ຫລາຍ ປ໋າຍ ໝິ່ວ-ຝັງ ຕສຸ ຕີ່ງ ຕສຸ໌ຍ

¹ ເຢຍ ຕຸ໊ ຕສິ໊ບ ຕສ໊ຽວ ເຍີຍ ຫວ່າ ກ໊ອງ, ² “ປ້າມ ມ່ຽນ ອ້າ! ເມີ່ຍ ອ໋ອຍ ຕສຸ ຮວິນ ຮມຽນ ມີ່ງ
ອິ^ສະ^ລາ^ເອນ ເຍີຍ ຕສວັ໋ງ ບົງ ຢ່າ ໂຕ່ວ ຫວ່າ ກ໊ອງ ວົ້ວ ເຕີ໋ຍ ບົງ. ³ ອ໋ອຍ ຕສຸ ກ໊ອງ, ‘ອິ^ສະ^ລາ^ເອນ ເຍີຍ ຕສວັ໋ງ ບົງ ອ້າ! ອ໋ອຍ ຕສຸ ໝວັງ ຕສ໊ຽວ ທິນ-ຮູ່ງ ເຍີຍ ຫວ່າ ກ໊ອງ ຕົ້ມ ຕສອງ ຟິ້ວ-ບົງ, ໂດ໊ະ-ຕສ໋ວນ ເຖສົາ ຮ໌ອງ. ນິ່ນ ກ໊ອງ, “ເຢຍ ອ໋ອຍ ປຸນ ເມີ່ຍ ບົວ ຕສຸ ດສຸ ດ໊າວ ຢ່າ ໝຽດ ເດສ່ງ ເມີ່ຍ ບົວ ຢຽມ ຮລັງ ຕສັ່ງ ຕສ້ຽນ ເຍີຍ ຕ໋ອງ. ⁴ ເມີ່ຍ ບົວ ເຍີຍ ເຕສ່ຍ-ຕ້ອງ ອ໋ອຍ ຕສຸ ປ່າຍ ຮວາງ. ເມີ່ຍ ບົວ ເຍີຍ ປົ໊ວ ຮູງ ເຕ້ຍ ຢ່າ ອ໋ອຍ ຕສຸ ເບ໊າະ ຮູ້. ຢຽມ ເມີ່ຍ ບົວ ວົ້ວ ຕສຸ ໄຕ໋ ໄຕ່ ເຍີຍ ມ່ຽນ ເຢຍ ຢ່າ ອ໋ອຍ ຕສອຍ ເອຈ່ຍ ເມີ່ຍ ບົວ ເຍີຍ ໝິ່ວ-ຝັງ ເຍີຍ ດສະຮມຽນ. ⁵ ເຢຍ ອ໋ອຍ ເຕສ໊າະ ອິ^ສະ^ລາ^ເອນ ມ່ຽນ ເຍີຍ ເຊີຍ ອັນ ຈ໊ຽນ ນິ່ນ ບົວ ເຍີຍ ໝິ່ວ-ຝັງ ດສະຮມຽນ ແອ໋ງ ເຕສ໊າະ ເມີ່ຍ ບົວ ເຍີຍ ບູ໊ງ ຟາດ ດສ໋ານ ຮວີງ ກ໋ອມ ເມີ່ຍ ບົວ ເຍີຍ ເຕສ່ຍ-ຕ້ອງ. ⁶ ເມີ່ຍ ບົວ ຢຽມ ຫາຍ, ເມີ່ຍ ບົວ ເຍີຍ ຕສີ້ງ ອ໋ອຍ ຕສຸ ປ່າຍ ຮວາງ, ເມີ່ຍ ບົວ ຢຽມ ຮລັງ ຕສັ່ງ ຕສ້ຽນ ເຍີຍ ຕ໋ອງ ຢ່າ ຕສຸ ເບ໊າະ ຫວ່າຍ. ຮນັ້ງ ໜ່າຍ ເມີ່ຍ ບົວ ເຍີຍ ເຕສ່ຍ-ຕ້ອງ ຕສ່ຽວ ປ່າຍ ຮວາງ ຕສຸ ໝຽດ. ເມີ່ຍ ບົວ ເຍີຍ ໝິ່ວ-ຝັງ ຢ່າ ຕສຸ ເບ໊າະ ຮູ້ ໝຽດ ເດສ່ງ. ເມີ່ຍ ບົວ ເຍີຍ ປົ໊ວ ຮູງ ເຕ້ຍ ອ໋ອຍ ຕສຸ ເບ໊າະ ຮູ້. ເມີ່ຍ ບົວ ໂຕສ໋ວ ເຍີຍ ກົງ ຕສ່ຽວ ປ່າ ເດສ່ງ ໝີ່ ອ໊ະ. ⁷ ຕສຸ ໄຕ໋ ເຍີຍ ມ່ຽນ ອ໋ອຍ ຄີງ ເອຈ່ຍ ຢຽມ ເມີ່ຍ ບົວ ບຸດົ໋ງ. ເມີ່ຍ ບົວ ຕສ່ຽວ ຮິ້ວ ຕຸ໊ ເຢຍ ເຊ ຕສ໊ຽວ.

