ໂຢ໊ບ 19 (Job 19)

ໂຢ໊ບ 19

ໂຢ໊ບ ເຕົາ

ໂຢ໊ບ ເອກ້ມ ນິ່ນ ເຍີຍ ຕ່ອຍ ໂຕສ໋ວ ເໝົາ

¹ ໂຢ໊ບ ຕສ່ຽວ ເຕົາ,

² “ເມີ່ຍ ບົວ ອ໋ອຍ ໂຕສ໋ວ ປຸນ ເຢຍ ເຍີຍ ໂຮຍ້ວ ໂຄ້ວ,

ຢ່າ ຫລົ່ງ ຫວ່າ ໝໍ່ ເຢຍ ດົ່ງ ຫາຍ ເລົ່າ?

³ ເມີ່ຍ ບົວ ກ໊ອງ ໂຕະ ເຢຍ
ໄມ້ ເຕສີ໊ຍ ຕສຽບ ດສຸ່ນ ອ໊ະ.

ເມີ່ຍ ບົວ ຕ່ອງ ເຢຍ,
ເມີ່ຍ ບົວ ໄມ້ ໄຍ້ ໄຟ?

⁴ ເຊ ກ໊ອງ ເຢຍ ຕສະເກ້ງ ໂຕສ໋ວ ຕ່ອງ,

ເຢຍ ໂຕສ໋ວ ຕ່ອງ ເຍີຍ ຂູງ ດ໊ອດ ຕສຸ ເຢຍ ກັ້ນ ຮນັ້ງ.

⁵ ເຊ ກ໊ອງ ເມີ່ຍ ບົວ ເທສງ ເມີ່ຍ ບົວ ກັ້ນ ເກົ້າ ໂຮລ ເຢຍ,

ຢ່າ ຝຸນ ເຢຍ ປວັ້ງ ເຍີຍ ໂຄ້ວ ໜ່ານ ປຸນ ທສີງ ເຢຍ ໂຕສ໋ວ ຕ່ອງ,

⁶ ວົ້ວ ຫຍູ່ງ ເມີ່ຍ ບົວ ອ໋ອຍ ຕສຸ ຮິ້ວ ຕຸ໊ ເຊ ທິນ-ຮູ່ງ ຮນັ້ງ ນ້າຍ ໂຕສ໋ວ ປຸນ ເຢຍ,

ຢ່າ ຫລົ່ງ ນິ່ນ ເຍີຍ ມູ໌ງ ເດສ່ນ ຈ໊ຽນ ເຢຍ.

ໂຢ໊ບ ກ໊ອງ ທິນ-ຮູ່ງ ຫ່ອຍ ນິ່ນ
ຮນັ້ງ ນິ່ນ ເປ໋ນ ວິນ-ວັ້ງ ນໍ

⁷ “ເຢຍ ເຫ່ວ ຈ໊ຽນ ກ໊ອງ, ‘ຕສຸ ໂຕສ໋ວ ໂຕະ ອ໊າ ໂລ່ະ!’ ຢ່າ ໄມ້ ມ່າຍ ຫາຍ ເຕົ້າ ເຕົາ.

ເຢຍ ເຫ່ວ ຈ໊ຽນ ໂທ້ ເຖງ, ມປ່າ ໄມ້ ຕຸ໊ ແປ້ງ ຟິມ ເຍີຍ ເຈົ໊າ.

⁸ ທິນ-ຮູ່ງ ຕັ໊ງ ຈ໊ຽນ ເຢຍ ເຍີຍ ເຈົ໊າ ເຢຍ ຕສ່ຽວ ເຈ໋ຍ ໄມ້ ຕຸ໊.

ນິ່ນ ຢ່າ ປຸນ ເຢຍ ເຍີຍ ເຈົ໊າ ຫຮມວັງ ມີ່ງ.

⁹ ນິ່ນ ເຕສ໊າະ ອກອຍ ເຢຍ ເຍີຍ ອຈັງ-ຫລ່າງ,

ຢ່າ ເຕສ໊າະ ອກອຍ ເຢຍ ດົ໋ງ ເຍີຍ ນີ້ງ.

¹⁰ ນິ່ນ ເວີ່ຍ ຈ໊ຽນ ເຢຍ ເປຢີຍ ປູງ ເບ໊າະ ເຢຍ,

ເຢຍ ຕສ່ຽວ ປ່າຍ ເດສ່ງ ໝີ່ ອ໊ະ.

