Cong-Mengh Mienh Zoux Nyei Sic

• ¹ Zorqv meih nyei laangh ziqc haaz njiec wuom-minc,
• weic zuqc nqa'haav ziex hnoi meih ziouc aengx lorz buatc daaih.
• ² Zorqv buonc bun siec dauh mienh,
• zungv bun taux hietc dauh,
• weic zuqc meih maiv hiuv duqv
• yiem naaiv lungh ndiev oix maaih haaix nyungc zeqc naanc.
• ³ Se gorngv mbuonx maaih wuom buangv,
• ninh ziouc dox njiec ndau-beih aqv.
• Maiv gunv ndiangx nauv mingh naamh bung fai baqv bung,
• nauv njiec haaix norm dorngx ziouc yiem wuov aqv.
• ⁴ Haaix dauh mangc nziaaux
  ziouc maiv haaz nyim,
• haaix dauh mangc mbuonx
  maiv duqv gaatv mbiauh.
• ⁵ Hnangv meih maiv hiuv duqv nziaaux * Naaiv joux Hipv^lu waac haih faan benx nziaaux fai qiex fai lingh wuonh. yiem haaix diuc jauv daaih,
• fai yiem maa nyei ga'sie, gu'nguaaz nyei mbungv hnangv haaix nor haih benx daaih,
• fih hnangv nyei meih maiv haih mengh baeqc Tin-Hungh,
• dongh Zeix Maanc Muotc Wuov Dauh, zoux nyei gong.
• ⁶ Lungh ndorm meih oix zuqc haaz meih nyei nyim,
• lungh maanz-hmuangx yaac maiv dungx bun meih nyei buoz dingh,
• weic zuqc meih maiv hiuv duqv haaix nyungc cuotv daaih longx,
• lungh ndorm haaz nyei fai lungh muonz haaz nyei,
• fai i nyungc zungv fih hnangv longx nyei.
• ⁷ Njang m'daaih longx nyei,
• m'zing buatc mba'hnoi ziouc haiz a'hneiv nyei.
• ⁸ Se gorngv mienh ziangh duqv camv-hnyangx,
• gunv bun mienh a'hneiv naaiv deix yietc zungv hnyangx-daauh,
• mv baac bun ninh jangx taux hmuangx nyei hnoi-nyieqc
• weic zuqc naaiv deix hnoi-nyieqc zungv maaih camv.
• Nyungc-nyungc cuotv daaih nyei sic se kungx-morngh.

Kuinx Mienh Lunx Mienh

• ⁹ Mienh lunx mienh aac, yiem meih hnyangx-jeiv lunx nyei ziangh hoc gunv orn-lorqc.
• Yiem meih lunx nyei hnoi-nyieqc gunv bun meih nyei hnyouv njien-youh.
• Meih nyei hnyouv oix zoux nyei gunv zoux,
• meih nyei m'zing buatc haaix nyungc gunv mangc aqv.
• Mv baac oix zuqc hiuv duqv ziux meih zoux nyei naaiv deix yietc zungv sic,
• Tin-Hungh oix siemv.
• ¹⁰ Hnangv naaic, oix zuqc yiem hnyouv zorqv cuotv nzauh faanh nyei sic,
• yaac simv nqoi haaix nyungc hoic meih nyei sin zuqc kouv,
• weic zuqc nin dorng ziepc betv nyei ziangh hoc se kungx-morngh nyei sic.