⁸ “‘“ມປ່າ ເຢຍ ອ໋ອຍ ລ່ຽວ ເຕີ໋ຍ ເມີ່ຍ ບົວ, ເຫວີ່ຍ ຕສຸ ເມີ່ຍ ບົວ ຕສຸ ດສ໋ານ ມີ່ງ ຢຽມ ເຕສ໋ຍ ກົ໊ວະ ເຕສ໋ຍ ຝີງ ບຸດົ໋ງ ວົ້ວ ຕສັ່ນ, ເມີ່ຍ ບົວ ມ່າຍ ເຕີ໋ຍ ເປຢົ໋າ ດຸ໊ດ ດສຸ ດ໊າວ. ⁹ ຮນັ້ງ ນ້າຍ ຢຽມ ເຢຍ ປຸນ ນິ່ນ ບົວ ຕສຸ ກວ໊າດ ມີ່ງ ເຍີຍ ກົ໊ວະ ບຸດົ໋ງ ນິ່ນ ບົວ ຕສ່ຽວ ຈັ໋ງ ເຢຍ. ເຢຍ ຕີ່ງ ນິ່ນ ບົວ ເຍີຍ ຕສຸ໌ຍ ປຸນ ນິ່ນ ບົວ ໄຍ້ ຫລາຍ ນິ່ນ ບົວ ກັ້ນ ມ່າຍ ເຮ່ຍ ໂຮຍ້ວ * ເປີ໊ຍ ໝັ່ງ ທສວດ ອີ^ຢິ໊ບ 34:15 . ເລີ່ຍ ເຢຍ. ນິ່ນ ບົວ ເຍີຍ ມຕສີງ ໝັ່ງ ໝິ່ວ-ຝັງ ແອ໋ງ ຫັ່ນ ໄຫ່. ນິ່ນ ບົວ ຕສ່ຽວ ດສອງ ນິ່ນ ບົວ ກັ້ນ ຫລາຍ ນິ່ນ ບົວ ໂຕສ໋ວ ເຍີຍ ເອ໊າະ ສີ່ ເຖສົາ ຢຽດ ຕສູ໊ງ ກ້ຳ ເດສ໊ຍ ໄຫ່ ເຍີຍ ສີ່. ¹⁰ ນິ່ນ ບົວ ຕສ່ຽວ ຮິ້ວ ຕຸ໊ ເຢຍ ເຊ ຕສ໊ຽວ. ເຢຍ ກ໊ອງ ອ໋ອຍ ປຸນ ນິ່ນ ບົວ ຕສຸ ເຕສະ ໜ່ານ ເຊ ໄມ້ ເຕສີ໌ຍ ກ໊ອງ ຂູງ-ຫວ່າ.”