ເຢຍ ມ່າຍ ລ່ຳ ຮນ້ຳ ເຍີຍ,

ນິ່ນ ແປງ ທສວດ ຮນັ້ງ ແປງ ຕິ້ວ ດຢັ໋ງ ນໍ.

¹¹ ນິ່ນ ເຖຈຍ ເຈ໌ຍ, ໂນ໌ວ ໄຫ່ ເຢຍ,

ຢ່າ ຝຸນ ເຢຍ ເປ໋ນ ນິ່ນ ເຍີຍ ວິນ-ວັ້ງ.

¹² ນິ່ນ ເຍີຍ ຈຸນ-ແປງ ກວັ້ນ ລົ່ມ ດສ້ອຍ ຕ້າຍ.

ນິ່ນ ບົວ ຫລິ່ວ ເລີ໌ຍ ເຈົ໊າ ເບ໊າະ ເຢຍ,

ຢ່າ ຫລຽບ ທສຢັ້ງ ເວີ່ຍ ກ໋ອມ ເຢຍ.

ໂຢ໊ບ ໂທ້ ໂລ໌-ແກງ ຕ່ອຍ ຄໍ້-ລ່ຽນ

¹³ ທິນ-ຮູ່ງ ປຸນ ເຢຍ ເຍີຍ ກໍ໋-ໂຢ໌ວ ກວັ່ງ ເຢຍ,

ຕົ້ງ ເຢຍ ຕສົວະ ເຍີຍ ມ່ຽນ ໄມ້ ແລ໌ງ ເຢຍ ອ໊ະ.

¹⁴ ເຢຍ ເຍີຍ ທສຽນ-ເທສະ ເລີ່ຍ ອກອຍ ເຢຍ,

ເຢຍ ເຍີຍ ໂລ໌-ແກງ ຕ່ອຍ ຫລະຄຸ ເຢຍ ໝີ່ ອ໊ະ.

¹⁵ ຢຽມ ເຢຍ ເຍີຍ ເປຢົ໊າ ເຍີຍ ແຄະ ມ່ຽນ ເຖສົາ ມເຊັຍ ໂປວ ຝຸນ ເຢຍ ໂຕສ໋ວ ກະເຫຍ່ຍ ເຍີຍ ມ່ຽນ.

ຕສິ໋ວ ນິ່ນ ບົວ ເຍີຍ ມຕສີງ ໝັ່ງ, ເຢຍ ຕສູ໊ງ ເປ໋ນ ກັ້ນ ຝີງ ມ່ຽນ.

¹⁶ ເຢຍ ເຫ່ວ ເຢຍ ເຍີຍ ໂປວ ມປ່າ ນິ່ນ ໄມ້ ເຕົາ,

ເຢຍ ອ໋ອຍ ຕສຸ ຫລົ່ງ ດສຸ້ຍ ໂຈ້ວ ນິ່ນ ບົວ.

¹⁷ ເຢຍ ເຍີຍ ເອົ໊າ ໂຢ໋ວ ເຢຍ ເຍີຍ ດສຸ້ຍ ເຍີຍ ເຖຈຍ.

ເຢຍ ກັ້ນ ເຍີຍ ທສຽນ ກໍ໋ ທສຽນ ໂຢ໌ວ * ກ້ຳ ເດສ໊ຍ ເຢຍ.

¹⁸ ລ່ຽມ ໄຝ ເຍີຍ ຝຸຈ໊ວຍ ໝັ່ງ ເຜຍ ເຢຍ.

ເຢຍ ເຈ໌ຍ ຊິນ ນິ່ນ ບົວ ກ໊ອງ ເຢຍ.

¹⁹ ເຢຍ ຕສົວະ ເຈ໋ຍ ເຍີຍ ຢຽດ ຕສູ໊ງ ໂລ໌-ແກງ ຕ່ອຍ ໂຢ໋ວ ເຢຍ,

ຕົ້ງ ເຢຍ ຮນ້ຳ ເຍີຍ ມ່ຽນ ຢ່າ ບ໊ຽນ ຮມຽນ ປຸນ ເຢຍ.

