• ninh zoux duqv horpc haic,
  yaac maiv zeix mienh.
• ²⁴ Weic naaiv mienh taaih ninh.
• Da'faanh ceng ganh maaih cong-mengh nyei mienh ninh maiv taaih aqv.”