Yopv Gorngv Tin-Hungh
Zoux Maiv Baengh Fim

• ¹ “Yie youx haic yie nyei maengc,
• yie ziouc sueih jienv gorngv yie nyei naanc zingh.
• Yie hnyouv gu'nyuoz kouv
  ziouc oix gorngv aqv.
• ² Yie oix gorngv mbuox Tin-Hungh, maiv dungx dingc yie maaih zuiz.
• Tov bun yie hiuv meih weic haaix diuc caux yie nzaeng.
• ³ Meih zeix mienh aengx mangc piex
• meih nyei buoz zeix daaih nyei ga'naaiv,
• yaac ceng orqv mienh nyei za'eix,
• naaiv deix sic meih haiz horpc nyei fai?
• ⁴ Meih nyei m'zing hnangv baamh mienh nyei m'zing fai?
• Meih buatc hnangv baamh mienh buatc fai?
• ⁵ Meih nyei hnoi * Fai meih nyei siouc nyuonh. hnangv baamh mienh nyei hnoi fai?
• Meih nyei hnyangx yaac hnangv mienh nyei hnyangx fai?
• ⁶ Hnangv naaic meih cingx daaih lorz yie zoux dorngc nyei sic,
• aengx zimh lorz yie nyei zuiz,
• ⁷ maiv gunv meih hiuv duqv yie maiv maaih dorngc nyei dorngx,
• yaac maiv maaih haaix dauh njoux yie biaux ndutv meih nyei buoz-ndiev.

Yopv Gorngv Tin-Hungh
Mangc Ninh, Oix Mietc Ninh

• ⁸ “Meih nyei buoz nanv yie, zeix yie cuotv daaih,
• ih zanc meih daaux nqaang daaih oix mietc yie.
• ⁹ Tov jangx jienv meih longc ba'naih nie zeix yie,
• meih corc oix bun yie nzuonx benx nie-mbung fai?
• ¹⁰ Meih dox yie cuotv daaih hnangv nyorx,
• aengx bun yie gitv daaih hnangv nyorx-hmei-ngaengc maiv zeiz?
• ¹¹ Meih longc ndopv caux orv benx lui bun yie zuqv,
• yaac longc mbungv caux jaan daaux jienv.
• ¹² Meih bun yie maaih maengc ziangh
• yaac ziepc zuoqv nyei hnamv yie.
• Meih yaac longx-longx nyei beu jienv yie nyei maengc.
• ¹³ “Mv baac naaiv deix sic meih bingx jienv yiem hnyouv,
• yie yaac hiuv duqv naaiv se meih nyei za'eix aqv.
• ¹⁴ Se gorngv yie baamz zuiz
  meih mangc jienv yie.
• Meih zungv oix dingc yie nyei zuiz, maiv bungx guangc.
• ¹⁵ Se gorngv yie zoux orqv,
  yie zuqc kouv aqv.
• Se gorngv yie zoux horpc,
  yie cau maiv jiez m'nqorngv.
• Yie za'gengh! nyaiv nzengc,
• yaac mangc jienv yie ganh nyei kouv naanc.
• ¹⁶ Se gorngv yie bouh yie ganh faaux,
• meih zunc yie hnangv sienh zunc nor.
• Meih aengx zoux mbuoqc horngh nyei sic hoic yie.
• ¹⁷ Meih aengx jaa liepc zorng-zengx mienh daaih gox yie,
• yaac jaa qiex jiez yie.
• Meih dorh siang-jun-baeng tiuv jienv mborqv yie.

Yopv Tov Tin-Hungh Bungx Nqoi Ninh Weic Zuqc Ninh Aav Lamh Daic

• ¹⁸ “Tin-Hungh aah! Meih weic haaix diuc dorh yie cuotv maa nyei ga'sie?
• Feix duqv yie daic ndaangc mienh nyei m'zing buatc yie,
• ¹⁹ ziouc hnangv maiv maaih jiex yie,
• se yiem maa nyei ga'sie mingh taux zouv mi'aqv.
• ²⁰ Yie ziangh seix nyei hnoi-nyieqc zoqc haic maiv zeiz?
• Tov bungx yie ganh yiem, bun yie duqv deix njien-youh
• ²¹ ndaangc yie mingh maiv nzuonx nyei dorngx,
• se mingh yiemh gen, mapv hmuangx nyei deic-bung.
• ²² Naaiv norm deic-bung se hmuangx haic, lunc nzengc,
• yiem wuov nyei njang yaac hmuangx mi'aqv.”