Ziouv Njoux Ninh Nyei Baeqc Fingx

• ¹ O Yaakopv aac, zeix meih daaih wuov dauh,
• O I^saa^laa^en aac, nanv meih daaih nyei Ziouv,
• ih zanc hnangv naaiv nor gorngv,
• “Maiv dungx gamh nziex weic zuqc yie zuoqc meih nzuonx daaih aqv.
• Yie ziux meih nyei mbuox heuc meih.
• Meih benx yie nyei mi'aqv.
• ² Meih jiex wuom nyei ziangh hoc,
• yie caux meih yiem.
• Meih jiex ndaaih,
• ndaaih nyei wuom yaac maiv yiemx meih.
• Meih yangh douz jiex,
• meih maiv zuqc douz buov,
• douz-mbietc yaac maiv zieqc meih.
• ³ Weic zuqc yie se Ziouv, meih nyei Tin-Hungh,
• se I^saa^laa^en nyei Cing-Nzengc Tin-Hungh, meih nyei Njoux Ziouv.
• Yie zorqv I^yipv zoux zuoqc meih nyei jaax-zinh,
• yaac zorqv E^ti^o^bie * Se Kutv. caux
  Se^mbaa longc tiuv meih.
• ⁴ Weic zuqc ziux yie nyei m'zing mangc, meih se jaaix haic.
• Yie taaih meih yaac hnamv meih.
• Yie ziouc zorqv mienh longc tiuv meih,
• yaac zorqv ziex fingx mienh yienc meih nyei maengc.
• ⁵ Maiv dungx gamh nziex weic zuqc yie caux meih yiem.
• Yie oix dorh meih nyei zeiv-fun yiem dong bung daaih,
• yaac yiem fai bung dorh meih nyei mienh daaih gapv zunv.
• ⁶ Yie oix mbuox baqv bung, ‘Bungx ninh mbuo maah!’
• Yaac oix mbuox naamh bung, ‘Maiv dungx nzaeng ninh mbuo.’
• Yie oix dorh yie nyei dorn mbuo yiem go nyei daaih,
• yaac yiem lungh gorn dorh yie nyei sieqv nzuonx,
• ⁷ se da'faanh gan yie nyei mbuox heuc nyei mienh,
• dongh yie zeix daaih weic bun yie duqv njang-laangc,
• se yie nanv daaih zeix daaih nyei mienh.’

I^saa^laa^en Se Tin-Hungh
Nyei Zorng-Zengx Mienh

• ⁸ Oix zuqc dorh maaih m'zing mv baac maengh nyei,
• maaih m'normh mv baac ndung nyei mienh cuotv daaih.
• ⁹ Maanc guoqv mienh oix zuqc gapv zunv,
• zuangx fingx oix zuqc lomh nzoih daaih.
• Yiem ninh mbuo mbu'ndongx maaih haaix dauh jaa-ndaangc gorngv naaiv deix sic
• yaac gorngv jiex daaih nyei sic bun yie mbuo muangx?
• Bun ninh mbuo dorh ninh mbuo nyei zorng-zengx mienh cuotv daaih bun cing ninh mbuo horpc,
• mienh ziouc muangx haiz yaac gorngv, “Naaiv za'gengh zien nyei.”
• ¹⁰ Ziouv gorngv, “Meih mbuo se yie nyei zorng-zengx mienh,
• yaac zoux yie nyei bou, dongh yie ginv wuov dauh,
• weic bun meih mbuo haih hiuv duqv yaac sienx yie,
• yaac mengh baeqc yie se Ziouv.
• Cuotv liuz yie maiv maaih ganh dauh zienh. * Faan zaqc gorngv zoux daaih nyei zienh.
• Zinh ndaangc maiv maaih, nqa'haav yaac maiv maaih.
• ¹¹ Yie, se yie ganh, zoux Ziouv.
• Cuotv liuz yie maiv maaih ganh dauh Njoux Ziouv.
• ¹² Yie bun meih mbuo hiuv,
• yaac njoux meih mbuo yaac gorngv mbuox meih mbuo,
• se yie, maiv zeiz yiem meih mbuo mbu'ndongx nyei nyiec nyei zienh.”
• Ziouv gorngv, “Meih mbuo zoux yie nyei zorng-zengx mienh,
• yie se Tin-Hungh.”
• ¹³ Yiem loz! hnoi daaih yie m'daaih yietc liuz zoux Tin-Hungh.
• Maiv maaih haaix dauh haih njoux mienh biaux ndutv yie nyei buoz.
• Yie zoux nyei haaix nyungc, maiv maaih haaix dauh haih goiv yienc.

