• ¹ Hnyangx-jeiv lunx nyei ziangh hoc,
• oix zuqc jangx jienv Zeix Meih Daaih Wuov Dauh.
• Kouv naanc nyei hnoi-nyieqc maiv gaengh taux,
• meih zungv oix gorngv,
• “Yiem naaiv deix hnyangx nyei hnoi-nyieqc maiv maaih haaix nyungc tengx yie a'hneiv.”
• ² Maiv dungx zuov taux mba'hnoi caux njang,
• hlaax caux hleix hmuangx mingh,
• mbiungc nzengc, mbuonx yaac nzuonx.
• ³ Wuov hnoi goux biauv nyei mienh sin zinx,
• mienh henv mienh jaaiv jutv,
• morc mbuonv nyei mienh dingh njiec weic zuqc ninh mbuo zoqc,
• mangc cuotv fong muonh nyei mienh m'zing huon-huaa. * Yiem naaiv deix i yiemc maaih deix mienh funx ‘Biauv’ beiv mienh nyei sin, goux biauv wuov deix beiv buoz, henv wuov deix beiv zaux, morc mbuonv wuov deix beiv nyaah, mangc cuotv fong muonh wuov deix beiv m'zing. Maaih deix mienh funx naaiv deix i yiemc beiv taux daic nyei jauv.
• ⁴ Cuotv wuov jauv nyei gaengh guon jienv,
• morc mbuonv nyei qiex yaac faix jienv njiec.
• Norqc heuc, mienh ziouc jiez sin daaih,
• baaux nzung nyei sieqv baaux nzung qiex faix.
• ⁵ Mienh gamh nziex hlang nyei dorngx,
• caux yiem jauv zaangc maaih ciouv nyei sic,
• an^man ndiangx nqoi biangh,
• jopv-nyeic tor ganh nyei sin mingh, * Fai “jopv-nyeic benx hniev nyei ndaamx”.
• oix nyei jauv yaac dangx mi'aqv.
• Weic zuqc mienh mingh ninh yietc liuz nyei biauv,
• nzauh nyiemv nyei mienh yiem wuov jauv mingh mingh daaih daaih.
• ⁶ Wuov zanc nyaanh limc ziouc dangx,
• jiem-nzormc yaac mbaaix,
• zaangh wuom nyei baengh yiem wuom-zingv huv,
• cie wuom yienh yiem wuom-kuotv-nzuih waaic.
• ⁷ Nie-mbung yaac nzuonx mingh benx nie hnangv loz nor,
• tauv nyei qiex yaac nzuonx mingh taux ceix qiex daaih nyei Tin-Hungh.
• ⁸ Cong-Mengh Fin-Saeng gorngv,
• kungx-morngh, kungx-morngh.
• Nyungc-nyungc kungx-morngh.

Setv Mueiz Waac

⁹ Cong-Mengh Fin-Saeng maiv daan maaih cong-mengh, ninh zorqv ninh nyei wuonh zaang njaaux zuangx mienh. Ninh corngh yaac qaqv zaah lorz yaac zueih yietv zueih nyeic nyei fiev camv-diuh waac-beiv. ¹⁰ Cong-Mengh Fin-Saeng lorz bun mienh a'hneiv muangx nyei waac, yaac hnyouv zingx nyei fiev zien leiz nyei waac.

¹¹ Cong-mengh mienh gorngv nyei waac hnangv zunc saeng-kuv nyei biaav. Siou zunv cong-mengh mienh nyei waac yaac hnangv ding duqv jienv nyei ding, yiem yietc dauh Goux Ba'gi Yungh nyei Mienh daaih. ¹² Yie nyei dorn aac, maiv daan mbuoqc naaiv. Meih oix zuqc mbungh longx. Fiev sou camv maiv haih jomc. Doqc sou camv, sin yaac kouv.

• ¹³ Naaiv deix yietc zungv sic haiz liuz aqv.
• Ih zanc gorngv setv mueiz waac.
• Oix zuqc gamh nziex, taaih Tin-Hungh
• ei jienv ninh nyei leiz-latc zoux.
• Naaiv se yietc zungv baamh mienh oix zuqc zoux nyei buonc.
• ¹⁴ Weic zuqc baamh mienh zoux nyei yietc zungv sic,
• liemh bingx jienv nyei sic,
• maiv gunv longx fai ciouv,
• Tin-Hungh oix siemv nzengc.