Ziouv Orn Sailatv Zoux Hungh

• ¹ “Yie, Ziouv, orn Sailatv.
• Yie nanv ninh nyei mbiaauc jieqv buoz,
• weic mborqv hingh yiem ninh nyei wuov ndaangc maengx nyei ziex guoqv mienh,
• yaac oix jaiv nqoi hungh mborqv jaax nyei lui-houx. * Faan zaqc gorngv “hungh nyei sai jaaiv ndie”.
• Yie oix yiem ninh nyei wuov ndaangc maengx koi nqoi zingh gaengh,
• yaac maiv bun zingh gaengh guon.
• Ziouv gorngv mbuox Sailatv,
• ² “Yie oix mingh ndaangc meih,
• zoux bun mbong baengh nzengc.
• Yie oix mborqv muonc dongh siqv gaengh,
• yaac hngaqv ndutv hlieqv-gaengh sorn.
• ³ Yie oix zorqv yiem hmuangx zong jaaix nyei ga'naaiv
• caux bingx mbueiz nyei dorngx nyei zinh zoih jiu bun meih,
• weic bun meih hiuv duqv ziux meih nyei mbuox heuc meih daaih wuov dauh
• se yie, Ziouv, I^saa^laa^en nyei Tin-Hungh.
• ⁴ Weic yie nyei bou, Yaakopv,
• caux yie ginv daaih nyei I^saa^laa^en,
• yie ziux meih nyei mbuox heuc meih.
• Maiv gunv meih maiv hiuv duqv yie,
• yie jaa mengh hoc bun meih.
• ⁵ Yie se Ziouv, yaac maiv maaih ganh dauh.
• Cuotv liuz yie, maiv maaih ganh dauh Tin-Hungh.
• Maiv gunv meih maiv hiuv yie,
• yie bun qaqv meih,
• ⁶ weic bun mienh yiem mba'hnoi cuotv bung
• taux mba'hnoi muotv bung,
• hiuv duqv yie se Ziouv.
• Cuotv liuz yie, maiv maaih ganh dauh.
• Yie se Ziouv, yaac maiv maaih ganh dauh.
• ⁷ Yie zeix njang yaac zeix hmuangx.
• Yie ceix fuqv yaac bun zeqc naanc.
• Yie se Ziouv. Yie zoux naaiv deix yietc zungv sic.

Ziouv Zeix Maanc Muotc

• ⁸ “O lungh aac, tov duih mbiungc njiec,
• tov bun mbuonx duih baengh fim nyei jauv njiec.
• Bun ndau koi nqoi
• weic bun njoux en cuotv daaih.
• Bun baengh fim yietc njiec cuotv.
• Yie, Ziouv, zeix daaih nyei.
• ⁹ “Haaix dauh caux Zeix Ninh Daaih Wuov Dauh nzaeng nor, oix zuqc kouv aqv.
• Ninh se hnangv nie-mor caux nanv nie-mor zaangc nzaeng. * Maaih deix sou faan daaih gorngv “ninh maiv zeiz kungx benx yiem ndau-beih nyei nie-mor ndui mbu'ndongx nyei yietc hlengx nie-mor hnangv fai?”
• Ba'naih nie naaic nanv nie zaangc,
• ‘Meih zoux haaix nyungc’ fai?
• Zoux daaih nyei ga'naaiv gorngv,
• ‘Meih nanv nyei ga'naaiv maiv maaih buoz’ fai? * I^saa^yaa 29:16 ; Lomaa 9:20
• ¹⁰ Haaix dauh gaamv caux die nzaeng gorngv,
• ‘Meih weic haaix diuc bun yie cuotv daaih hnangv naaiv?’
• Fai ninh gorngv mbuox ninh nyei maa,
• ‘Meih yungz cuotv haaix nyungc?’
• Naaic naaiv nyungc waac nyei mienh oix zuqc kouv aqv.
• ¹¹ “Ziouv, I^saa^laa^en nyei Cing-Nzengc Tin-Hungh,
• se Zeix I^saa^laa^en Mienh Wuov Dauh hnangv naaiv nor gorngv,
• ‘Meih mbuo naaic yie taux oix cuotv nyei sic,
• meih mbuo naaic taux yie nyei naamh nyouz
• fai hatc yie nyei buoz zoux nyei gong fai?
• ¹² Se yie zeix baamh gen
• yaac zeix mienh daaih yiem baamh gen.
• Yie ganh nyei buoz corng lungh
• yaac hatc yiem lungh nyei zuangx hleix.
• ¹³ Yie oix longc yie baengh fim nyei za'eix liepc Sailatv.
• Yie oix koi zaqc ninh nyei diuh diuh jauv,
• ninh oix ceix yie nyei zingh,
• yaac bungx yie nyei baeqc fingx,
• dongh zuqc caangv mingh nyei mienh nzuonx.
• Yaac maiv zeiz weic gong-zinh fai zingh nyeic.
• Naaiv se Nernh Jiex nyei Ziouv gorngv.’”

