Douc Waac Gorngv Tailaqv
Nyei Hungh

¹ Yie aengx duqv zipv Ziouv nyei waac gorngv, ² “Baamh mienh aah! Oix zuqc gorngv mbuox Tailaqv nyei hungh, ‘Ziouv Tin-Hungh hnangv naaiv gorngv,

• “‘“Weic zuqc meih hnyouv maux
• meih gorngv, ‘Yie benx dauh zienh.
• Yiem koiv mbu'ndongx
• yie zueiz jienv zienh nyei weic.’
• Mv baac meih benx baamh mienh
• maiv zeiz zienh,
• maiv gunv meih funx ganh maaih cong-mengh ndongc dauh zienh.
• ³ Beiv Ndaa^ni^en, meih gauh maaih cong-mengh fai?
• Maiv maaih haaix nyungc haih bingx duqv meih jienv fai?
• ⁴ Meih kaux ganh nyei cong-mengh caux wuonh zaang
• douh ganh lorz zinh zoih camv.
• Meih siou jiem nyaanh
• bieqc meih nyei nyaanh lamz.
• ⁵ Meih kaux ganh guai haic nyei cong-mengh zoux saeng-eix
• duqv zinh zoih camv jienv faaux.
• Weic zuqc meih butv zoih
• meih nyei hnyouv ziouc zoux maux.”

⁶ Weic naaiv Ziouv Tin-Hungh gorngv,

• “‘“Weic zuqc meih hnamv daaih meih maaih cong-mengh
• ndongc dauh zienh,
• ⁷ weic naaiv yie oix dorh ganh fingx mienh daaih mborqv meih.
• Yiem zuangx guoqv mbu'ndongx se ciouv jiex nyei mienh.
• Ninh mbuo oix baeng cuotv nzuqc ndaauv,
• hngaqv waaic meih longc cong-mengh
• lorz daaih nzueic nyei ga'naaiv, * Faan zaqc gorngv “Meih nzueic haic nyei cong-mengh.”
• bun meih nyei njang-laangc maaih uix.
• ⁸ Ninh mbuo oix zorqv meih zoi njiec yiemh gen,
• meih ziouc hnangv zuqc daix daic nyei mienh
• yiem wuov koiv gu'nyuoz daic.
• ⁹ Meih yiem daix meih wuov deix mienh nyei nza'hmien wuov zanc
• meih corc gorngv, ‘Yie benx dauh zienh’ fai?
• Meih yiem bun meih zuqc mun wuov deix mienh nyei buoz-ndiev,
• meih kungx benx baamh mienh hnangv, maiv zeiz zienh.
• ¹⁰ Meih oix zuqc yiem ganh fingx mienh nyei buoz-ndiev daic,
• hnangv maiv jiex gaatv nyei leiz nyei mienh zuqc daic wuov nor.

“‘“Yie, Ziouv Tin-Hungh, gorngv liuz aqv.”’”

Weic Tailaqv Nyei Hungh
Baaux Nyei Naanc Zingh Nzung

¹¹ Yie aengx duqv zipv Ziouv nyei waac gorngv, ¹² “Baamh mienh aah! Meih oix zuqc weic Tailaqv nyei hungh baaux naanc zingh nzung gorngv mbuox ninh, ‘Ziouv Tin-Hungh hnangv naaiv gorngv,

