Hinc Yaangh
Mbaa^mbi^lon Mbaang

¹ Naaiv se gorngv taux Koiv-hlen nyei Deic-Bung-Huaang nyei waac.

• Hnangv nziaaux-zunc yiem Negepc buonc jiex nor,
• win-wangv yiem deic-bung-huaang,
• yiem gamh nziex nyei deic-bung daaih.
• ² Maaih hiuang-hienv hinc yaangh nyei sic bun yie duqv buatc.
• Maaic mienh nyei mienh maaic mienh aqv. * Maaih deix sou faan daaih gorngv “Luv mienh nyei mienh luv mienh aqv”. Mietc nyei mienh, mietc aqv.
• O Elaam Mienh aah! Faaux mingh mborqv aqv.
• O Mi^ndie Mienh aah! Mingh weih jienv maah!
• Dongh Mbaa^mbi^lon hoic mienh tauv nyei yietc zungv domh qiex, yie, Ziouv, bun dingh mi'aqv.
• ³ Weic buatc naaiv deix sic yie nyei sin mun duqv kouv haic,
• mun nyei jauv liemh zeih hoic yie
• hnangv m'sieqv dorn mun gu'nguaaz nor.
• Laaix yie haiz nyei, yie hnyouv huaang haic aqv.
• Laaix yie buatc nyei, yie gamh nziex haic.
• ⁴ Yie nyei hnyouv huaang, lunc nzengc.
• Gamh nziex gau, sin zinx mi'aqv.
• Yie aqc duqv zuov taux nziemx-yaangh,
• mv baac kungx bun yie gamh nziex, sin zinx hnangv.
• ⁵ Ninh mbuo mbenc hnaangx hlo nyei,
• zorqv ziqc dimc jienv
• youc nyanc youc hopv aqv.
• O baeng-bieiv aah! Jiez daaih maah!
• Zorqv youh nzaatv torngv-baaih.

⁶ Ziouv hnangv naaiv nor gorngv mbuox yie,

• “Mingh aqv. Mingh lorz mienh siouv gaeng.
• Ninh buatc haaix nyungc bun ninh zunh gorngv aqv.
• ⁷ Ninh haaix zanc buatc mienh geh maaz,
• se benx yietc doix yietc doix nyei,
• aengx maaih geh lorh mienh
• caux geh lorh torh mienh,
• ninh oix zuqc longx-longx nyei muangx.
• Za'gengh longx-longx nyei muangx.”

⁸ Zuov mangc nyei mienh * Hipv^lu waac gorngv sienh. heuc jienv gorngv,

• “Ziouv aac, yie hnoi-hnoi zanc-zanc souv jienv laauh.
• Muonz-muonz yie yiem yie zuov nyei dorngx.
• ⁹ Mangc maah! Maaih geh maaz mienh daaih.
• Ninh mbuo yietc doix yietc doix geh jienv maaz daaih.
• Siouv gaeng mienh ziouc gorngv,
• ‘Mbaa^mbi^lon mbaang mi'aqv. Mbaang mi'aqv.
• Ninh nyei zienh nyei yietc zungv miuc-fangx,
• Ziouv mborqv huv taux ga'ndiev ndau aqv.’” * Laauc Yaangh 14:8 ; 18:2
• ¹⁰ O yie nyei baeqc fingx, I^saa^laa^en Mienh aac,
• meih mbuo zuqc mborqv hnangv mborqv mbiauh,
• yaac zuqc buonc hnangv buonc cuqv nor.
• Yie haiz Nernh Jiex nyei Ziouv,
• se I^saa^laa^en nyei Tin-Hungh, gorngv nyei waac,
• yie ziouc zunh mbuox meih mbuo mi'aqv.

Douc Waac Gorngv E^ndom

¹¹ Naaiv se gorngv Ndumaa nyei waac

• Maaih dauh yiem Se^i heuc yie,
• “Siouv gaeng mienh aah!
  Lungh muonz corc maaih ndongc haaix lauh?
• Lungh muonz corc maaih ndongc haaix lauh?”
• ¹² Siouv gaeng mienh dau,
• “Lungh ndorm oix taux,
  mv baac lungh muonz yaac daaih.
• Se gorngv oix naaic, gunv naaic aqv.
• Gunv aengx nzuonx daaih.”

Douc Waac Gorngv
Aa^laa^mbie Deic-Bung

¹³ Naaiv se gorngv Aa^laa^mbie nyei waac.

• Meih mbuo gapv doic zoux saeng-eix nyei Nde^ndaan Mienh aah!
• Meih mbuo corng ndopv-liuh yiem Aa^laa^mbie Deic-Bung-Huaang nyei ndiangx-lomc.
• ¹⁴ Jaang nqaatv nyei mienh daaih lorz meih mbuo.
• Meih mbuo oix zuqc bun wuom ninh mbuo hopv.
• Meih mbuo yiem Temaa Deic-Bung nyei mienh aah!
• Dorh njuov mingh bun biaux sic nyei mienh nyanc.
• ¹⁵ Weic zuqc ninh mbuo biaux nzuqc ndaauv,
• biaux baeng cuotv paiv nyei nzuqc ndaauv
• caux baeng jienv nyei juang-zinx,
• caux mborqv jaax zuqc kouv nyei sic.

¹⁶ Weic zuqc Ziouv hnangv naaiv nor mbuox yie, “Yietc hnyangx gu'nyuoz ziux cingv gong nyei hnyangx-soux, Ke^ndaa nyei yietc zungv njang-laangc oix jiex mi'aqv. ¹⁷ Ke^ndaa buonv juang-zinx henv haic nyei baeng zengc njiec nyei mienh yaac zoqc.” Naaiv se Ziouv, I^saa^laa^en Mienh nyei Tin-Hungh, gorngv liuz aqv.