¹⁴ Ziouv hnangv naaiv nor gorngv,

• “I^yipv Deic-Bung maaih nyei ga'naaiv
• caux E^ti^o^bie nyei huox,
• caux hlo hlang nyei Se^mbaa Mienh,
• oix daaih guei meih,
• benx meih nyei.
• Ninh mbuo zuqc kaux jienv limc
• gan meih nyei nqa'haav nqaang daaih.
• Ninh mbuo oix gueic njiec meih nyei nza'hmien
• jouh meih gorngv,
• ‘Tin-Hungh za'gengh caux meih yiem, * Fai “Kungx Tin-Hungh caux meih yiem hnangv”.
• yaac maiv maaih ganh dauh.
• Maiv maaih ganh dauh zienh.’”
• ¹⁵ O Tin-Hungh, I^saa^laa^en nyei Njoux Ziouv,
• meih za'gengh Tin-Hungh, dongh bingx ganh wuov dauh.
• ¹⁶ Da'faanh zoux miuc-fangx nyei mienh oix zuqc nyaiv, zuqc baaic hmien,
• ninh mbuo yietc zungv lomh nzoih zuqc baaic hmien.
• ¹⁷ Mv baac I^saa^laa^en oix duqv
• Ziouv yietc liuz nyei njoux en njoux ninh mbuo.
• Meih mbuo ziouc yietc liuz maiv zuqc nyaiv, maiv zuqc baaic hmien
• taux maanc gouv maanc doic.
• ¹⁸ Ziouv zeix lungh.
• Dongh naaiv dauh se Tin-Hungh.
• Ninh zeix cuotv ndau,
• liepc wuonv ndau nyei gorn-ndoqv.
• Ninh zeix daaih maiv zeiz weic benx ndau-huaang,
• se weic bun mienh yiem.
• Ninh gorngv,
• “Yie se Ziouv,
• yaac maiv maaih ganh dauh.
• ¹⁹ Yie maiv zeiz yiem norm hmuangx nyei deic-bung
• bingx jienv gorngv.
• Yie maiv mbuox Yaakopv nyei zeiv-fun,
• ‘Meih mbuo lorz yie se maiv lamh longc.’
• Yie, Ziouv, gorngv zien sic,
• yaac zorqv horpc nyei jauv bun meih mbuo hiuv.

Kungx Tin-Hungh Zoux Njoux Ziouv

• ²⁰ “Meih mbuo yiem ziex guoqv biaux cuotv maengc nyei mienh
• oix zuqc lomh nzoih gapv zunv daaih.
• Ndaam jienv longc ndiangx zoux daaih nyei miuc-fangx,
• yaac daux gaux jouh maiv haih njoux mienh nyei zienh
• wuov deix mienh, maiv hiuv haaix nyungc.
• ²¹ Meih mbuo gunv gorngv aqv.
• Gorngv mengh meih mbuo nyei sic,
• bun ninh mbuo lomh nzoih caangh laangh.
• Haaix dauh jaa-ndaangc gorngv liuz lauh aqv?
• Loz-hnoi haaix dauh zunh naaiv deix sic cuotv daaih?
• Se maiv zeiz yie, Ziouv fai?
• Cuotv liuz yie, maiv maaih ganh dauh Tin-Hungh,
• yie se baengh fim nyei Tin-Hungh yaac zoux Njoux Ziouv.
• Cuotv liuz yie, maiv maaih ganh dauh.
• ²² “Yiem jomc lungh ndiev nyei mienh aac,
• huin nzuonx daaih lorz yie ziouc duqv njoux,
• weic zuqc yie se Tin-Hungh yaac maiv maaih ganh dauh.
• ²³ Yie ziangv jienv yie ganh houv waac,
• yie nyei nzuih gorngv nyei waac se zien nyei.
• Yie gorngv nyei waac yie maiv zorqv nzuonx.
• Norm-norm cingh mborqc oix gueic njiec baaix yie.
• Sung-sung nzuih oix houv waac laengz gan yie hnangv. * Lomaa 14:11 ; Fi^lipv^poi 2:10-11
• ²⁴ Ninh mbuo oix gorngv taux yie,
• ‘Kungx kaux Ziouv ganh hnangv
• cingx duqv hingh jiex * Fai maaih baengh fim. yaac maaih qaqv.’”
• Da'faanh qiex jiez, nzorng yie wuov deix,
• oix daaih lorz yie yaac zuqc baaic hmien.
• ²⁵ Mv baac I^saa^laa^en nyei yietc zungv hoz doic zeiv-fun
• oix kaux Ziouv duqv hingh jiex yaac ceng ninh.