Douc Waac Gorngv
Ye^lu^saa^lem Oix Zuqc Mietc

¹ Ye^le^mi duqv zipv Ziouv nyei naaiv deix waac wuov zanc, Se^nde^ki^yaa paaiv Man^ki^aa nyei dorn, Baatc^he, caux Maa^aa^se^aa nyei dorn, Se^fan^yaa sai mienh, mingh lorz Ye^le^mi gorngv, ² “Tov meih weic yie mbuo naaic Ziouv, weic zuqc Mbaa^mbi^lon nyei hungh, Ne^mbu^katv^netv^saa, daaih mborqv yie mbuo. Nziex Ziouv weic yie mbuo zoux ziux ninh nyei yietc zungv mbuoqc horngh nyei sic ziouc bun hungh diex tuix, leih nqoi yie mbuo.” * 2 Hungh Douh 25:1-11 ; 2 Zunh Doic Douh 36:17-21

³ Ye^le^mi ziouc mbuox ninh mbuo, ⁴ “Meih mbuo oix zuqc mbuox
Se^nde^ki^yaa, ‘Ziouv, I^saa^laa^en nyei Tin-Hungh, hnangv naaiv gorngv, “Yie oix bun yiem meih mbuo nyei buoz mborqv jaax nyei wuoqc ginc daaux nzuonx daaih, dongh meih mbuo longc mborqv Mbaa^mbi^lon hungh caux yiem zingh laatc ga'nyiec maengx weih jienv nyei Ken^ndie Mienh. Yie yaac oix siou naaiv deix wuoqc ginc daaih yiem zunv naaiv norm zingh mbu'ndongx. ⁵ Yie ganh oix sung yie nyei buoz, se yie henv haic nyei buoz, qiex jiez jienv, nouz haic, ga'qiex baetv cuotv mborqv meih mbuo. ⁶ Yie oix mborqv yiem naaiv norm zingh nyei mienh, liemh mienh liemh saeng-kuv zungv zuqc domh wuon-baengc daic.” ⁷ Ziouv gorngv, “Nqa'haav yie oix zorqv Yu^ndaa hungh, Se^nde^ki^yaa, caux ninh nyei jien caux naaiv norm zingh nyei baeqc fingx, dongh biaux ndutv wuon-baengc, nzuqc ndaauv caux ngorc hnaangx nyei jauv wuov deix, jiu bun yiem Mbaa^mbi^lon nyei hungh, Ne^mbu^katv^netv^saa, nyei buoz-ndiev, yaac jiu bun yiem ninh mbuo nyei win-wangv nyei buoz-ndiev, caux lorz ninh mbuo nyei maengc wuov deix mienh nyei buoz-ndiev. Mbaa^mbi^lon hungh ziouc longc nzuqc ndaauv laic daix ninh mbuo, maiv korv-fiqv ninh mbuo, maiv liouh ninh mbuo, maiv korv-lienh ninh mbuo.

⁸ “Meih mbuo yaac oix zuqc mbuox naaiv deix baeqc fingx, ‘Ziouv hnangv naaiv gorngv, “Yie zorqv ziangh nyei jauv caux daic nyei jauv an jienv meih mbuo nyei nza'hmien. ⁹ Haaix dauh yiem jienv naaiv norm zingh zungv zuqc nzuqc ndaauv, zuqc ngorc hnaangx, zuqc wuon-baengc daic. Mv baac haaix dauh cuotv mingh zorqv ganh jiu bun weih jienv meih mbuo nyei Ken^ndie Mienh, wuov dauh ziouc duqv maengc ziangh, se duqv ninh nyei maengc benx mborqv jaax duqv daaih nyei zingh nyeic. ¹⁰ Yie mbienv yie nyei hmien zoux bun naaiv norm zingh, bun zingh zuqc ciouv, maiv zeiz duqv longx. Naaiv norm zingh zungv zuqc jiu bun Mbaa^mbi^lon hungh. Ninh ziouc longc douz buov.”

Douc Waac Gorngv
Yu^ndaa Hungh Nyei Zeiv-Fun

¹¹ “Oix zuqc gorngv mbuox Yu^ndaa hungh nyei zeiv-fun, ‘Muangx Ziouv nyei waac maah! ¹² Ndaawitv nyei zeiv-fun aah! Ziouv hnangv naaiv gorngv,

• “‘Ndorm-ndorm oix zuqc baengh fim nyei siemv,
• njoux zuqc luv nyei mienh biaux ndutv
• zeix mienh wuov dauh nyei buoz-ndiev.
• Nzauh heix laaix meih mbuo zoux nyei orqv sic,
• yie nyei ga'qiex baetv cuotv hnangv douz nor,
• zieqc jienv yaac maiv maaih haaix dauh haih mborqv daic.’
• ¹³ Ziouv gorngv, ‘Yiem horngz nyei baeqc fingx * Maaih deix sou gorngv, Ye^lu^saa^lem. Maaih deix gorngv eix leiz se “yiem horngz gu'nguaaic nyei mienh”. aah! Yie oix mborqv meih mbuo.
• Meih mbuo yiem ndau-baengh nyei la'bieiv nyei mienh
• gorngv, “Haaix dauh oix njiec daaih mborqv yie mbuo?
• Fai haaix dauh oix bieqc yie mbuo yiem nyei dorngx?”
• ¹⁴ Ziouv gorngv, ‘Ziux meih mbuo zoux nyei sic
• yie oix dingc meih mbuo nyei zuiz.
• Yie oix yiem naaiv norm zingh nyei gemh diemv zieqc douz.
• Douz ziouc buov qui weih gormx zingh nyei yietc zungv.’”