• “‘“Meih se dunh yunh mienh nyei nyungc zeiv,
• maaih cong-mengh buangv nzengc
• yaac nzueic taux daauh.
• ¹³ Meih yiem Tin-Hungh nyei huingx, E^nden.
• Maaih nyungc-nyungc jaaix nyei la'bieiv zorng jienv meih,
• maaih yangh siqv nyei la'bieiv-jaaix, yangh ungv nyei, maeng-gox nyei,
• maeng-mbiaan nyei, maeng-mbuov nyei, jieqv-baeqc ben nyei,
• mbanv mbuov nzang nyei, siqv-gox nyei, caux ndiemh maeng nzang nyei la'bieiv-jaaix.
• Meih longc jiem ciqv lorqc lorqc jienv
• yaac ndingh jienv biangh.
• Zeix meih daaih wuov hnoi
• naaiv deix liuc leiz ziangx.
• ¹⁴ Yie orn meih zoux ke^lu^mbim,
• goux Tin-Hungh nyei cing-nzengc mbong.
• Meih yaac yiem aengv njang hnangv douz nyei la'bieiv-jaaix mbu'ndongx yangh mingh yangh daaih.
• ¹⁵ Yiem zeix meih daaih wuov hnoi,
• meih zoux nyei jauv maiv lamh nqemh aqv,
• taux nqa'haav buatc orqv sic yiem meih gu'nyuoz.
• ¹⁶ Laaix meih maaiz maaic nyei jauv bungx-zuoqc
• meih ziouc maaih ciouv nyei jauv buangv hnyouv,
• meih yaac baamz zuiz.
• Yie ziouc zorqv meih hnangv zorqv maaih uix nyei ga'naaiv
• zunc meih cuotv Tin-Hungh nyei mbong.
• Goux jienv meih wuov dauh ke^lu^mbim,
• zunc meih cuotv aengv njang hnangv douz nyei la'bieiv-jaaix mbu'ndongx. * Maaih deix sou faan daaih gorngv “goux jienv meih naaiv dauh Ke^lu^mbim aah! Yie zunc meih cuotv...”
• ¹⁷ Weic zuqc meih nzueic
• meih nyei hnyouv ziouc maux.
• Laaix meih nyei njang-laangc
• meih zoux bun meih nyei cong-mengh waaic mi'aqv.
• Yie ziouc zorqv meih zong njiec ndau,
• bun meih zuqc yiem camv-dauh hungh nyei nza'hmien,
• bun ninh mbuo qaqv mangc meih.
• ¹⁸ Laaix meih nyei zuiz camv haic,
• meih yaac zoux saeng-eix maiv baengh fim,
• meih ziouc bun meih nyei cing-nzengc dorngx * Fai “zaangc Tin-Hungh nyei dorngx”. maaih uix.
• Hnangv naaic yie ziouc bun douz
• yiem meih mbu'ndongx cuotv buov qui meih,
• bun meih dorng jienv yietc zungv mangc meih nyei mienh,
• yiem ndau-beih benx saaiv.
• ¹⁹ Yiem maanc guoqv mbu'ndongx hiuv duqv meih nyei mienh
• ziouc weic meih gamh nziex haic.
• Meih setv mueiz nyei hnoi za'gengh! gamh nziex,
• meih yietc liuz yaac maiv duqv aengx yiem aqv.”’”

Douc Waac Gorngv Sai^ndorn

²⁰ Yie aengx duqv zipv Ziouv nyei waac gorngv, * Yo^en 3:4-8 ; Se^kaa^li^yaa 9:1-2 ; Matv^taai 11:21-22 ; Lugaa 10:13-14
²¹ “Baamh mienh aah! Meih oix zuqc huin hmien hungx jienv Sai^ndorn Zingh douc waac gorngv wuov norm zingh. ²² Oix zuqc gorngv, ‘Ziouv Tin-Hungh hnangv naaiv gorngv,

• “‘“Sai^ndorn Zingh nyei mienh aah! Yie caux meih zoux win-wangv.
• Yie oix yiem meih mbu'ndongx biux mengh yie nyei njang-laangc.
• Yie dingc naaiv norm zingh nyei zuiz wuov zanc,
• yaac yiem ninh gu'nyuoz biux mengh yie cing-nzengc nyei ziangh hoc,
• ninh mbuo ziouc hiuv duqv yie se Ziouv.
• ²³ Yie oix bun wuov norm zingh butv domh wuon-baengc,
• yaac bun nziaamv liouc cuotv zingh nyei jaai-horngc.
• Yie oix bun win-wangv nanv nzuqc ndaauv
• yiem faam-bung feix louc daaih.
• Zuqc daix daic nyei mienh
• ziouc yiem zingh gu'nyuoz king njiec daic.
• Ninh mbuo ziouc hiuv duqv yie se Ziouv.

²⁴ “‘“Yiem naaiv mingh mangc piex I^saa^laa^en nyei zeiv-fun weih gormx nyei zuangx mienh zungv maiv aengx hnangv njimv-cou njimv-muonc baqv fai hoic ninh mbuo mun. Ninh mbuo ziouc hiuv duqv yie se Ziouv Tin-Hungh. ”

²⁵ “‘Ziouv Tin-Hungh hnangv naaiv gorngv, “Yie zorqv I^saa^laa^en nyei zeiv-fun, dongh zuqc nzaanx mingh yiem maanc guoqv mbu'ndongx wuov deix, gapv zunv daaih. Yie ziouc yiem ninh mbuo mbu'ndongx bun ninh mbuo hiuv duqv yie se cing-nzengc. Wuov zanc ninh mbuo duqv yiem ninh mbuo ganh nyei deic-bung, se yie jiu bun yie nyei bou, Yaakopv, nyei deic-bung. ²⁶ Ninh mbuo ziouc duqv baengh orn nyei yiem naaiv norm deic-bung yaac duqv gomv biauv, zoux huingx zuangx a'ngunc biouv. Yie dingc weih gormx, mangc piex ninh mbuo wuov deix nyei zuiz wuov zanc, I^saa^laa^en Mienh duqv baengh orn nyei yiem. Ninh mbuo ziouc hiuv duqv yie se Ziouv, ninh mbuo nyei Tin-Hungh.”’”