Mbaa^mbi^lon Oix Buangh Nyei Sic

• ¹⁴ I^saa^laa^en nyei Cing-Nzengc Tin-Hungh,
• dongh Zuoqc Meih Mbuo Wuov Dauh Ziouv, hnangv naaiv nor gorngv,
• “Weic meih mbuo nyei gorn yie paaiv jun-baeng guanh mingh Mbaa^mbi^lon,
• mborqv baaic ninh mbuo nyei yietc zungv zingh gaengh,
• Mbaa^mbi^lon Mienh * Fai Ken^ndie Mienh. njien-youh heuc nyei qiex ziouc tiuv benx nzauh nyiemv nyei qiex. * Maaih deix sou faan daaih gorngv “Ninh mbuo mingh caangv Mbaa^mbi^lon Mienh daaih bun ninh mbuo bieqc Mbaa^mbi^lon Mienh ganh nyei nzangv, se ninh mbuo yietc gau ceng nyei nzangv, tor jienv mingh.” Naaiv deix nzangv ninh mbuo yietc gau longc tor ninh mbuo nyei zienh.
• ¹⁵ Yie se Ziouv, meih mbuo nyei Cing-Nzengc Tin-Hungh,
• dongh Zeix I^saa^laa^en Wuov Dauh, meih mbuo nyei Hungh Diex.”
• ¹⁶ Ziouv hnangv naaiv nor gorngv.
• Ziouv koi tong koiv nyei jauv,
• koi diuh jauv yiem domh wuom gu'nyuoz.
• ¹⁷ Ninh bun mborqv jaax nyei cie caux maaz,
• bun jun-baeng caux mborqv jaax henv nyei baeng cuotv daaih.
• Ninh mbuo bueix njiec, yietc liuz maiv haih jiez sin.
• Ninh mbuo zutc nzengc, hnangv dang-cov nyei douz daic nor.
• ¹⁸ Ziouv hnangv naaiv nor gorngv,
• “Maiv dungx jangx jiex daaih nyei sic,
• yaac maiv dungx nzamc loz-hnoi nyei jauv.
• ¹⁹ Mangc maah! Yie oix zoux yietc nyungc siang-sic,
• ih zanc cuotv daaih aqv. Meih mbuo maiv buatc fai?
• Yie oix yiem deic-bung-huaang koi jauv,
• yaac bun deic-bung-haanz cuotv ndoqv.
• ²⁰ Lomc nyei hieh zoih oix taaih yie,
• hieh juv caux norqc lorh torh yaac taaih yie,
• weic zuqc yie bun deic-bung-huaang maaih wuom,
• yaac bun deic-bung-haanz maaih ndoqv,
• weic bun yie nyei baeqc fingx, yie ginv daaih nyei mienh, maaih wuom hopv,
• ²¹ se weic yie ganh zeix daaih nyei mienh.
• Ninh mbuo ziouc haih ceng yie.

I^saa^laa^en Nyei Zuiz

• ²² “O Yaakopv aac, maiv gunv hnangv naaic meih corc maiv heuc yie.
• O I^saa^laa^en aac, meih maiv weic yie diev kouv yietc deix. * Fai meih yaac youx yie.
• ²³ Meih maiv dorh ba'gi yungh daaih ziec yie,
• yaac maiv longc meih ziec nyei ga'naaiv taaih yie.
• Yie maiv bun meih weic fongc horc nyei ga'naaiv kouv,
• yaac maiv zanc-zanc tov hung bun meih kouv haic.
• ²⁴ Meih maiv longc nyaanh maaiz gamh ziex bun yie,
• fai longc ziec nyei ga'naaiv nyei hmei bun yie buangv hnyouv.
• Daaux nzuonx meih bun yie weic meih nyei zuiz kouv,
• meih zoux dorngc baamz nyei zuiz bun yie za'gengh kouv haic.
• ²⁵ “Kungx maaih yie weic ganh
• sortv guangc meih zoux dorngc nyei sic,
• yaac maiv jangx meih nyei zuiz.
• ²⁶ Wetv cuotv jiex daaih nyei sic bun yie muangx,
• bun mbuo lomh nzoih daaih luonx.
• Gunv gorngv meih nyei jauv bun cing meih maiv dorngc.
• ²⁷ Meih nyei daauh dauh ong-taaix-ngaeqv baamz zuiz.
• Meih nyei bieiv zeiv * Fai mbu'ndongx mienh. yaac ngaengc yie.
• ²⁸ Yie oix bun yiem singx dinc zoux hlo wuov deix maaih uix,
• zorqv Yaakopv jiu bun zuqc mietc nzengc,
• yaac bun I^saa^laa^en zuqc mienh huotv.