²⁰ ເຢຍ ເຍີຍ ດົ໊ບ ແນດ ຈ໊ຽນ ບູ໊ງ,

ເຢຍ ເປຢົ໋າ ທສວດ ສີງ ແໝ່ງ ດົ່ງ ຢຽດ ນອມ ເຮມີ້ຍ-ເນົ້າ. *

²¹ “ໂລ໌-ແກງ ອ້າ! ຄໍ້-ລ່ຽນ ເຢຍ ມ່າະ! ໂທ້ ຄໍ້-ລ່ຽນ ເຢຍ,

ເຫວີ່ຍ ຕສຸ ທິນ-ຮູ່ງ ເຍີຍ ປົ໌ວ ເບ໊າະ ເຢຍ.

²² ເມີ່ຍ ບົວ ເຫວີ່ຍ ຫາຍ ຕິ່ວ ອ໋ອຍ ຫ່ອຍ ເຢຍ ຮນັ້ງ ທິນ-ຮູ່ງ ຫ່ອຍ?

ເມີ່ຍ ບົວ ຖສໍ່ ໂຕສ໋ວ ໂຕະ ປຸນ ເຢຍ ໄມ້ ແກ້ງ ເກົ໋າ?

ໂຢ໊ບ ມ່າຍ ລ່ຳ ຮນ້ຳ ມ່າຍ ເຕົ້າ ໄຮ່ ຕສົວະ ນິ່ນ

²³ “ເຝີຍ ຕຸ໊ ເຢຍ ກ໊ອງ ເຍີຍ ຫວ່າ ຕຸ໊ ເຟ້ຍ ຈ໊ຽນ,

ເຝີຍ ຕຸ໊ ຝາວ ຈ໊ຽນ ຢຽມ ໂຊວ-ຕານ.

²⁴ ເຝີຍ ຕຸ໊ ຫລົ່ງ ເຮລັຍ-ຈາ-ສີ່ ຕສຸ ຫລະເປຢີ໊ຍ,

ແອ໋ງ ຫລົ່ງ ຈູ໌ງ ໂຕ໋ ຕສຸ ລິ໌ວ ເຍີຍ ຕ໋ອງ, ປຸນ ຢຽດ ລິ໌ວ ຢຽມ.

²⁵ ເຫວີ່ຍ ຕສຸ ເຢຍ ຮິ້ວ ຕຸ໊ ຕສົວະ ເຢຍ ວົ້ວ ເຕົ້າ ຕສຢັ້ງ ຈ໊ຽນ,

ເຊດ ເມວີ໌ຍ ນິ່ນ ອ໋ອຍ ຕ້າຍ ໂຊ້ວ ຈ໊ຽນ ເດົາ-ເປີ້ຍ. * ໄຟ ເນຍ-ບູງ.

²⁶ ຕສົ໊ວ ເຢຍ ດົ໊ບ ຮູ້ ເດສ່ງ,

ຢຽມ ເຢຍ ເຍີຍ ອໍ໊ ຊິນ * ເຢຍ ຕສູ໊ງ ຕຸ໊ ປວັດ ທິນ-ຮູ່ງ. *

²⁷ ເຢຍ ກັ້ນ ຕຸ໊ ປວັດ ນິ່ນ,

ເຢຍ ກັ້ນ ເຍີຍ ມຕສີງ ຕຸ໊ ໝັ່ງ ນິ່ນ, ຢ່າ ໄມ້ ເຕສີ໌ຍ ກັ້ນ ເຕົ້າ.

ເຢຍ ເຍີຍ ໂຮຍ້ວ ເມົາ ໂຄ້ວ ໄຫ່.

²⁸ “ເຊ ກ໊ອງ ເມີ່ຍ ບົວ ກ໊ອງ,
‘ເຢຍ ບົວ ຮນັ້ງ ຫາຍ ນໍ ໄຮ່ ຫ່ອຍ ນິ່ນ?’

ຢ່າ ກ໊ອງ, ‘ທສົວະ ສີ່ ເຍີຍ ກອນ-ແປ໋ງ ຢຽມ ນິ່ນ ກັ້ນ,’

²⁹ ເມີ່ຍ ບົວ ອ໋ອຍ ຕສຸ ກ້ຳ ເດສ໋ຍ ດສຸ ດ໊າວ,

ເຫວີ່ຍ ຕສຸ ທິນ-ຮູ່ງ ເຖຈຍ ເຈ໌ຍ, ນິ່ນ ຫລົ່ງ ດສຸ ດ໊າວ ຕີ່ງ ຕສຸ໌ຍ.

ເມີ່ຍ ບົວ ຕສ່ຽວ ຮິ້ວ ຕຸ໊ ມ່າຍ ເຕົ້າ ຊ້ຽມ ຕສຸ໌ຍ.”