¹¹ “‘ຕສ໊ຽວ ທິນ-ຮູ່ງ ຮນັ້ງ ນ້າຍ ກ໊ອງ, “ເມີ່ຍ ອ໋ອຍ ຕສຸ ໄບ໋ ປົ໌ວ, ດ່ຳ ເດົາ ກ໊ອງ, ‘ໂຄ້ວ ອ໊ະ!’ ຫລາຍ ອິ^ສະ^ລາ^ເອນ ເຍີຍ ເຕສີ໊ຍ-ຟຸນ ໂຕສ໋ວ ເຍີຍ ຢຽດ ຕສູ໊ງ ກ້ຳ ເດສ໊ຍ ໄຫ່ ເຍີຍ ເອ໊າະ ສີ່, ນິ່ນ ບົວ ຕສູ໊ງ ອ໋ອຍ ຕສຸ ດສຸ ດ໊າວ, ຕສຸ ຫງໍ່ ຫຮນາງ, ຕສຸ ວວນ-ແປ່ງ ໄຕ່. ¹² ຢຽມ ໂກ ເຍີຍ ຕ໋ອງ ນິ່ນ ບົວ ອ໋ອຍ ຕສຸ ວວນ-ແປ່ງ ໄຕ່. ຢຽມ ຟັດ ວົ້ວ ເຕີ໋ຍ ອ໋ອຍ ຕສຸ ດສຸ ດ໊າວ ໄຕ໋. ເຕສ່ງ ເອຈ່ຍ ໄມ້ ແກ້ງ ໄຕ່ ວົ້ວ ເຕີ໋ຍ ຕສູ໊ງ ອ໋ອຍ ຕສຸ ຫງໍ່ ຫຮນາງ ໄຕ່. ເຢຍ ຕສ່ຽວ ຮນັ້ງ ນ້າຍ ນໍ ໂນ໌ວ ນິ່ນ ບົວ ເຖົາ ເຢຍ ເຍີຍ ກະເຖຈຍ ຟິວ. ¹³ ນິ່ນ ບົວ ຕສຸ ໄຕ໋ ເຍີຍ ມ່ຽນ ເຍີຍ ເຊີຍ ເປວີ໋ຍ ຈ໊ຽນ ຮວີງ ກ໋ອມ ນິ່ນ ບົວ ເຍີຍ ເຕສ່ຍ-ຕ້ອງ, ນິ່ນ ບົວ ເຍີຍ ໝິ່ວ-ຝັງ ບຸດົ໋ງ, ຢຽມ ນອມໆ ບົງ-ຮລັງ ບົງ-ນີ້ງ ເຖສົາ ຕິ້ວໆ ຍ໌ຽມ ເຍີຍ ດຢັ໋ງ ເຖສົາ ຕິ້ວໆ ມ່າຍ ນ່ອມ ທສ້ຳ ເຍີຍ ຕົ້ມ ບະອົງ ເຕສວີຍ ດຢັ໋ງ ກະເດ໊ຍ, ຕະຟ່ານ ປົ໊ວ ຮູງ ປຸນ ນິ່ນ ບົວ ເຍີຍ ໝິ່ວ-ຝັງ ເຍີຍ ຕ໋ອງ, ວົ້ວ ຕສັ່ນ ເມີ່ຍ ບົວ ຕສ່ຽວ ຮິ້ວ ຕຸ໊ ເຢຍ ເຊ ຕສ໊ຽວ. ¹⁴ ເຢຍ ຕສ່ຽວ ຊູງ ປົ໌ວ ເບ໊າະ ນິ່ນ ບົວ, ປຸນ ນິ່ນ ບົວ ຢຽດ ຕສູ໊ງ ຢຽມ ເຍີຍ ຕ໋ອງ ເປ໋ນ ເດົາ-ຮວາງ, ຢຽມ ເຕີ່ຍ-ປູງ-ຮວາງ ມີ່ງ ເຖົາ ດິບ^ລາ ຕສີ້ງ. * ມ່າຍ ເຕີ໋ຍ ກ໊ອງ ລິບ^ລາ ຕສີ້ງ. ນິ່ນ ບົວ ຕສ່ຽວ ຮິ້ວ ຕຸ໊ ເຢຍ ເຊ ຕສ໊ຽວ. ”’”